Silempwale ni Luka 11:1-54
11 Ekwaha emoha, Yesu aari nipuro nimoha avekelaka, amalihakaru, mutthareli awe mmoha aamweerela: “Apwiya, munixuttihe ovekela, ntoko hiihaale Yohani aaxuttinhaawe atthareli awe.”
2 Yesu aaweerela: “Ikwaha sootheene muneeraanyu nvekeleke, mweereke ha: ‘Tiithi muri wiirimu, nsina nanyu ntteelihiwe. Omwene anyu owe.
3 Munivahe yootxa ya nihiku ti nihiku, moovarihana ni sootthuna sahu sa vanihikuni.
4 Ni munlevelele soottheka sahu, woona weera hiyo-tho ninnaalevelela ale ennitthekela; ni muhinihiye mooweereriwani.’”
5 Vano owo aaweerela: “Muupuwele weera mmoha a nyuwo, ookhalano nthamwene awe, anarowa omwaasa ohiyu eriyari eeraka: ‘Nthamwene, mukikophihe ipaawu tthaaru,
6 mwaha wooweera nthamwene aka mmoha ori va mukwahani oroophiya, ni miyo nkaanoono etthu yonvaha.’
7 Mene owo onnaakhula areene mpaani: ‘Muhikixupe veeli. Mulako woowaliwa ni anamwane aka enookona vamoha ni miyo, khonwereya miyo ovinya weera koovaheeni etthu.’
8 Kinnooleelani weera owo onoovinya ni ononvaha itthu sootheene onhaawelaawe. Khaiyene mwaha wookhala nthamwene awe, mene mwaha wa onyeserera wawe.
9 Tivanto, kinooleelakani weera: Mulipihereke oveka, muni nvahiwe; ni mwiilipihereke waasa, muni mphwanye; ni mwiilipihereke omana nsele, muni muhuleliwe.
10 Woona weera ootheene ale envekela, ennavahiwa; ni ootheene ale enaasa, ennaphwanya; ni ootheene ale emmana nsele, ennahuleliwa.
11 Vano, taani a nyuwo oneera mwanawe anvekela ehopa ananvaha enowa, ohiya ehopa?
12 Naari anvekela nootxe, ananvaha walisi?
13 Vanonto, waari weera nyuwo, atthu oowuumeene murima munnawera waavaha anamwane anyu itthu sooreera yavekela vale, otepaxa wene Atiithi anyu eri wiirimu, enimwaavaha munepa wootteela ale enaavekela!”
14 Vahoolo vaya, Yesu aahoomola munepa woonanara woohuuluma wanvanre mulopwana mmoha. Munepa woonanara omuhiyakaru mulopwana ole, owo aapatxera wuuluma. Ni muloko mutokotoko waatthu, waatikhiniheya vantxipale.
15 Mene atthu akina ohima yeera: “Owo onwera woomola minepa soonanara, mwaha wooweera onkhaviheriwa ni muhooleli a minepa soonanara, Belzebu.”*
16 Ni atthu akina ni yootthuna weera emweerere, yaapatxera onvekela ethoonyero ya wiirimu.
17 Asuwelaka muupuwelo aya, Yesu aaweerela: “Omwene wootheene onkawanyeya yooworu, onoonyaanyeya.
18 Vamoha-moharu, waari weera Satana-tho ookawanyeya yooworu, omwene awe waarowa olipa moota heeni? Nyuwosa ohima muneera, miyo kinwera woomola minepa soonanara mwaha wooweera kinkhaviheriwa ni Belzebu.*
19 Waari weera miyo kinwera woomola minepa soonanara kikhaviheriwaka ni Belzebu,* ankhanto anamwane anyu, enwera woomola ekhaviheriwaka ni ikuru heeni? Tivanto, anamwane anyu awo, eneeraaya yoothoriheni.
20 Mene, waari weera miyo kinoomola minepa soonanara moorweela mwa munepa wa Muluku, eyo enoonihera weera Omwene wa Muluku, wohoophwanyani.
