Le desgràssie nela naturesa che sucede ancoi no le vien de Dio, ma lu el se importa cole persone che le patisse par causa de queste desgràssie. El Regno de Dio el ndarà finir con tute le robe che le ne fà sofrir, anca cole desgràssie nela naturesa. Ma par intanto, Dio el dà consolo ale persone che le sofre par causa de queste desgràssie. — 2 Corinti 1:3.

•  Come che savemo che Dio no’l castiga le persone par via dele desgràssie nela naturesa?

•  Sarà che le desgràssie nela naturesa le mostra che el fin l’è darente?

•  Come che Dio el giuta quei che i ga patio par causa dele desgràssie nela naturesa?

•  Sarà che la Bìblia la pol giutarne a pareciarse vanti che suceda una desgràssia nela naturesa?

•  Testi dela Bìblia che consola quei che i ga passà par una desgràssia

 La Bìblia la mostra che Dio el ga belche doperà la naturesa par far giustìssia nel passà. Ma le desgràssie nela naturesa le ze tanto difarente.

•   Le desgràssie nela naturesa le fà mal e le copa tuti i tipi de persone. Ma quando Dio el ga fato giustìssia doperando la naturesa, lu el ga copà sol i rugni. Par esémpio, quando el ga finio fora cole cità de Sodoma e Gomora lu el ga salvà la vita de Lò e so due fiole, che i era persone bone. (Génesi 19:29, 30) Dio el ga visto quel che ghen’era nel cuor dele persone de quel tempo e el ga finio fora sol con quei che i era rugni. — Génesi 18:23-32; 1 Samuel 16:7.

•   Le desgràssie nela naturesa le sucede de colpo e sensa avisarne vanti. Ma Dio el disea ale persone rugne vanti de doperar la naturesa par far giustìssia con lore. Cossita, quei che i scoltea podea salvar la so vita. — Génesi 7:1-5; Mateo 24:38, 39.

•   Tante volte le desgràssie nela naturesa le sucede par causa de quel che i òmini i fà. Lori i rovina la naturesa e i fà su costrussion ndove no i gavaria de far come in posti che ghen’è teremoti, inondassion e ndove el tempo el càmbia tanto. (Apocalisse 11:18) Dio no’l ga la colpa dele consequense dei sbali che i òmini i fà. — Proverbi 19:3.

 Si, la Bìblia la disea che ndaria suceder desgràssie nela naturesa nel “fin del sistema de cose” o “nei ùltimi giorni”. (Mateo 24:3; 2 Timòteo 3:1) Par esémpio, Gesù el ga dito che nei nostri giorni ‘ghen saria mancansa de magnar e teremoti in un posto dopo l’altro’. (Mateo 24:7) Presto, Dio el va finir con tuto quel che ne fà sofrir, anca cole desgràssie nela naturesa. — Apocalisse 21:3, 4.

•   Dio el ghe dà consolo par meso dela so Parola, la Bìblia. La Bìblia la mostra che Dio el se importa con noantri, e che lu el resta triste quando sofrimo. (Isaia 63:9; 1 Piero 5:6, 7) Ela la parla anca che Dio el ga prometesto che nel futuro no ghen sarà pi desgràssie nela naturesa. — Varda el quadro “ Testi dela Bìblia che consola quei che i ga passà par una desgràssia”.

•   Dio li giuta par meso dei so servi. Quei che i serve a Dio i fà compagno Gesù. La Bìblia la dise in Isaia 61:1, 2 che Gesù el ndaria consolar “quei che i ga el cuor spacà” e “tuti quei che i piande”. I servi de Dio i se sforsa de far cossita. — Gioani 13:15.

   Dio anca el dopera i so servi par dar quel che ghe ocore a quei che i ga patio par causa de una desgràssia nela naturesa. — Ati 11:28-30; Gàlati 6:10.

 Si. Anca se la Bìblia no la dise cada roba che ghemo de far quando sucede una desgràssia nela naturesa, la ga arquanti testi che i pol giutarne. Par esémpio:

•   Paréciate vanti par saver cossa far se vien fora una desgràssia nela naturesa. La Bìblia la dise: “Quel che l’è prudente el vede el perìcolo e el va sconderse.” (Proverbi 22:3) L’è importante dessider cossa far se vien fora una bruta situassion. Par esémpio, te pol assar pronte le robe che te ghè de bisogno e trenar cola to fameia ndove ndaré catarve se sucede una desgràssia.

•   La to vita la ze pi importante de quel che te ghè. La Bìblia la dise: “No ghemo portà gnente al mondo e no podemo portar via gnente.” (1 Timòteo 6:7, 8) Ne toca esser pronti par assar indrio la nostra casa e quel che ghemo par esser boni de scampar via de una desgràssia. Quel che ga de pi valor l’è la nostra vita e nò quel che ghemo. — Mateo 6:25.