Silempwale ni Luka 13:1-35
-
Muttharuwe naari munkela onyaanyiwa (1-5)
-
Niphwanaphwaniho na mwiri wa efiiku ohiniimiha soowiima (6-9)
-
Muthiyana eetta uurammeene onnalamihiwa nihiku na esaabadu (10-17)
-
Niphwanaphwaniho na enuku ya emostarta ni ya efaramenta (18-21)
-
Onnatthuneya wiilipihera weera nivolowe mulako woophureya (22-30)
-
Herodi “khwatte” (31-33)
-
Yesu onnamukhupanyera Yerusalemu (34, 35)
13 Etempu ene yeele, yaakhalavo atthu akina yaawo yaamulenle Yesu woohima sa agalileya, yaawo Pilatu aatakansenraawe ephome aya ni mikuttho saya.
2 Yesu aawaakhula aweerelaka: “Munoona weera agalileya ala, tootepa ottheka waapwaha agalileya akina, mwaha wooweera eroohooxiwa itthu iya?
3 Kinnooleelani weera hooye; mene, mwaahirukunuxeru murima, ootheene nyuwo munkela wiiviwa* ntoko yaawo.
4 Naari woohima sa atthu 18 ale yaamorenle empa yoorakama ya oSilowe, ekhwa, munuupuwela weera awo yaari anamattheka waapwaha atthu ootheene enkhala oYerusalemu?
5 Kinnooleelani weera hooye; mene, mwaahirukunuxeru murima, ootheene nyuwo munrowa wiiviwa,* ntoko yaawo.”
6 Nto, Yesu aahima niphwanaphwaniho nna: “Mulopwana mmoha aaphatteñye mwiri wa efiiku emattaawe ya ewuuva, aarowa woona waari weera woohiimiha soowiima, menento khaaphwannye naari emoha mano.
7 Nto owo aamweerela mulopwana aakosoopa ematta ya ewuuva: ‘Sinnavira iyaakha tthaaru kiwaaka oweha mwiri ola waari weera wohiimiha soowiima, mene nkiphwannye naari yoowiima emoha. Muuhe! Mwaha wa heeni nneeraahu nihiye onanarihaka etthaya vasiiyoni vene?’
8 Mulopwana ole aahaakhula eeraka: ’Apwiya, muhiye eyaakha emoha paahi. Miyo kinoothipa muxerexere mwaya ni kinoohela etxaatxira;
9 menento wakhala weera muhoolo onimwiimiha soowiima, wooreeravo, mene waahiimihe, pooti othikila.’”
10 Yesu eera axuttihaka musinakookani esaabadu.
11 Mene musinakookani mmwe, aakhala muthiyana mmoha aavarinwe ni munepa woonanara mpuwa mwa iyaakha 18; nto muthiyana owo, eetta uurammeene* ni khaaweraru weetta ookonweene.
12 Yesu amoonakaru muthiyana ole, aahuulumano amweerelaka: “Muthiyana, moolamihiwa eretta anyu.”
13 Yesu aamwiiyaathera matata muthiyana ole, ni moowaakuveya, owo aahookowa ni aapatxera onvuwiha Muluku.
14 Nto mwaha wa yeeyo, mutokweene a esinakooka aatikhiniheya mwaha wa Yesu olamiha eretta esaabadu, ni aaheerela muloko mutokotoko waatthu: “Eri mahiku 6 paahi ontthuneyaaya ovariwa muteko, nto nweeke mahiku ene yaala weera mulamihiwe, khaiyene nihiku na esaabadu.”
15 Mene Apwiya yaamwaakhula yeeraka: “Anamootha! Neereke nyuwo khamuntaphula emompe, naari epuuru anyu, munarowa owuriha maahi nihiku na esaabadu?
16 Neereke muthiyana ola ori mwaana a Abrahamu, yoowo aavarinwe ni Satana mpuwa mwa iyaakha 18, khaaphwanela olamihiwa nihiku na esaabadu?”
17 Yesu uulumakaru masu ala, amwiittani awe ootheene yaahuulihiheya muru, mene muloko mutokotoko waatthu, waahakalala ni itthu sootheene sonvuwiha Muluku aapakaawe.
