Silempwale ni Luka 14:1-35
14 Emaara ekina, Yesu aarowa otxa owannyawe mutokweene mmoha aafarisi nihiku na esaabadu, ni atthu yaari vale yannanwehexexa.
2 Ohoolo wawe aakhala mulopwana aarino eretta yoowiipelelana.*
3 Nto mwaha wa yeeyo, Yesu aahaakoha alipa oosuwela nnene Nlamulo ni afarisi: “Onnaakhuleliwa omulamiha mutthu nihiku na esaabadu naari hooye?”
4 Mene awo khayaamwaakhunle etthu. Vano, owo aamutava mulopwana ole, anamulamiha ni aamuruma opwaha.
5 Vano Yesu aahaakoha: “Taani a nyuwo aneera mwanawe naari emompe awe yamorela mpoosu nihiku na esaabadu ahinakumiha moowaakuveya?”
6 Ni awo khayaawenre omwaakhula.
7 Moottharelana, etempu Yesu onnaawe weera atthu oowompwa yaathanla okilaathela mapuro oottittimiheya, owo aahaaleela niphwanaphwaniho nimoha eeraka:
8 “Mutthu oowopani vale efeesta ya ekasamentu, muhikilaatheleke nipuro noottittimiheyaxa. Mwaha wooweera apaale mutthu ori oottittimihiwaxa woopwahani nyuwo, oowompwa.
9 Vano, ole oowompeni nyuwo ooweeli, onimoowa ni onooweerelani: ‘Nipuro nna mmuhiyere mulopwana ola.’ Vano, nyuwo oowuulihiheyeene muru munoorowa okilaathi nipuro noomalihera.
10 Vanonto, mwawompwa vale, mukilaathiki nipuro noomalihera, weera ole oowompeni awa vale, aweereleni: ‘Nthamwene, nwe mukilaathi nipuro nna noottittimiheya.’ Vano, nyuwo munoottittimiheya ohoolo wa atthu ootheene ewompwale.
11 Mwaha wooweera ootheene ole oniisunnuwiha, onkela oyevihiwa, ni ole oniiyeviha onkela wunnuwihiwa.”
12 Woottharelana, Yesu aamweerela mulopwana ole anwompe: “Mwareherera yootxa ya othana naari ya ohiyu, muhaawopeke asinthamwene anyu, asinninyu, amusi anyu, naari mavisiinyu anyu amuhakhu. Mwaha wooweera awo-tho animoowopani, iwo waarowa okhala otxentxihana.*
13 Vano, mwareherera efeesta, mwaawopeke atthu oohaawa, ootuthunya, oorakala, oohoona;
14 ni nyuwo munoohakalala, mwaha wooweera awo khiyaano etthu yoowootthikiherani. Mene munrowa otthuveliwa woovinyererihiwani wa anaxariya.”
15 Moowiiwa itthu iya, mmoha aari vale aatthu ale oowompwa aamweerela: “Oohakalala tuule ontxa* Moomweneni mwa Muluku.”
16 Yesu aamweerela: “Mulopwana mmoha aahaawopa atthu antxipale ofeestani wawe etokweene.
17 Ephiyakaru ewoora yootxa efeesta, aamuruma kaporo awe, oweerela ha alipa oowompwa: ‘Nweeke, woona weera itthu sootheene soolikana.’
18 Mene ootheene, yaapatxera waasa mathowa weera ehiwe ofeestani. Oopatxera enre: ‘Kiroothuma ematta aka ni va kintthuneya weera kirowe koone. Mukilevelele, nkinwa.’
19 Ni mukina aaheera: ‘Kiroothuma imompe saka 10 soolimano, vanonto keera keerere. Mukilevelele, nkinwa.
20 Ni mukina aaheera: ‘Kithenle viinaano vaava, nto mwaha wa yeeyo, nkinwa.’
21 Vano, kaporo ole aatthika ni aahaaleela apwiyawe itthu sootheene iye. Vano mwaneene vaate aanyoonyiwa vantxipale, aamweerela kaporo awe: ‘Murowe moowaakuveya misewe mitokweene ni miphiro mikhaanini sa esidade, ni mwaawiihe va alipa oohaawa, ootuthunya, oohoona ni oorakala.’
22 Muhoolo mwaya, kaporo aaheera: ‘Apwiya, koopaka etthu mwaakirummaanyu, menento ninlelo aahala mapuro.’
23 Apwiya awe yaamweerela: ‘Murowe misewe ni miphiro siri okhwipi wa esidade, ni mwaanyeserere atthu owa weera empaaka esariwe.
24 Miyo kinnooleelani weera: Khaavo aasilopwana ale yaapatxenre owompwa aneera atxe efeesta aka.’”
25 Muloko mutokotoko waatthu, wanneetta ni yoowo, ni owo aarukunuwa aneerela:
26 “Ole onwa wa miyo ohinawiitta* apapawe, ameyawe, amwaariye, anamwane awe, asinnawe, asirokora awe, aani mpaka ekumi awe, khamphwanela okhala mutthareli aka.
27 Ole ohinteexa mwiri awe wa nihaaxero* ni ahinakitthara, khaphwanenle okhala mutthareli aka.
28 Mwa ntakihero, taani a nyuwo aneera atthunaka oteka empaawe yoorakama, ahinakilaathi toko anapakela ikontha weera oone waari weera musurukhu oraaweno onoophiyera omalihera?
29 Aaheera hiiho, owo onoomuthipela alserse, menento khawera ommaliha, ni atthu ootheene enweha eneereke opatxera omutheya,
30 yeeraka: ‘Mulopwana ola opatxenre oteka, menento khawenre omaliha.’
31 Naari mwene heeni, aneera atthunaka okela owana ekhotto ni mwene mukina, ahinakilaathi toko weera oone waari weera onoowera onwina* mwene mukina orino anakhotto 20.000 owo areeneno 10.000?
32 Mweekhaikhai, oona weera khanwera, owo onnaaruma anamutthenka awe weera yapake nivarihano na murettele, nlelo mwene mukina areene ottayi wene.
33 Emoha-moharu, muroromeleke weera khaavo a nyuwo aneera awere okhala mutthareli aka, aahihiya ottuli mireerelo sawe sootheene.
34 “Mweekhaikhai, maakha toosiva. Vanonto, maakha yayeleela osivawaya, enkela otthikihera hayi osiva waya?
35 Khenvareleya-tho muteko, naari vatthayani nakhala opaka etxaatxira.* Atthu envonyera osalani.* Ale eri ni maaru oowiiwa, yiiweke.”
Footnotes
^ Naari: “epuulu.”
^ Naari: “wootthikiherani.”
^ Ni eKereku: “Ontxa epaawu.”
^ Naari: “ahaasivelaka vakhaaniini.”
^ Naari: “onwera.”
^ Naari: “estruume.”
^ Naari: “nipuro ninriheliwa ikokhola.”
