Nel 2023, fà 100 ani che ghen’è una filial nel Brasil. Durante questi 100 ani, ghen’è stà cada volta de pi Testimònie de Geovà nel Brasil. Questo el mostra che Geovà l’è drio benedir el laoro.

Nel Brasil, el laoro de predicassion el ga scominsià poco vanti del ano 1900. In quela època, arquante persone le ga ricevesto par la prima volta la revista Torre de Vigia de Sião e Arauto da Presença de Cristo. Questa revista la ghe ga piasesto a cada volta de pi persone. Alora, nel marso del ano 1923, el fradel J. F. Rutherford el ga mandà el fradel George Young par scominsiar una filial, o sia, un scritòrio par tender e organisar el laoro de predicassion in quel paese.

El fradel Young el ga afità un pìcolo scritòrio nel cità del Rio de Janeiro. Cossita ga scominsià el laoro dela prima filial del Brasil, che anca la era la prima filial in tuta la Amèrica del Sud. Lu el ga anca organisà el laoro de tradussion dele publicassion par el brasilian e el ga contratà una gràfica local par stampar le publicassion.

Nel ano de 1925, el fradel Young l’è ndà ala Argentina par seitar el so laoro come missionàrio. Alora, el fradel John Rainbow l’è deventà superintendente dela pìcola filial del Brasil. Nel ano drio, la sede mondial dele Testimònie de Geovà nei Stati Unidi la ga mandà una màchina de stampar. Cossita, i fradei nel Brasil i ga podesto lori stessi stampar reviste e libreti.

Del ano 1945 avanti, missionari i ze stati mandadi dela Scola Bìblica de Gileade dela Tore de Vigia par giutar el laoro de predicassion nel Brasil. Geovà el ga benedio tanto quel che i ga fato. Par esémpio, nel ano de 1948, ghen’era 1.000 predicadori. Ma solche 20 ani dopo, ghen’era 50.000. Nei ùltimi tre ani, de pi de 65.000 persone le se ga batesade, o sia, de pi de 21.000 par ano. E ancoi, ghen’è intorno de 900.000 predicadori che i predica le bone notìssie nel paese. Ghen’è cada volta de pi predicadori, alora diverse volte el Betel del Brasil el ga bio de esser fato pi grando e pi novo. Nel ano 1980, la filial la ze stata cambiada par la cità de Cesário Lange, che la resta intorno de 150 chilòmetri de São Paulo. De là in qua, i predi de Betel in Cesário Lange i ze stati fati pi grandi par tre volte. Ancoi, ghen’è de pi de 1.200 fradei e sorele che i laora là.

Restemo contenti de veder come Geovà el ga benedio el laoro de predicassion nel Brasil par de pi de 100 ani. — 1 Corinti 3:7.