Silempwale ni Luka 15:1-32
15 Anamaliviha ootheene a mpostu* ni anamattheka, yannathukumana emurukureraka Yesu weera emwiiwe.
2 Ni afarisi ni alipa oolepa yannaapa yeeraka: “Mulopwana ola onnawaakhela anamattheka ni onnatxa naawo.”
3 Vano Yesu, aahaaleela niphwanaphwaniho nna:
4 “Mulopwana heeni a nyuwo oneera akhalanneene iputtiputthi 100, nto emoha emuriheya, khahiya iye 99 onikareni anarowa waasa ele eriheñye mpaka ophwanya?
5 Ni aphwanya vale, onnahela mmakhatani ni onnahakalala.
6 Ni aphiya vale owaani, onnaathukumanya asinthamwene awe ni mavisiinyu awe ni onnaweerela: ‘Muhakalale murima ni miyo, mwaha wooweera koophwanya eputtiputthi ele yaariheñye.’
7 Vamoha-moharu, kinnooleelani weera wiirimu onoohakalaliwa mwaha wa namattheka mmoha ottharunwe, ohiya mwaha wa anaxariya 99 ehintthuneya ottharuwa.
8 “Naari, muthiyana heeni oneera areeneno idrakima 10 ni emuriheya emoha, ahimpattiha muthuko, anakwesa mpaani anaasaasa nnene sene mpaka opwanya?
9 Ni aphwanya vale, owo onnaathukumanya asinthamwene awe ni mavisiinyu awe, ni onnaweerela: ‘Muhakalale murima ni miyo, mwaha wooweera koophwanya edrakima ele yaakiriheñye.’
10 Vamoha-moharu, kinnooleelani weera malaika a Muluku anoohakalala vantxipale mwaha wa namattheka onttharuwa.”
11 Woottharelana, Yesu aaheera: “ Mulopwana mmoha aakhalano anamwane eeli asilopwana.
12 Ni mwana mwaamukhaani aaweerela apapawe: ‘Paapa, mukivahe eparte ya mireerelo muneeraanyu mukihiyere.’ Vano tiithi ole, aahaakawelasa yoohiyeriwaaya.
13 Evirakaru mahiku vakhaaniini, mwaana ole mwaamukhaani aathukumanya mireerelo sawe sootheene ni aapwaha arooka elapo yoorakamela. Aphiyakaru wu, aananariha mireerelo sawe sootheene akhalanaka ekumi yoohireera.
14 Amalihakaru itthu sootheene aaraaweno, yaakhala etala elapo yootheene ele, ni aapatxera ohaawela itthu.
15 Owo mpaka aahaasa muteko wa mulopwana mmoha a elapo ele, yoowo aamuruminhe orowa imatta sawe weera atxiheke ikuluwe sawe.
16 Ni owo annatthuna otxa yootxa ya ikuluwe, mene khaavo anvaha yootxa.
17 “Apatxerakaru wuupuwela nnene, aaheera: ‘Anamuteko akavi aapapaka arino yootxa* yintxipale, miyo nno kihaawaka etala?
18 Kinoopwaha ni kinootthikela owannyaya apapaka ni kinkela oweerela: “Paapa, koomutthekela Muluku a wiirimu ni nyuwo.
19 Vano miyo nkimphwanela-tho wiitthaniwa mwaninyu. Mukikosoopeke ntoko mmoha aanamuteko anyu.’”
20 Vano, aavinya ni aapwaha owannyaya apapawe. Nlelo areene ottayi wene, apapawe yaamoona ni yammorela ikharari; nto, yaatthimaka ni yaamukhupaarela ni yampexari voohihiyerereya.
21 Vano, mwaana ole aaheera: ‘Paapa, koomutthekela Muluku a wiirimu ni nyuwo. Vano, nkiphwanenle wiitthaniwa mwaninyu.’
22 Mene apapawe yaaweerela akaporo aya: ‘Moowaakuveya! Nwiihe mukwansu wootepa oreera munwarihe, ni mmuhele aneeli mmatatani mwawe ni isantaaliya mmanaanini.
23 Nwiihe-tho emompe exaana, mwiive weera nitxe ni nitthape,
24 mwaha wooweera mwanaka ola aahookhwa ni vano ootthikela okhala mukumi, ni aariheya ni vano oophwanyiwa.’ Ni yaapatxera otthapa.
25 “Mwaana mutokweene aari omatta, ni atthikaka, emaara aattamelaawe owaani, aahiiwa oruma wa itxipo ni wiiniwa.
26 Nto mwaha wa yeeyo, aamwiitthana murumeyi mmoha ni aamukoha woohima sa etthu heeni yeereya.
27 Vano owo, aamwaakhula: ‘Munninyu orootthika,* ni apapinyu, aamwiivela emompe exaana yooneneva, mwaha wooweera aamwaakhela areene ni ekumi yooreera.’*
28 Mene, owo aanyoonyiwa vantxipale ni aakhootta ovolowa. Vano, apapawe yaakhuma ni yaapatxera omutxonttela weera avolowe.
29 Owaakhula apapawe enre: ‘Miyo kohoovarelani muteko iyaakha sintxipale ntoko kaporo, ni nkinahiye otthara malamulo anyu. Mene nnaamweera vareene hiiho, nyuwo khamutonko okivaha naari epuri emoha mano, weera kitthape ni asinthamwene aka.
30 Vano, awaakaru mwaninyu ola, onanarinhe mireerelo sanyu araruwelaka,* moomwiivela emompe exaana yooneneva.’
31 Apapawe omwaakhula yenre: ‘Mwanaka, nyuwo ikwaha sootheene mwaari ni miyo, ni itthu sootheene siri sawaka ti sawinyu.
32 Mene hiyo nimmweera otthapa paahi ni ohakalala, mwaha wooweera munninyu aahookhwa ni vano ootthikela okhala mukumi, ni aariheya ni vano oophwanyiwa.’”
Footnotes
^ Naari: “musonkho.”
^ Naari: “epaawu.”
^ Naari: “oroophiya.”
^ Naari: “nnene.”
^ Naari: “naanamararuwa.”
