La granda tribolassion la sarà el tempo pi fadiga che le persone le ga belche visto. La Bìblia la dise che la sucederà nei “ùltimi giorni”. (2 Timòteo 3:1; Daniel 12:4) Gesù el ga dito che questa tribolassion mai la ga sucedesto e mai pi la sucederà nantra volta. — Marco 13:19; Daniel 12:1; Mateo 24:21, 22.

Cossa che sucederà nela granda tribolassion?

•   Le religion false le sarà finide fora. Lore le sarà destrute de colpo. (Apocalisse 17:1, 5; 18:9, 10, 21) Dio el ndarà doperar i governi che i fà parte dela Organisassion dele Nassion Unide (ONU) par finir fora cole religion false. a

•   Arquanti i ndarà contra la vera religion. El profeta Ezechiel el ga visto nte una vision un grupo de nassion che el se meteria insieme par atacar quei che i fà parte dela vera religion. Questo grupo el ga nome “Goghe dela tera de Magoghe”. Ma Dio el ndarà proteger i so adoradori e lori no i sarà destruti. — Ezechiel 38:1, 2, 9-12, 18-23.

•   Le persone le sarà giulgade. Gesù el ndarà giulgar tuti quei che i ze de star nela Tera e el ‘ndarà spartirli in due grupi, come el pastor el spartisse le piégore dele cavre’. (Mateo 25:31-33) Le persone le sarà giulgade de acordo cola maniera che le ga tratà i “fradei” de Gesù, o sia, quei che i va governar insieme de lu nel cielo. — Mateo 25:34-46.

•   Quei che i ndarà governar i sarà metesti insieme. Quei che i ze stati scoliesti par governar con Gesù e che i ze stati fedeli fin la so morte i ndarà esser ressussitadi par viver in cielo. — Mateo 24:31; 1 Corinti 15:50-53; 1 Tessalonissensi 4:15-17.

•   Armagedon. La “guera del grando giorno de Dio, el Tuto Poderoso” la ze cognossesta anca come el “giorno de Geovà”. (Apocalisse 16:14, 16; Isaia 13:9; 2 Piero 3:12) Gesù el ndarà finir fora con tuti i nemighi de Dio. (Sofonia 1:18; 2 Tessalonissensi 1:6-10) Lu el ndarà destruser anca la polìtica in tuto el mondo, che nela Bìblia la ze rapresentada par una bèstia cativa de sete teste. — Apocalisse 19:19-21.

 Cossa che sucederà dopo dela granda tribolassion?

•   Sàtana e i so demoni i sarà metesti in preson. Un àngelo tanto poderoso el ndarà meterli “nel abismo”. (Apocalisse 20:1-3) Alora, sarà come se i fusse morti. No i farà gnente de mal a nissuni. Sàtana no’l sarà bon de influensar le persone gnanca quel che sucede nel mondo. — Apocalisse 20:7.

•   Gesù el ndarà scominsiar a governar. Lu el va governar par mila ani e el farà robe maraveiose par le persone. (Apocalisse 5:9, 10; 20:4, 6) No savemo quante persone le seitarà a viver dopo dela “granda tribolassion”. La Bìblia la dise sol che sarà una “mùcia de gente”. Queste persone le ndarà veder el scomìnsio del governo de Gesù qua nela Tera. — Apocalisse 7:9, 14; Salmo 37:9-11.