21 Vaavo mulopwana a ikuru, owanre ikaruma sa ekhotto, onwehereraawe empaawe, mireerelo sawe sinnakhala soovareleleya.
22 Mene, awa mulopwana okhanleno ikuru sintxipale ompwaha owo ni anwera, onoomwaakha ikaruma sawe sa ekhotto aaroromelaawe, avinyaka onookawanya mireerelo sawe omwankhaawe.
23 Ole ohikhanle ni miyo, onookivirikanyiha, ni ole ohinthukumanya ni miyo, onnamwaramwara.
24 “Emaara yeeyo munepa woonanara onkhumaaya wa mutthu, onnaasaasa nipuro noowuuma weera wiitthuuwe, mene waahiphwanya vale onneera: ‘Kinootthikela empa aka, weiwe kithammaakawo.’
25 Ni aphiya vale, onnaphwanya empa ele ekwesinweene ni erehererinweene.
26 Nto owo, onnarowa wiitthana minepa mikina seete soonanara ompwaha owo, ni savolowa vale, iyo sinnakhala mwemmo. Ni mukhalelo wa mutthu owo onnakhala wootepaxa oxupa opwaha woopatxerani.”
27 Yesu ariki ohima masu ala, aakhuwela muthiyana mmoha variyari va muloko wa atthu, eeraka: “Oohakalala muthiyana ooyanreni, ni mapele ewaamwinheni!”
28 Mene Yesu ohima enre: “Hooye, opwaha mwa yeeyo, oohakalala taale aniiwa masu a Muluku ni enavarela muteko!”
29 Nlelo muloko mutokotoko waatthu oriki othukumana, Yesu aapatxera ohima eeraka: “Atthu ala, atthu oonanara murima. Ennaasaasa ethoonyero, mene khiyaavo ethoonyero enkelaaya wooniheriwa, ehikhanle yeele ya Yona.
30 Mene, ntoko hiihaale Yona aaraawe ethoonyero ya atthu oninive, hiiho-tho, Mwaana a Mutthu, ethoonyero ya atthu ala.
31 Nihiku noothoriha, pwiya-mwene a ohitto anaavinye vamoha ni atthu ala, ni onimwaathoriha mwaha wooweera owo aakhumme elapo yoorakamela anawa wiiwa miruku sa Salomoni. Menento, kinnooleelani weera vaava ookhala mutthu ootthuneyaxa ompwaha Salomoni.
32 Atthu a oNinive enoovinyererihiwa vamoha ni atthu ala, ni enimwaathoriha mwaha wooweera awo yaattharuwa Yona aalaleerakaru. Vano kinnooleelani weera, vaava ookhala mutthu ootepa otthuneya ompwaha Yona.
33 Atthu yapattiha vale muthuko, kheniiyaathi nipuro noohooneya, naari vathi va muttanka, mene onheliwa vasulu, weera atthu ootheene envolowa mpaani yooneke waara.
34 Muthuko wa erutthu, niitho. Wakhala weera niitho nanyu ninnawehexexa itthu sooreera, erutthu anyu-tho enimweetta nnene;* mene wakhala weera niitho nanyu noosareya nrima,* erutthu anyu yootheene enrowa osareya epiphi.
35 Tivanto, mwiikosoope weera muthuko* muraanyuno ohikhale epiphi.
36 Menento, waari weera erutthu anyu yootheene ti yoowaara ehikhanleno eparte ekina ya epiphi, erutthu anyu yootheene, enimwaara, ntoko muthuko onoomwaleelani ni waara waya.”
37 Amalihakaru ohima etthu ela, nfarisi mmoha anvekela weera atxe vamoha owannyawe. Nto Yesu aarowa anakilaathi ahaamenleene emeesa.
