Son nassesto nela cità de Calgary, in Alberta, nel Canadà. Quando mi ero un tosatel, el me pupà e la me mama i se ga divorsià e mi e me mama semo ndati de star coi me noni. Lori i ne amea tanto e mi ero un tosatel tanto felice. Mi go bele ricordassion de quel tempo.

 Quando mi gavea sete ani la me vita la ze restada tanto difìcile. Me mama la se ga maridà nantra volta col me pupà, e noantri semo ndati de star in St. Louis, Missouri, nei Stati Unidi. Suito go capio che el me pupà l’era tanto tristo. Par esémpio, quando son rivà casa del me primo giorno dela scola, lu el ga savesto che i me coleghi i me gavea tratà mal e mi no me gavea difendesto. Lu l’è restà tanto cativo. E el me ga dato, de pi che i me coleghi, par quela quando mi gavea sol 7 ani go scominsià a brigar con altri tosatei.

 Me pupà e me mama i se disea su tuti i giorni, par quela la me mama la ze deventada una persona disgustada e che la se inrabiea con facilità. Quando mi gavea 11 ani go scominsià a bever e doperar droghe. Son deventà una persona violenta e che brighea con tuti. Quando go finio la scola, la violensa fea parte dela me vita.

 Quando mi gavea 18 ani, go scominsià a far parte dei Fusileri dela Marinha dei Stati Unidi. Lì mi go imparà a copar persone. Dopo de sinque ani, go assà el esèrsito par studiar psicologia parché mi volea laorar nel FBI (Departamento Federal de Investigações). Go scominsià a studiar nei Stati Unidi e dopo nel Canadà, ndove mi son ndato de star.

 Nela università, go perso del tuto la speransa nele persone. Me parea che lore sol le pensea in sì stesse, che no ghen’era gnente de bon nel mondo e che i problemi no i gavea solussion. Go assà de creder che le persone le podaria far el mondo restar meio.

 Mi no gavea gnanca un ogetivo nela vita, par quela go scominsià a bever tanto, doperar droghe e pensea sol in soldi e sesso. Tuto quel che mi pensea l’era in che festa mi ndaria e con che dona mi ndaria far sesso. Par via del me trenamento nel esèrsito, mi ero sempre drio brigar coi altri. Mi pensea che podea dessider quel che l’era giusto e quel che l’era sbalià, e ndea contra a qualche persona che mi catea che no la era drio esser giusta coi altri. In verità, mi son deventà schiavo dela violensa.

 Un giorno, mi e el me amigo èrino nela cantina dela me casa drio doperar droghe e pareciar macogna par vender. Lu el me ga domandà se mi credea in Dio e mi ghe go dito: “Se l’è Dio che el fà le persone sofrir no vui saver de lu!” Nel giorno dopo, che l’era el primo giorno del me novo laoro, un colega che l’era Testimònia de Geovà el me ga domandà: “Te cati che l’è Dio che el fà le persone sofrir?” Go catà strànio che lu el ga parlà del medèsimo assunto che un giorno vanti mi gavea parlà col me amigo. Par sei mesi noantri ghemo discoresto tanto, e lu el me ga mostrà la risposta dela Bìblia a tante domande che mi gavea, par quela go volesto saver de pi.

 In quel tempo mi ero de star cola me noiva e ela no la volea saver de quel che ero drio imparar. Nte una doménega, ghe go dito che mi gavea convidà le Testimònie de Geovà par vegner ala nostra casa par studiar la Bìblia insieme con noantri. Nel giorno dopo, quando son rivà del laoro go visto che la era ndata via e la gavea portà drio tute le robe che gaveino casa. Son ndato fora de casa e go tacà a piander. Alora, go pregà a Dio e go domandà el so aiuto. Questa l’è stà la prima volta che go doperà el nome de Dio, Geovà, in una orassion. — Salmo 83:18.

 Due giorni dopo, go scominsià a studiar la Bìblia con un casal de Testimònie de Geovà. Dopo che lori i ze ndati via, mi go seità leder el libro che èrino drio studiar, Poderá Viver Para Sempre no Paraíso na Terra e in quela medèsima note go finio de léderlo a. Quel che go imparà sora Geovà e el so Fiol, Gesù Cristo, ga movesto coi me sentimenti. Go visto che Geovà el sofre quando sofrimo e che lu el mostra amor. (Isaia 63:9) Una roba tanto spessial par mi l’è stà quando go imparà sora el amor che Dio el gavea par mi e sora el sacrifìssio che el so Fiol el gavea fato par mi. (1 Gioani 4:10) Go capio che Geovà el gavea bio passiensa con mi, “parché no’l vol che gnanca un el sìpia destruto, ma el vol che tuti i se ciame grami”. (2 Piero 3:9) Go sentio che Geovà el volea che mi rivesse pi darente de lu. — Gioani 6:44.

 In quela medèsima stimana go scominsià a ndar ale riunion. Mi gavea i cavei longhi, doperea recini, e quando le persone le me vedea le se spaurea. Ancora cossita, le Testimònie de Geovà le me ga tratà come se mi fusse una persona dela so fameia che no i vedea a tanto tempo. Lore le ga mostrà che le era pròpio servi de Dio. Mi me go sentio come se fusse tornà ala casa dei me noni, sol che l’era ancora pi bel.

 Quel che mi ero drio imparar dela Bìblia ga scominsià a cambiar la me vita. Me go taià i cavei, me go fermà de bever, de far imoralità e de doperar droghe. (1 Corinti 6:9, 10; 11:14) Mi volea contentar a Geovà, par quela, quando imparea che una roba che mi fea la era sbaliada, mi no catea fora scuse. Invesse, restea disgustà con mi e pensea: “No posso pi far queste robe”. Alora, suito fea sforso par cambiar la me maniera de pensar e far le robe. Suito go visto che la me vita la ze restada meio quando go fato quel che Geovà el volea. Nel giorno 29 de lùlio de 1989, sei mesi dopo che go scominsià a studiar la Bìblia, me go batesà come una Testimònia de Geovà.

 La Bìblia la me ga giutà a cambiar la me personalità. Tempo indrio, mi ero una persona violenta quando qualchedun me inrabiea o me sfidea. Ma adesso, me sforso par ‘esser in pace con tuti’. (Romani 12:18) L’è stà Geovà che me ga giutà a cambiar par meso dela so Parola e del so spìrito santo. — Gàlati 5:22, 23; Ebrei 4:12.

 Adesso, invesse de doperar droghe, esser violento e far imoralità, mi me sforso par contentar a Geovà e far el me meio par lu. Questo anca vol dir giutar i altri a cognósserlo. Ani dopo del me batésimo, go cambià par nantro paese ndove i gavea bisogno de aiuto nela predicassion. Go bio la alegria de insegnar tante persone e de veder come che la Bìblia la ga cambià la so vita par meio. Anca, son tanto contento parché la me mama la ze deventada una Testimònia de Geovà. E una roba che l’è stà de aiuto par ela l’è stà veder i cambiamenti che go fato nela me vita.

 In 1999, nela cità de El Salvador, go fato la Scola par Vangelisadori del Regno. Lì go ricevesto trenamento par giutar nela predicassion e par insegnar e tender dela congregassion. Dopo, in quel medèsimo ano me go maridà cola me cara dona, Eugenia. Noantri laoremo insieme come pionieri nela Guatemala.

 Ancoi, invesse de no gaver gnanca una speransa, mi son tanto, ma tanto contento. Far quel che la Bìblia la dise me ga giutà a fermarme de far imoralità sessual e de esser violento. Adesso go una vita con vero amor e pace.