Le Testimònie de Geovà le se sforsa de far le robe come che Gesù el ga insegnà e come che i so apòstoli i fea. In questo artìcolo ghen’è arquante robe che noantri credemo.

1.   Dio. Noantri adoremo el ùnico vero Dio, che el se ciama Geovà, el Creador tuto poderoso. (Salmo 83:18; Apocalisse 4:11) Lu l’è el Dio de Abraon, Mosè e Gesù. — Ésodo 3:6; 32:11; Gioani 20:17.

2.   Bìblia. La Bìblia la ze el messàgio de Dio par le persone. (Gioani 17:17; 2 Timòteo 3:16) Noantri credemo in quel che dise tuti i 66 libri dela Bìblia, che i ze nel “Vècio Testamento” e nel “Novo Testamento”. El Professor de studi religiosi Jason D. BeDuhn el ga dito che “tuto quel che le Testimònie de Geovà le crede e le pratica l’è baseà nela Bìblia, sensa dir una roba par nantra o proar dir vanti quel che la Bìblia la gavaria de dir.” a

    Noantri acetemo tuto quel che la Bìblia la dise, ma no catemo che tuto quel che l’è scrito l’è leteral. Noantri capimo che arquante parte dela Bìblia le ze state scrite de maniera simbòlica. — Apocalisse 1:1.

3.   Gesù. Noantri seghimo quel che Gesù Cristo el ga insegnà e el so esémpio. Noantri lo consideremo el nostro Salvador e el fiol de Dio. (Mateo 20:28; Ati 5:31) Par quela che noantri se ciamemo cristiani, o seghidori de Gesù. (Ati 11:26) Ma ghemo imparà nela Bìblia che Gesù no l’è mia la medèsima persona che el Dio tuto poderoso. Nela Bìblia no ghen’è la dotrina dela Trinità. — Gioani 14:28.

4.   El Regno de Dio. Questo regno l’è un governo nel cielo, e nò qualcossa rento el cuor. Questo governo el ciaparà el posto dei governi umani e el realisarà el propòsito de Dio par la Tera. (Daniel 2:44; Mateo 6:​9, 10) Questo el sucederà presto, parché le professie dela Bìblia le dise che noantri semo drio viver nei “ùltimi giorni.” — 2 Timòteo 3:​1-5; Mateo 24:3-14.

    El Rè del Regno de Dio l’è Gesù. Lu el ga scominsià a governar nel cielo nel ano 1914. — Apocalisse 11:15.

5.   Salvassion. Gràssie al sacrifìssio de risgate de Gesù, le persone le pol esser lìbere del pecato e dela morte. (Mateo 20:28; Ati 4:​12) Par gaver questo benefìssio le persone ghe ocore gaver fede in Gesù, cambiar la so vita e batesarse. (Mateo 28:19, 20; Gioani 3:16; Ati 3:​19, 20) La persona la dimostra che la ga fede par meso de quel che la fà. (Tiago 2:​24, 26) Ghemo la salvassion nò parché la meritemo noantri stessi, ma parché ghemo la “imèrita bontà de Dio”. — Gàlati 2:​16, 21.

6.   Cielo. Geovà Dio, Gesù Cristo e i àngeli fedeli i vive nel cielo. b (Salmo 103:19-​21; Ati 7:​55) Ghen’è anca un pìcolo nùmero de persone (144.000) che le ressussitarà e le ndarà a governar con Gesù nel so Regno. — Daniel 7:​27; 2 Timòteo 2:​12; Apocalisse 5:​9, 10; 14:​1, 3.

7.   Tera. Dio el ga creà la Tera parché le persone le pol viver lì par sempre. (Salmo 104:5; 115:16; Eclesiasti 1:4) Dio el benedirà tute le persone che le sarà obediente con salute perfeta e cola vita par sempre in un paradiso nela Tera. — Salmo 37:11, 34.

8.   Mal e sofrimento. El mal e el sofrimento nela Tera i ga scominsià quando un àngelo de Dio el se ga rebelà. (Gioani 8:44) Dopo de rebelarse, questo àngelo el ga ricevesto i nomi de “Sàtana” e “Diaol”. Lu el ga convistesto el primo omo e la prima dona a esser insieme in questa ribellion. Questo el ga portà brute consequense par i so dissendenti. (Génesi 3:​1-6; Romani 5:​12) Dio el permete el mal e el sofrimento par finir fora cole question morai che Sàtana el ga fato. Ma Dio no’l permeterà questo par sempre.