38 Nto nfarisi ole, aatikhiniheya vantxipale aamonnaawe Yesu atxaaka ahinyanwe mmatatani.
39 Mene, Apwiya yaamweerela: “Nyuwosa afarisi, munrapiha ekoopho ni eparatho vaateru, mene mpuwa mwanyu moosareya ohikwaneya ni onanara murima.
40 Nyuwo alolo! Khamusuwenle weera ole opanke vaate, opanke-tho mpuwa?
41 Mwaapakeleke itthu sooreera* atthu oohaawa ni itthu siri vamurimani vanyu, nto itthu sootheene woohima sa nyuwo sinrowa okhala sooreera.
42 Mootakhaliwa nyuwo afarisi mwaha wooweera munnavaha epaarte ya naamuloko ya ortelawu,* aruuda, ni makukhu makina,* mene muhintthara exariya ni nsivelo na Muluku! Iya itthu muntthuneyaanyu weettela, mene muhihiyaka itthu ikina.
43 Mootakhaliwa nyuwo afarisi, mwaha wooweera woosivelani okilaathi mapuro oopatxera a musinakookani ni wuulumihiwa mapuro oowaattiwa.
44 Mootakhaliwa nyuwo, mwaha wooweera munlikana ni mahiye ehinooneya,* yaawo atthu enviraaya vasulu vaya ehisuwelaka!”
45 Vano mulopwana mmoha oosuwela Nlamulo, aamweerela: “Muhusiha, mwaahimaka itthu sene seiyo, munnaniveeha-tho hiyo.”
46 Vano, Yesu aaheera: “Mootakhaliwa nyuwo-tho, alipa oosuwela nnene Nlamulo, mwaha wooweera munnaakapattiha* atthu vanikhatani miritti soolemela, mene nyuwo khamuntthuna otannya naari ni ekatha emoha mano!
47 “Mootakhaliwa nyuwo, mwaha wooweera munteka mahiye a maprofeta yaawo makholo anyu ewiivalaaya!
48 Mweekhaikhai nyuwo anamoona a miteko sa makholo anyu, mene nnaamweera vareene hiiho, nyuwo munnaakhulela, mwaha wooweera awo aawiiva maprofeta, mene nyuwo munteka mahiye amaprofeta ene yaawo.
49 Waari mwaha ene yoowo miruku sa Muluku saahimmaaya-tho: “Kinimwaarumihela maprofeta, ni arummwa, ni enoowiiva ni waattharatthara akina a yaawo,
50 weera ephome ya maprofeta ootheene eyeehinwe ovinyera ephattuwelo ya elapo, ekhaleno mulattu* atthu ala,
51 ovinyera ephome ya Abeli, mpaka ephome ya Zakariya yoowo iivinwe variyari va altaari ni empa ya Muluku. Aani, kinnooleelani weera mulattu ene yoola ommwaamorela* atthu ala.
52 “Mootakhaliwa nyuwo alipa oosuwela nnene Nlamulo, mwaha wooweera moowaakha atthu ixaavi sa omusuwela Muluku, nyuwo khamunvolowa ni munnaakhoottihera atthu akina ovolowa!”
53 Yesu akhumakaru nipuro nne, alipa oolepa ni afarisi yaapatxera onvekela voohihiyerereya, ni omukoha makoho mantxipale,
54 emureyaka muraakho weera envare ni masu awe eeraawe uulume.
Footnotes
^ Nna nsina nikina na Satana.
^ Nna nsina nikina na Satana.
^ Nna nsina nikina na Satana.
^ Naari: “enimwaara.”
^ Ni eKeereku: “onanara murima”
^ Naari: “waara.”
^ Naari: “nvaheke soovaha sa mahala.” Nwehe masu oowiiwanyeihiwa.
^ Ortelawu ni aruuda, eri etthu emmela envariheliwa muteko ntoko: murette, naari weera yinkhelihiwe yootxa.
^ Naari: “mapontta.”
^ Naari: “ehihelinwe ethoonyero.”
^ Naari: “munnaateexiha.”
^ Naari: “enoowethiwa.”
^ Naari: “enoowethiwa.”