Silempwale ni Luka 12:1-59
-
Efaramenta ya afarisi (1-3)
-
Mmooveke Muluku, ohiya atthu (4-7)
-
Ohima weera ori vamoha ni Kristu (8-12)
-
Niphwanaphwaniho na mulipa amuhakhu oohikhala miruku (13-21)
-
Muhiye okhala ooxupeya (22-34)
-
Nikhola nikhaanini (32)
-
-
Okhala oowehaweha (35-40)
-
Kaporo oororomeleya ni oohiroromeleya (41-48)
-
Khaiyene murettele mene okawanyeya (49-53)
-
Otthuneya waya owehexaxa etempu (54-56)
-
Oreherera ohiiwanana (57-59)
12 Nto, waathukumana muloko mutokotoko waatthu, mpaka okwattulana mukina ni mukhwaawe, vano Yesu aapatxera wuuluma aahimaka toko atthareli awe, eeraka: “Mwiikosoope ni efaramenta ya afarisi, eyo tiiyo, wootha.
2 Mene khiyaavo etthu evithinwe nnene ehinrowa osuweliwa, ni khiyaavo esiiri eneera ehisuweliwe.
3 Nto itthu sootheene nyuwo munhimaanyu wiiphiini, sinimwiiwiwa vanlakani, ni itthu munaapaanyu mureene okwaartu sinoolaleiwa vasulu va empa.
4 Opwaha mwa yeeyo, miyo kinnooleelani nyuwo asinthamwene aka: Muhiwoove ale ekhanle oowiivani, avinyaka vaavo awo khenwera woopakelani etthu ekina nyuwo.
5 Mene kinoowooniherani ole mukhanlaanyu oomoova: mmooveke Ole okhanleno owera woowoovonyerani oGeheena* awiivani vale. Aani, kinnooleelani weera mmooveke owo.
6 Ephera khentumihiwa ni musurukhu vakhaaniini?* Mene naari emoha ya yeele khenttiwaliwa ni Muluku.
7 Menento mpaka maihi ootheene a mmuruni mwanyu, aakontariwa. Muhooveke; nyuwo tootthuneyaxa opwaha iphera sintxipale.
8 “Kinnooleelani weera: Mutthu ootheene onkela ohima vaatthuni weera ookisuwela, Mwaana a Mutthu-tho, onoohima ohoolo wa malaika a Muluku weera koomusuwela.
9 Mene ole onrowa okikhootta vaatthuni, onookhoottiwa ohoolo wa malaika a Muluku.
10 Ni ootheene ole anaamuulumele masu oonanara Mwaana a Mutthu anaaleveleliwe; mene ole anaaveehe munepa wa Muluku, khanleveleliwa.
11 Mwaroihiwa vale mapuro enthukumanaayavo atthu antxipale,* naari wa asitokweene a kuvernu ni anamalamulela, muhixupeye ni etthu munkelaanyu wuuluma naari moota munkelaanyu wiisaakiha, naari moota munkelaanyu ohima,
12 woona weera munepa wootteela, onimooleelani* etthu muntthuneyaanyu ohima etempu ene yeeyo.”
13 Moottharelana, mutthu aari variyari va muloko, aaheera: “Muhusiha, mmuleele munnaka weera akawane ni miyo yoohiyeriwaahu.”
14 Yesu aamwaakhula: “Mulopwana, taani okithanlale okhala mphuki, naari okivanhe owera* wookawanya yoohiyeriwaanyu nyuwosa?”
15 Vano, Yesu aaweerela: “Muhule maitho ni musepe mukhalelo wootheene wa ohikwaneya, mwaha wooweera nnaamweera mutthu areeneno itthu sintxipale, ekumi awe khenkhuma mwaha wa itthu iyo oraaweno.”
16 Nto Yesu, aahaaleela niphwanaphwaniho nimoha, eeraka: “Mulopwana mmoha a muhakhu aaruwera vantxipale.
17 Tivawonto, owo aapatxera wuupuwelela vamurimani vawe eeraka: ‘Vano kihikhanlaakano nipuro noowiiyaathi eyootxa, kinkela opaka eheeni?’
18 Ni aaheera: ‘Kinoophwata ikhokhwe* saka ni kinkela opaka ikhokhwe* ikina itokotoko, ti mwemmo kinkelaaka wiiyaathi sootxa saka ni mireerelo saka sootheene;
19 avinyaka kinimwiiseerela muneenaaka: “Nyuwo mookhalano mihakhu sintxipale siiyaathinwe seiyo sinaaphiyere iyaakha sintxipale. Vanonto, mwiitthuuweke, mutxeeke, nwureke, ni mpuheke.’”
