Si. La Bìblia la parlea che tante persone le ndaria cambiar par pedo nei nostri giorni. Questo vol dir che quasi tute le persone no le ndaria obedir ale orientassion sora la moral e no le ndaria comportarse de maniera giusta. a (2 Timòteo 3:1-5) Ma la Bìblia la dise che gnanca tute le persone le saria cossita. Col aiuto de Dio, tante persone le ndaria sforsarse par no assar esser influensade par questa maniera de viver e par pensar e far le robe dela maniera che Dio el ghe piase. — Isaia 2:2, 3.

In questo artìcolo:

•  De acordo cola Bìblia, come che le persone le ndaria pensar e comportarse nei nostri giorni?

•  Cossa che el egoismo el fà cole persone?

•  Parché tante persone le cambiaria par pedo?

•  Cossa ghemo de far intanto che vedemo le persone cambiar?

•  Sarà che tute le persone le cambiaria par pedo?

•  Sarà che le persone le va cambiar par pedo fin no gaver pi solussion?

 La Bìblia la dise che par causa del egoismo la pi granda parte dele persone le gavaria brute caraterìstiche. Lore le saria “sensa autocontrolo”, ‘le amaria sol lore stesse’, e ‘le amaria i piaseri invesse de a Dio’.—2 Timòteo 3:2-4.

 E questo l’è vero. Ancoi ne par che le persone le pensa sol in lore stesse, in quel che ndaria ben par lore e nela so felicità. Ancoi se vede tanto queste robe suceder che ghen’è grupi che i se ciama ‘Sol penso in mi’. Par quela tante persone le ze “sensa amor a quel che l’è bon”, o sìpia, no le ze gnanca bone de amar quel che l’è giusto. E come le ze “ingrate” no le vede la nessessità de ringrassiar par quel che le ga o par quel che i altri i fà par lore. — 2 Timòteo 3:2, 3.

 El egoismo el faria le persone comportarse mal, come semo drio veder ancoi:

•   Ganànsia. Ancoi tanti i ‘ama i soldi’. Par una persona gaver sussesso la ga de ver soldi o robe materiai. — 2 Timòteo 3:2.

•   Orgòlio. Tanti i ze ‘aroganti’ e pieni de orgòlio. (2 Timòteo 3:2, 4) Lori i ghe piase parlar de quel che i fà e i dise de pi de quel che l’è, sora le so qualità, le so abilità e sora i soldi che i ga.

•   Caluniadori. Vedemo ‘bestemadori’ e ‘caluniadori’ in tuti i posti. (2 Timòteo 3:2, 3) Queste parole le ga de veder con persone che le ofende o le dise busie sora i altri o sora Dio.

•   Testardi. Tanti i ze “sensa lealtà”, ‘traditori’, ‘testardi’ e no i ze ‘disposti a far acordi’. (2 Timòteo 3:2-4) Lori i mostra queste atitùdine quando no i vol far come i altri i dise, no i vol far acordi o no i vol far quel che i ga prometesto.

•   Violensa. Tante persone le ze “crudele” o le se inrabia con facilità, cossita le persone le deventa pi crudele e violente. — 2 Timòteo 3:3.

•   Mancansa de rispeto par la lege. Gesù el ga dito che nei nostri giorni ghen saria un “aumento de quel che l’è contra la lege”. (Mateo 24:12) Lu el ga parlà anca de “confusion” e revolte in tuti i posti. — Luca 21:9, nota in portoghese.

•   Mancansa de amor nela fameia. Tanti i ze ‘desobedienti ai genitori’ e “sensa afeto natural”, questo vol dir che no i vol mia ben gnanca ale persone dela so fameia. L’è par quela che ancoi, de pi che mai, vedemo nele fameie persone drio esser assade de banda, drio sofrir abuso e drio esser vìtime de violensa. — 2 Timòteo 3:2, 3.

•   Ipocrisia religiosa. Tante persone “le fà finta de adorar a Dio”. (2 Timòteo 3:5) Lore le va drio ai lìderi religiosi che i ghe dise quel che lore le vol scoltar, invesse de far quel che Dio el ghe domanda. — 2 Timòteo 4:3, 4.

 Con tanto egoismo che ghen’è nel mondo, tante persone le ze drio sofrir de maniera emossional e mental. (Eclesiasti 7:7) Varda arquanti esempi: Quei che i ama tanto i soldi i imbroia i altri par gaver de pi lucro. Par via dela mancansa de amor nela fameia, tanti i ze vìtime de abuso e de violensa rento dela so casa. Lori i pol restar con depression e anca gaver voia de coparse. Anca quei che i ze traditori e sensa lealtà, i pol assar le so vìtime tanto mal de maniera emossional.

 La Bìblia la spiega parché le persone le cambiaria:

•   Le persone le ga cada volta manco amor a Dio e ai altri. (Mateo 24:12) Par quela, ghen’è ancora de pi egoismo.

•   Sàtana, el Diaol, l’è stà trato do del cielo par la Tera. (Apocalisse12:9, 12) De quel giorno avanti, lu el proa far con che le persone le se devente cada volta pi egoiste.—1 Gioani 5:19.

 La parola de Dio la dise: “Stà lontan de lore.” (2 Timòteo 3:5) Sarà che questo vol dir che ghemo de viver distante dele persone? Nò. Vol dir che no ghemo de ver una forte amicìssia cole persone che le ze egoiste e che no le rispeta a Dio. — Tiago 4:4.

 Nò. La Bìblia la dise che arquante persone le ndaria sofrir par via dele robe brute che le ze drio suceder. (Ezechiel 9:4) Lore le ndaria far sforso par obedir a Dio e par no esser egoiste. Se vederia nela so maniera de viver e de parlar, che lore le saria difarente dele altre persone. (Malachia 3:16, 18) Par esémpio, lore le ndaria proar esser in pace con tuti e no le ndaria nela guera o far qualche tipo de violensa. — Michea 4:3.

 Nò. Le persone no le sarà tanto rugne al punto de gaver sol violensa e mancansa de òrdine. Suito, Dio el va destruser quei che no i vol cambiar e che i seita desobedirlo. (Salmo 37:38) Ghen sarà “una nova tera”, o sìpia, sol le persone che le ze in pace coi altri le ndarà viver par sempre qua nela Tera. (2 Piero 3:13; Salmo 37:11, 29) Podemo pròpio creder in questa speransa. Vedemo adesso, che la Bìblia la ze drio giutar le persone a far cambiamenti e a viver de acordo cole orientassion de Dio. — Efesi 4:23, 24.