Gheto belche visto che tante religion le par preocuparse de pi de guadagnar soldi invesse de giutar le persone a ndar darente de Dio? Lori i fà anunsi e i vende servissi e prodoti. Tanti lìderi religiosi i ciapa tanti soldi e i ga una vita de siori. Varda arquanti esempi:

•   De acordo con una investigassion, par 13 ani un vesco catòlico el ga doperà i soldi dela ciesa par far intorno de 150 viai con avioni particolari e intorno de 200 viai in limousine. Lu anca el ga guastà de pi de quatro milioni de dòlari par rangiar su la so casa nela paròchia.

•   Nte un paese dela Àfrica un pastor el fà tute le stimana culti religiosi par desene de miliari de persone. Nela so granda ciesa te pol comprar tanti tipi de prodoti, come òio miracoloso, toaie e camisete cola foto del pastor. Quasi tute le persone che le va nela so ciesa le ze poarete, ma lu l’è pròpio tanto sior.

•   Dele quatro montagne dela Cina che le ze sacre par i budisti, due de queste le ze registrade come firme che le ga assion nela bolsa de valori. El famoso Témpio Shaolin el fà parte de tanti progeti comersiai. El so lìder l’è cognossesto come “el monge CEO” (diretor esecutivo).

•   Firme Americane le ze drio scominsiar a contratar consilieri spirituai. Una notìssia la dise che par via dele tradission religiose, lori i fà rituai e i dà orientassion religiose ai so clienti.

 Cossa càtito dele religion che le se mete nel comèrsio? Gheto domandà cossa che Dio el pensa dele persone che le dopera la religion par guadagnar soldi?

 A Dio no ghe piase che le religion le se meta nel comèrsio. La Bìblia la mostra che nel passà Dio el se ga inrabià tanto coi sasserdoti che i disea che i era so rapresentanti, ma i volea soldi par insegnar al pòpolo. (Michea 3:11) Dio el ga condanà el comèrsio ganansioso che i gavea fato del so témpio una ‘casa de ladroni.’ — Geremia 7:11.

 Gesù el pensea compagno a Dio sora quei che i doperea la religion par guadagnar soldi. Quando l’era nela tera, i lìderi religiosi i guadagnea soldi parché i assea che i comersianti ganansiosi i fesse negossi rento el témpio de Gerusalen. Cossita le persone sinsiere che le ndea al témpio par adorar a Dio ghe tochea guastar tanti soldi. Con coraio Gesù el ga parà via del témpio quei comersianti disonesti e el ghe ga dito: ‘Fermeve de far dela casa del me Pare una casa de comèrsio!’ — Gioani 2:14-16.

 Gesù anca el ga mostrà che el pensea come Dio nela so maniera de viver. (Gioani 8:28, 29) Lu no’l ga mai domandà soldi quando el insegnea sora Dio. Lu anca no’l ga mai domandà soldi par i so miràcoli, come quando el ghe ga dato de magnar a quei che i gavea fame, el ga curà quei che i era maladi, el ga ressussità morti. Gesù no’l ga mai volesto deventar sior. Lu gnanca el gavea una casa. — Luca 9:58.

 Gesù el ga dito ai so seghidori che no i gavea de domandar soldi par i so laori religiosi. Lu el ga dito: “Gavé ricevesto sensa pagar gnente, alora gavé de dar sensa cobrar gnente.” (Mateo 10:8) Questi seghidori che i era cognossesti come cristiani i ga fato quel che lu el ga dito. Varda arquanti esempi:

•   Una volta un omo che se ciamea Simon el volea darghe soldi al apòstolo Piero che l’era ndato insieme con Gesù nela predicassion. Simon el ga fato questo parché el volea gaver poder e autorità. Suito Piero el ga rigetà la oferta de Simon e el ghe ga dito su: ‘Che el to argento el sìpia finio fora insieme con ti parché te ghè pensà de gaver el don de Dio coi soldi.’ — Ati 8:18-20.

•   El apòstolo Paolo l’era un servo de Dio tanto cognossesto che el viaiea par visitar le congregassion. Lu el se ga sforsà tanto par giutar i so fradei, ma no’l ga mai volesto guadagnar soldi con questo. Lu e i altri cristiani no i era vendedori dela Parola de Dio, come tanti i ze. (2 Corinti 2:17) Invesse, Paolo el ga scrito che quando lori i ndea predicar le bone notìssie i laorea giorno e note parché i fradei no i guastesse soldi con lori. — 1 Tessalonissensi 2:9.

 Sicuro che quei cristiani i gavea bisogno de soldi par far questa predicassion spessial e giutar i altri. Ma lori no i domandea soldi par far questo. Chi che volea podea far un donativo dopo de pensar in questi prinsipi:

•   2 Corinti 8:12: “Parché se la persona la ga una bona disposission, Dio el resta contento che la dae quel che la ga, e nò quel che no la ga.”

   Cossa vol dir questo versìcolo: El pi importante l’è la motivassion che la persona ga par dar e nò quanto che la ze drio dar.

•   2 Corinti 9:7: “Fà cada un come el ga dessidio nel so cuor, nò sensa voia o par forsa, parché Dio el ama quel che el dà con alegria.”

   Cossa vol dir questo versìcolo: Dio no obriga nissuni a far donativi. Lu el resta contento quando una persona dà de cuor.

 La Bìblia la assa ciaro che Dio no’l aceta tute le religion. (Mateo 7:21-23) Una professia bìblica, con parole forte, la compara tute le religion false con una prostituta. Queste religion le ze ciamade cossita parché le se une coi governi par gaver soldi e altri benefissi e i ghe domanda soldi ale persone de tuti i paesi. (Apocalisse 17:1-3; 18:3) Questa professia la mostra che Dio suito el ndarà destruser queste religion false. — Apocalisse 17:15-17; 18:7.

 Intanto che no riva questo giorno, le robe sbaliade che le religion false le fà le imbroia le persone e le fà che le vae distante de Dio, e lu no’l vol questo. (Mateo 24:11, 12) Par quela lu el convida le persone sinsiere a imparar a servirlo dela maniera giusta e ndar fora dela religion falsa. — 2 Corinti 6:16, 17.