20 Mene Muluku aamweerela: ‘Mulolo, ohiyu ene yoola munimookhwa. Taani onkela ohalano itthu iya mwiithukumanyenraanyu?’
21 Eyo etthu eneereya ni mutthu oniithukumanyera mihakhu, mene vamaithoni va Muluku, owo khahiyono namuhakhu.”
22 Avinyaka, owo aahaaleela atthareli awe eeraka: “Tivanto miyo kinooleelaakani weera: Muhiye oxupeyaxa ni ekumi anyu, woohima sa eheeni munkelaanyu otxa, ni erutthu anyu, woohima sa soowara.
23 Ekumi ti yootepa otthuneya opwaha yootxa, ni erutthu opwaha soowara.
24 Mwaawehe anakhuku: awo khenaala naari khenhepha, ni khiyaanoono ntatha, naari ekhokwe; mene Muluku, onnaatxiha. Neereke nyuwo khamukhanle ootthuneya waapwaha apalame awo?
25 Taani a nyuwo onwera waatxeerera mahiku a ekumi awe mwaha wooxupeya?
26 Vanonto, mwaahiweraka opaka etthu ekhaaniini ntoko ela, mwaha wa heeni munxupeyaanyu ni itthu ikina iya?
27 Nkawehani moota ifuloore sa mmatta sinunnuwaaya: iyo khasinvara muteko naari khasintthava ikuwo; mene kinnooleelani weera naari Salomoni yoowo moovuwani mwawe mootheene khatonko owara ntoko ifuloore iya.
28 Vano, waari weera Muluku onnawariha ifuloore iya sinkhala mahiku vakhaaniini, avinyaka sinahisiwa, neereke khoovahani ikuwo nyuwo atthu a nroromelo vakhaani!
29 Tivawonto, muhiye oxupeya ni etthu munkelaanyu otxa naari owura, ni muhiye okhala ooxupeya vantxipale,
30 mwaha wooweera itthu sene ti seiya atthu a mulaponi enaasaasaaya, mene Atiithi anyu aasuwela weera munnahaawela itthu sene seiya.
31 Opwaha mwa yeeyo, nvirelele waasa Omwene awe, ni itthu ikina sene iya, munimwaatxeereriwa.
32 “Muhoove, nyuwo nikhola nikhaaniini, mwaha wooweera Atiithi anyu aasiveliwa woovahani Omwene.
33 Mutumihe itthu sanyu ni musurukhu ene mwaavahe alipa oohaawa.* Mwiipakele misako sa misurukhu sihinthaala, eyo tiiyo, mihakhu sa wiirimu sihimmala, weiwo anamwiiya ahimphiyaayawo, naari atthumpwiha ehintthumpwihaayawo.
34 Nto vaavo ori muhakhu anyu, tonrowaayavo okhala murimaanyu.
35 “Nware ikuwo sanyu ni mukhale oolikaneene weera nvare muteko, ni mithuko sanyu sikhale soopatteene,
36 mukhaleke ntoko arumeyi enanweherera pwiyaya otthika okasamentuni, weera pwiyaya awa vale, ni amana nsele, emuhulele moowaakuveya.
37 Oohakalala akaporo ale pwiyaya aawaaka vale aneera aaphwanye ewehawehaka! Kinnooleelani ekhaikhai weera: Owo onoowara ikuwo soovarela muteko ni onooweeriha okilaathi ni ohaamela emeesa ni waavaha yootxa.
38 Naari aphiyaka ohiyu,* naari ohiyu eriyari,* oohakalala ti yaale apwiya eneeraaya yaaphwanye yiireherenreene!
39 Mene musuwele weera mwaneene vaate aasuwenle ewoora namwiiya oneeraawe awe, khaakela omuhiya namwiiya avolowaka mpaani mwawe weera iiye.
40 Nto nyuwosa-tho, mukhale oolikaneene mwaha wooweera Mwaana a Mutthu onkela owa ewoora yeeyo nyuwo mwahaawehereraanyu.”
41 Nto Pedru aamukoha: “Apwiya, niphwanaphwaniho nna, munipakenle yoohiru naari atthu ootheene?”
42 Ni Apwiya yaaheera: “Taani ori kaporo oororomeleya* ni a miruku, yoowo othanlinwe ni apwiya weera aawehaweheke atthu* awe ootheene, weera aavaheke yootxa woohihiyerereya etempu yoophwanelela?
