Milioni de persone le ze drio patir par via dele desgràssie nela naturesa. Questo ga belche sucedesto con ti? Tante brute robe le pol suceder par causa de cambiamenti del tempo. Par esémpio, furaconi, tempeste e sicloni i pol far vegner fora inondassion e forti venti. Tanta piova pol far vegner do la tera dei monti e forti temporai i pol far vegner fora sciantise che pol scominsiar fogo nel mato. Quando se resta massa tempo sensa la piova, quando fà massa caldo o quando ghen’è tanta neve anca pol far vegner bruti dani.

 In tanti posti nel mondo, le desgràssie nela naturesa le ze drio vegner cada volta de pi e cada volta pi forte. La Federassion Internassional dela Crose Rossa e del Cressente Rosso la dise: “L’è cada volta de pi persone che le ze drio patir par via dele desgràssie nela naturesa. Cada volta de pi inondassion, temporai e seca i ze drio far dano ale persone e a quel che ghe ocore par viver. Par quela milioni de persone le ga de assar el so posto de star cada ano.”

 Quei che infronta queste brute robe i pol gaver problemi de salute, pensieri e bruti sentimenti. Pol esser che lori i se sente mal parché i ga perso tuto quel che i gavea, parché i ga perso la so casa o parché i ga perso una cara persona nela morte.

 Se ti te sì drio patir par via dele desgràssie nela naturesa, la Bìblia la pol giutarte. Ela la pol darte consolo, speransa, e boni consili. Queste robe le ga belche giutà tante persone che le ga patio par via dele desgràssie nela naturesa. (Romani 15:4) La Bìblia anca la risponde a una domanda importante che tante persone le se fà: ‘Parché che Dio el ga assà questo suceder? Sarà che lu l’è drio castigarme?’

 La Bìblia la insegna che Dio no’l fà le persone sofrir. Ela la ne dise: “Par robe rugne Dio no’l pol esser provà, gnanca el prova nissuni.” (Tiago 1:13) Questo vol dir che no l’è Dio quel che el fà vegner le desgràssie nela naturesa che sucede ancoi.

 L’è vera che la Bìblia la parla che arquante volte Dio el ga doperà la naturesa par castigar le persone rugne. Ma quando lu el fea cossita, prima lu sempre el disea cossa che ndaria suceder, el spieghea parché lu l’era drio far quela roba e el protegea le persone bone. Par esémpio, Dio el ga spiegà parché che lu l’era drio far vegner el Dilùvio, el ga avisà le persone e el ga protegesto Noè e la so fameia. Invesse, le desgràssie nela naturesa che sucede ancoi le ze difarente. Le sucede sensa aviso e le fà dano ale persone rugne e anca ale bone. — Génesi 6:13; 2 Piero 2:5.

 Alora, podemo esser sicuri che le desgràssie nela naturesa che le sucede ancoi no le ze un castigo de Dio. Par saver de pi sora questo, ledi el artìcolo “Cossa che la Bìblia la dise sora le desgràssie nela naturesa?”

 La Bìblia la mostra che Geovà a Dio el se importa cole persone e lu el capisse el so dolor. Varda arquanti versìcoli dela Bìblia che i pol consolarte.

•   Isaia 63:9: ‘Durante tuto el so sofrimento, anca Dio el ga sofrio.’

   Cossa vol dir: Geovà el resta tanto triste quando el vede le persone sofrir.

•   1 Piero 5:7: “Lu el tende de valtri.”

   Cossa vol dir: Geovà el vol che stemo ben.

 Geovà el ama le persone, par quela lu el fà qualcossa par giutarle. Par meso dela Bìblia, lu el ne dà boni consili che i ne giuta a restar meio. Lu anca el ne dà la speransa che nel futuro mai pi ghen sarà desgràssie nela naturesa par causa del cambiamento del tempo. — 2 Corinti 1:3, 4.

 Nela Bìblia, Geovà el promete: “Vui darve un futuro e una speransa.” (Geremia 29:11) Geovà el vol che le persone le viva felice nte un paradiso qua nela Tera. Lu no’l vol che le persone le viva con paura dele desgràssie nela naturesa. — Génesi 1:28; 2:15; Isaia 32:18.

 Come che lu el va far questo? Par meso del so Regno, che l’è un governo nel cielo e che Gesù l’è el rè. (Mateo 6:10) Gesù el ga la sabedoria e el poder che ghe vol par no assar suceder desgràssie nela naturesa. Quando lu l’era nela tera, lu el ga mostrà che lu l’era bon de far questo. (Marco 4:37-41) Come lu el capisse le robe, lu el ndarà mostrar ale persone come le ga de tender dela Tera e no far gnente che rovine la naturesa. (Isaia 11:2) Alora, quando Gesù el sarà el governante dela Tera, le persone mai pi le ndarà patir par via dele desgràssie nela naturesa.

 Fursi te vol saver quando Gesù el ndarà far queste robe. Par catar la risposta, ledi el artìcolo “Quando che el Regno de Dio el va governar la Tera?”

 La Bìblia la ga consili che i pol giutarte vanti, durante e dopo de una desgràssia nela naturesa.

•   Vanti: Paréciate par far presto qualcossa.

   Cossa la Bìblia la dise: “Quel che l’è prudente el vede el perìcolo e el va sconderse. Ma quei che no i ga speriensa i va avanti e i sofrirà el dano.” — Proverbi 22:3.

   Cossa vol dir: Proa saver quale che le ze le desgràssie che le podaria suceder darente del posto ndove te sì de star. Cossita, te sarè bon de far presto quel che te gavarè de bisogno e proteger la to fameia.

   Come ga giutà una persona: “Quando ga scominsià el grando fogo nela floresta, le nostre bolse de emergensa le era pronte coi nostri remedi e cole nostre robe. Le persone le era spaurade e no le savea cossa far. Ma noantri gaveino tuto quel che ne ocorea. E me ringràssio tanto parché noantri èrino pareciadi!” — Tamara, Califòrnia, Stati Unidi.

•   Durante: Pensa in quel che l’è pi importante.

   Cossa la Bìblia la dise: “Anca quando qualchedun el ga tante robe, la so vita no la vien de quel che el ga.” — Luca 12:15.

   Cossa vol dir: La vita la ze pi importante de che quel che gavemo.

   Come ga giutà una persona: “Quando un forte vento el ga destruto la nostra casa, son restada persa e no savea cossa far. Ma una roba che go fato la ze stata pregar de cuor a Geovà Dio. In quel momento, me son nicorta che gaveino perso sol le robe che gaveino e nò le nostre vite.” — Leslie, Filipine.

•   Dopo: No stà restar massa ansioso.

   Cossa la Bìblia la dise: “No sté mai restar ansiosi con quel che ndarà suceder doman, parché cada giorno el gavarà le so ansietà.” — Mateo 6:34.

   Cossa vol dir: No stà mia restar massa ansioso con quel che ndarà suceder.

   Come ga giutà una persona: “Dopo del furacon, ze vegnesto tanta àqua rento la me casa. Mi gavea de far tante robe e son restada stufa. Ma go proà meter in pràtica el consìlio dela Bìblia de no restar massa ansiosa con quel che ndarà suceder. Alora me son nicorta che, col aiuto de Geovà, mi son bona de soportar tanto de pi de quel che mi imaginea.” — Sally, Flòrida, Stati Unidi.

 Par saver altri consili, ledi el artìcolo “Arquanti consili che i pol salvar la to vita quando sucede una desgràssia”.