“La violensa contra le done l’è un problema de salute che ghen’è in tuto el mondo, l’è come una epidemia” e ghen’è bisogno de far qualcossa suito. Questo l’è quel che ga dito la organisassion Mondial dela salute, (OMS). Secondo una peschisa dela OMS “quasi 30% dele done che ga bio un relassionamento le ga sofrio qualche tipo de violensa fìsica o sessual nela so vita dela parte del so compagnero”. Anca un relatòrio dela Organisassion dele Nassion Unide (ONU), el dise che ga bio un ano che, ‘tuti i giorni, una mèdia de 137 done le ze state copade par una persona dela so pròpia fameia’. a

 Questi nùmeri i ne dà sol una idea de quanto grando l’è el problema dela violensa domèstica, ma no i pol farne capir quanto dolor fìsico e emossional queste vìtime le ga sofrio.

 Te sì una de queste vìtime? O te cognossi qualchedun che sofre con questo problema? Alora, varda come la Bìblia la pol giutarte.

  La colpa no la ze toa

  Va in serca de aiuto

  No te sì ti sola

  El fin dela violensa domèstica

  Come che te pol giutar qualchedun che sofre cola violensa domèstica

 Cossa che la Bìblia la dise: “Cada un de noantri el ga de risponder a Dio par quel che el fà.” — Romani 14:12.

 Ricòrdate: No te sì ti che te ghè colpa, ma quel che el te ga fato mal.

 Se el to compagnero el te dà la colpa par le robe brute che l’è drio farte, l’è lu che l’è sbalià. Le done le ga de esser amade e nò sofrir violensa. — Colossensi 3:19.

 Dele volte, la persona che fà el mal, la ga una malatia mental o la ze stata slevada nte una fameia ndove i la tratea con violensa o parché la beve massa. Ancora cossita, la ze responsàbile davanti a Dio par la maniera che la te trata. La ga de far i cambiamenti che ghe vol e fermarse de farte mal.

 Cossa che la Bìblia la dise: “Ghen sarà boni resultadi se te scolti consili.” — Proverbi 15:22.

 Ricòrdate: Se te te senti in perìcolo o no te sè cossa far, altre persone le pol giutarte.

 Parché te ghè bisogno del aiuto de altri? Parché pol esser che te ghè massa pensieri in testa. Par saver come infrontar questo problema, te ghè de pensar in tante cose, come par esémpio:

•   La to seguransa

•   Quel che l’è meio par i to fioi

•   La to situassion econòmica

•   Cossa che ti te senti par el to compagnero

•   La speransa de salvar el to relassionamento se el to compagnero el càmbia

 L’è normal che no te sàpie cossa far e che no te vedi una solussion. Ma a chi che te pol domandar aiuto?

 Una amiga o parente che te te fidi la pol giutarte in maniera emossional e col aiuto pràtico. Dele volte sol parlar con una persona pol giutarte a sentirte meio.

 I sentri de atendimento par le vìtime de violensa domèstica i pol darte un aiuto suito. Le persone che riceve queste ligassion le pol giutarte a protegerte. Se el to compagnero el capisse che quel che el ga fato l’è sbalià e el vol cambiar, questi sentri de atendimento i pol giutar anca lu.

 Altri aiuti de emergensa i pol giutarte nei momenti pi difìcile. Lì te catarè dotori e altri profissionai trenadi.

 Cossa che la Bìblia la dise: “Geovà b l’è darente de quei che i ga el cuor pien de tristessa. Lu el salva quei che i ze desanimadi.” — Salmo 34:18.

 Ricòrdate: Dio el promete giutarte.

 Geovà el se preocupa tanto con ti. (1 Piero 5:7) Lu el cognosse i to sentimenti e quel che te sì drio pensar e el pol consolarte par meso dela Bìblia. Lu anca el vol che te parli con lu in orassion. Quando che te preghi a Dio, te pol domandarghe che el te dae forsa e sabedoria par dàrghene fora cola situassion. — Isaia 41:10.

 Cossa che la Bìblia la dise: “Le se sentarà cada una soto la so vigna e soto el so figher, sensa nissuni par spaurarle.” — Michea 4:4.

 Ricòrdate: La Bìblia la promete che nel futuro tute le persone le gavarà un posto par viver in pace, un posto sicuro.

 Sol Geovà el pol risolver par sempre tuti i problemi che noantri infrontemo. La Bìblia la promete. “Lu el sugarà tute le làgrime dei so oci e no ghen sarà pi la morte, gnanca tristessa, gnanca piander gnanca dolor.” (Apocalisse 21:4) Quando questo tempo vegnarà, no ndaremo pi ricordarse dele robe brute che le ga sucedesto. Se ricordaremo sol dele robe bone. (Isaia 65:17) Questo l’è el futuro che la Bìblia la promete par ti.