43 Oohakalala kaporo oneera aphwanyiwe ni apwiyawe apakaka eyo!
44 Kinnooleelani ekhaikhai weera: Pwiyawe onoomuthanla kaporo owo weera akosoope mihakhu sawe sootheene.
45 Mene wakhala weera kaporo owo oonanara murima onnuupuwela vamurimani vawe: ‘Apwiya ennapisa,’ ni anapatxera waamana arumeyi asilopwana ni asithiyana, antxa, owura ni ohapaliwa vamoha ni anamuhapaliwa,
46 pwiya a kaporo owo, onkela owa nihiku ahaawehereraawe ni ewoora kaporo owo ohisuwenlaawe, ni onoorowa omuttaruxa kaporo owo vantxipale ni onvonyera nipuro naatthu oohiroromeleya.
47 Vano, kaporo ole iiwexenxe yootthuna yaapwiyawe, mene ahikhala oolikaneene naari ahipaka ele aavekelinwaawe, onoomaniwa vantxipale.
48 Mene kaporo ole ahiiwexenxe yootthuna yaapwiyawe, ni apaka itthu simphwanela ottaruxiwa onkela omaniwa vakhaaniini. Tthiri, ole ovahinwe sintxipale, onoovekeliwa sintxipale; ni ole ororomelinwe ni itthu sintxipale, onrowa otepa ovekeliwa itthu sintxipale.
49 “Miyo kaawenle opattiha mooro elapo ya vathi, ni etthu heeni kintthuneyaaka opaka koonaka weera mooro woopatta?
50 Mweekhaikhai, miyo kookhalano opatiso yoowo kintthuneyaaka opatisiwa, nto kiri ooriipiwa murima mpaka opatiso owo omala!
51 Munuupuwela weera kaawiihale murettele valaponi? Hooye! Opwaha mwa yeeyo, kiwiihale ohiiwanana.
52 Nto ovinyera viinaano vaava mpaka muhoolo, enookhala vaate vamoha atthu sinku enrowa okawanyeya mukina ni mukhwaawe: araru khenkela wiiwananaka ni eeli, ni eeli khenkela wiiwananaka ni araru.
53 Awo enookawanyeya, tiithi ni mwanawe mwaamulopwana, mwaana ni apapawe, maaye ni mwanawe mwaamuthiyana, mwaana mwaamuthiyana ni ameyawe, pwiyamwaana ni mwaara a mwanawe, muthiyana ootheliwa ni apwiyamwaana awe.”
54 Yesu aaheerela-tho muloko mutokotoko waatthu: “Moona nihutte nikhumaka onneela nsuwa, muneera weera: Eneerupe epula ni epheyo yintxipale, ni eyo enneereya.
55 Vano, yoopaka epheyo ekhumaka ohitto, nyuwo ohima muneera: ‘Onooviha,’ ni eyo enneereya.
56 Anamootha! Nyuwo munnawera otaphulela mikhalelo sa elapo ni erimu, vanonto, muhinwera hayi osuwela mukhalelo wa etempu ela?
57 Muhinsuwelela heeni itthu sa exariya muntthuneyaanyu opaka?
58 Mwa ntakihero, mwaakelaka wuuluma milattu ni ole muhiniiwananaanyuno, mwiilipihereke mphironi wuuluma mulattu owo nuuwo, weera ahooveleeleni wa mphuki, ni weera mphuki, ahooveleleni wa polisiya weera ootthukeeni okateya.
59 Kinnooleelani weera: Khamunkhuma iwo muhinaaye oliva musurukhu wootheene.”*
Footnotes
^ Ni eKereku: “misurukhu miili sa asaario.”
^ Apaale: “musinakookani.”
^ Naari: “onimooxuttihani.”
^ Naari: “edireito, nlamulo.”
^ Naari: “matatha.”
^ Naari: “matatha.”
^ Naari: “nvahe soovaha sa mahala. Nwehe masu oowiiwanyeihiwa.”
^ Okhuma 21 mpaka ohiyu eriyari.
^ Okhuma ohiyu eriyari mpaka ewoora ya 3.
^ Naari: “muhooleli oororomeleya avaate.”
^ Naari: “anamuteko avaate.”
^ Ni eKereku: “eleeptoni yoomalihera.”
