Nel giorno 25 de setembre de 2024, el Supremo Tribunal Federal del Brasil el ga fato una dessision tanto importante. Questa dessision la difende el dirito del passiente de no acetar tratamenti con sangue e anca de scòlier un tratamento de salute sensa doperar sangue. El Tribunal anca el ga dessidio che el Ministèrio dela Salute el ga de far quel che ghe vol par che i passienti che no i vol gaver tratamenti col sangue par motivi religiosi o personai i possa gaver un tratamento mèdico sensa doperar sangue.

Questa dessision la ze stata fata par via de due casi de Testimònie de Geovà nel Brasil. Nel ano 2018, la sorela Malvina Silva no la gavea acetà de firmar un documento che assea i dotori doperar sangue nela so sirurgia del cuor. Cossita, el ospedal el ga canselà la so sirurgia. Malvina la ghe ga metesto quasi due ani par esser bona de ricever un tratamento che rispetesse le so dessision.

Nel ano 2014, el fradel Heli de Souza el ndea far una sirurgia. Ma el ospedal dela so cità no’l gavea i echipamenti par far la sirurgia sensa doperar sangue. Lu el gavea domandà se el podea far la sirurgia nte nantro ospedal che el fusse parecià e disposto par farla de acordo con quel che lu el credea. El sistema pùblico de salute no’l ga mia acetà, e Heli l’è ancora drio spetar la sirurgia. Tante Testimònie de Geovà nel Brasil le ga infrontà dificoltà compagne, e arquanti fin i ga ricevesto un tratamento con sangue che l’è stà fato contra la so volontà.

El giuis Luís Roberto Barroso, presidente del Tribunal, intanto che l’era drio presentar la dessision, el ga dito: “Una persona la ga el dirito de no acetar tratamento che dopera sangue par motivi de religion parché ghen’è prinsipi dela lege sora la dignità dele persone e sora la libertà de religion. Alora, sora el dirito dela vita e dela salute, [le Testimònie de Geovà] le ga el dirito de gaver tratamenti de salute sensa doperar sangue [e] le ga el dirito de no acetar tratamenti de salute col sangue par via dele so dessision personai.”

Con questa dessision, i tribunai de tuto el Brasil i ga de rispetar la dessision del passiente sora i so tratamenti de salute. Questa dessision la se someia a quel che altri Supremi Tribunai i ga dessidio in Austràlia, Canadà, Giapon, Àfrica del Sud e Stati Unidi. Nel 17 de setembre de 2024, la Granda Camara del Tribunal Europeo dei Diriti dele Persone la ga fato una dessision compagna. Par via de questa dessision, 46 paesi dela Europa i ga de rispetar la dessision del passiente.

Semo tanto contenti che el Supremo Tribunal Federal del Brasil el ga fato questa dessision de rispetar quel che le persone le crede e de rispetar el so dirito de far dessision sora tratamenti de salute.