9.   Morte. La vita la finisse quando la persona la more. (Salmo 146:4; Eclesiasti 9:​5, 10) I morti no i sofre mia nte un inferno de fogo.

    Dio el ghe darà la vita nantra volta par meso dela ressuression. (Ati 24:15) Ma, quei che i sarà ressussitadi e che i se ricusa de obedir ale lege de Dio, i sarà destruti par sempre e mai pi i podarà viver nantra volta. — Apocalisse 20:14, 15.

10.   Fameia. Noantri femo quel che Dio el ga volesto par el matrimònio, o sia, la union intrà un omo e una dona. De acordo cola Bìblia, la imoralità sessual la ze la ùnica rason par divorsiarse. (Mateo 19:​4-9) Noantri semo sicuri che i consili dela Bìblia i ze i meio par gaver una fameia felice. — Efesi 5:⁠22–​6:1.

11.   Adorassion. Noantri no adoremo la crose o qualche altra imàgine. (Deuteronómio 4:​15-​19; 1 Gioani 5:​21) Vedi altre robe importanti dela nostra adorassion:

    •   Pregar a Geovà. — Filipensi 4:6.

    •   Leder e studiar la Bìblia. — Salmo 1:​1-3.

    •   Pensarghe sora quel che noantri imparemo nela Bìblia. — Salmo 77:12.

    •   Riunirse insieme par pregar, studiar la Bìblia, cantar, parlar sora la nostra fede e incoraiar i nostri fradei e altre persone. — Colossensi 3:​16; Ebrei 10:23-​25.

    •   Predicar le “bone notìssie del Regno.” — Mateo 24:14.

    •   Giutar quei che i passa par nessessità. — Tiago 2:​14-​17.

    •   Far e rangiar su i Saloni del Regno e altri posti doperadi par la nostra òpera de istrussion bìblica. — Salmo 127:1.

    •   Giutar quando che ghen’è desgràssie. — Ati 11:27-​30.

12.   Organisassion. Noantri semo organisadi in congregassion, cada una la ga un grupo de ansiani che le tende. I ansiani no i ze mia una classe del clero, e lori no i riceve un salàrio. (Mateo 10:8; 23:8) Noantri no paghemo el dìsimo, e no tolemo mia su limòsina nele nostre riunion. (2 Corinti 9:7) Se paga le spese par tute le atività par meso de donativi. Nissuni i sà chi che fà i donativi e gnanca quanto che i dà.

     El Corpo Governante l’è un pìcolo grupo de cristiani mauri che i laora nela nostra sede mondial. Lori i organisa le atività dele Testimònie de Geovà in tuto el mondo. — Mateo 24:45.

13.   Union. Noantri credemo le medèsime robe in tuto el mondo. (1 Corinti 1:​10) Noantri anca se sforsemo parché no ghen sìpia intrà de noantri difarense sossiai, economiche o de rassa. (Ati 10:34, 35; Tiago 2:4) Ma anca se credemo tuti compagno, noantri semo lìberi de far scòlie. Le Testimònie le fà dessision seghindo la so cossiensa ben trenada gràssie ala Bìblia. — Romani 14:​1-4; Ebrei 5:​14.

14.   Comportamento. Noantri se sforsemo par mostrar amor ai altri in tuto quel che femo. (Gioani 13:34, 35) Noantri se sforsemo de no far robe che disgusta Dio, come par esémpio doperar mal el sàngue fando trasfusion de sàngue. (Ati 15:28, 29; Gàlati 5:​19-​21) Noantri se sforsemo de esser in pace con tuti e no ndemo mia in guera. (Mateo 5:9; Isaia 2:4) Noantri ghemo rispeto par i governi e le lege, fin che lori no i ne dise de far qualcossa contra le lege de Dio. — Mateo 22:21; Ati 5:​29.

15.   Relassion coi altri. Gesù el ga comandà: “Ama i altri come che te ami te stesso.” Anca lu el ga dito che i seghidori de Cristo “no i fà parte del mondo.” (Mateo 22:39; Gioani 17:16) Alora, noantri se sforsemo de “far el ben a tuti,” ma no se metemo in una banda o in nantra nela polìtica e gnanca nela religion. (Gàlati 6:​10; 2 Corinti 6:​14) Ma ghemo rispeto dele scòlie che i altri i fà sora queste robe. — Romani 14:12.

 Se gavé altre domande sora cossa che le crede le Testimònie de Geovà, valtri podé leder altre informassion nel nostro site, ligar nte una dele nostre filiai, ndar in una riunion nel Salon del Regno pi darente, o parlar con una Testimònia de Geovà dela to region.