18 Mene Yesu aahaatxeerera eeraka: “Omwene wa Muluku, onlikana ni eheeni, ni kinkela olikanxera ni eheeni?
19 Onoolikana ni enuku ekhaanini ya emostarta, mwaneene ematta okunxaawe aala mmatta* mwawe; mwiri owo waahunnuwa onakhala mutokotoko ni apalame a wiirimu yaahoowa enapaka ipuru saya mutamphini mwaya.”
20 Ni aaheera-tho: “Kinkela olikanxera ni heeni Omwene wa Muluku?
21 Owo onoolikana ni efaramenta muthiyana okunxaawe anatakansera ni miphimo* miraru sa ephepa, vano ephepa eyo, yaanyaruwa yootheene.”
22 Owo anneetteetta esidade ni esidade, muttetthe ni muttetthe, axuttihaka ni eettaka arowaka oYerusalemu.
23 Vano, mulopwana mmoha aamukoha eeraka: “Apwiya, neereke eri atthu vakhaaniini eneera evuluxiwe?” Owaakhula enre:
24 “Mwiilipihereke ovolowa mulako woophureya, mwaha wooweera atthu antxipale animweerera, mene khewera.
25 Mwaneene vaate avinya ni awala mulako, nyuwosa mureene vaate, nyuwo munoomana mulako mweeraka: ‘Apwiya, munihulele’; mene owo onoowaakhulani eeraka: ‘Nkisuwenle munkhumaanyuwo.’
26 Vano nyuwo munoopatxera ohima mweeraka: ’Naatxa ni naawura ohoolo wanyu, ni apwiya nyuwo, mwannanixuttiha iphiro itokweene sa mmuttettheni mwahu.’
27 Mene owo onooweerelani: ‘Nkisuwenle munkhumaanyuwo. Mukipwaherevo va, nyuwo mumpaka itthu soonanara!’
28 Ni ti weiwo munrowaanyu winla ni okhuuriha maino anyu, mwamoona vale Abrahamu, Isakhi, Yakobe ni maprofeta ootheene Moomweneni mwa Muluku, mene nyuwo nvonyerinweene vaate.
29 Opwaha mwa yeeyo, enaawe atthu enweela ninkhuma nsuwa ni ninkela nsuwa, a ota ni a ohitto, eneekilaathi vameesa Moomweneni wa Muluku.
30 Mwiiwe: Aakhala eri oomalihera eneera ekhale oopatxera, ni aakhala eri oopatxera eneera ekhale oomalihera.”
31 Etempu ene yeele, afarisi akina yaamwaattamela ni yaamweerela: “Nvinye ni mukhume nipuro nna, mwaha wooweera Herodi ontthuna owiivani.”
32 Owo owaakhula enre: “Murowe mwamuleele khwatte owo, weera: ‘Kinwoomola mademoniyu,* ni waalamiha atthu, olelo ni omaalo, ni nihiku nanaararu, kinoomaliha.’
33 Mene kintthuneya ovirelela opaka eyo olelo, omaalo ni omurotto, mwaha wooweera khavanwereya* profeta okhwa nipuro nikina ohikhanle oYerusalemu.
34 Yerusalemu, Yerusalemu, nyuwo munwiiva maprofeta ni munaavonya maluku yaale munrumiheliwa anyu . . . Ikwaha ikavi miyo kitthunnaaka waakhupaarela anamwane anyu, ntoko hiihaale mwalakhu naamukuttu onaakhupaarelaawe axaana awe vathi va mapupha awe! Mene nyuwo khamutthunne.
35 Vano, Muluku anaahiye empaanyu.* Kinnooleelani ekhaikhai weera: Khamunrowa okoona miyo mpaka etempu muneeraanyu mweere: ‘Ooreeriwa ti yoole onwa mwa nsina na Yehova!’”
Footnotes
^ Naari: “onyaanyiwa, opakeliwa.”
^ Naari: “onyaanyiwa.”
^ Naari: “akupammeene.”
^ Naari: “nwoorthani.”
^ Ni eKereku: “iseeya tthaaru.” Eseeya emoha yaakhala iliituru 7,33.
^ Naari: “minepa soonanara.”
^ Naari: “khonaakhuleliwa.”
^ Naari: “empaanyu enookhala mathala.”
