Silempwale ni Luka 17:1-37
17 Avenyaka, Yesu aaweerela atthareli awe: “Mene khavanwereya ohikhumelela mathowa eneera emutthekihe mutthu. Menento ootakhaliwa mutthu ole onimutthekiha!
2 Phataari mutthu owo aatthukelelinwe muxikoni mwawe nluku noolemela ni aavonyerinwe mphareya, ohikhanle omukwattuliha mmoha aasikhaani ala.
3 Mwiikosoope mwaneene anyu. Munninyu attheka vale mmonihere yoottheka awe, owo attharuwa vale mmulevelele.
4 Pooti owo ootthekenleeneni ikwaha seete vanihikuni avenyaka owo anawa wuuluma ni nyuwo ikwaha seete, eeraka: ‘Koottharuwa’, mmuleveleleke.”
5 Arummwa yaaweerela Apwiya: “Mwaatxeerere nroromelo nahu.”
6 Apwiya owaakhula yenre: “Waari weera mookhalano nroromelo ntoko enuku ya emostarta, mwaamweerela mwiri ola wa mampuresi: ‘Opheleye va, orowe wiiphatteye mphareya!’ Nto mwiri owo waamukela owiiwelelani.
7 Taani a nyuwo, aneera akhalanneene kaporo awe, areene omatta alimaka naari atxihaka imompe, aatthikaka omatta iwo anamweerela: ‘Mwaakuveke nwe mutxe vameesa va?’
8 Khaavo ompaka eyo, opwaha mwa yeeyo, owo onrowa omweerela, ’mutxentxe soowara sanyu ni mukaapeele yootxa ni muhiye yootxa eyo vameesa mpaka miyo kimalihe otxa ni owura, avinyaka vaavonto nyuwo pooti otxa ni owura.’
9 Neereke owo onimoonihera oxukurela mwaha wa kaporo opaka etthu aarummwalaawe’?
10 Vamoha-moharu, nyuwo-tho mwapaka itthu sootheene muthanlelinwaanyu, mweereke ha: ‘Hiyo naakaporo paahi, nipanke ele naatthuneyaahu opaka.
11 Arooka oYerusalemu, owo aavira oSamariya ni oGalileya.
12 Eeraka ophiyaru muttetthe mmoha , alopwana 10 yaawo yaarino makokho yaarowa okumana nuuwo, mene yeemenle ottayi wene.
13 Mene, yaakhuwela yeeraka: “Yesu, Muhusiha, munimorele ikharari!”
14 Yesu awoonakaru aaweerela: “Murowe ni mwiisooneihe wa anamakeya.” Vano awo yeeraka opwaha, yaalamihiwa.
15 Mmoha a yaale oonakaru weera oolamihiwa, aahokolowa anvuwihaka Muluku ni nsu nawe nootheene.
16 Ni aakokhora mmanaanini mwa Yesu uuramenleene vathi amuxukurelaka. Ni owo aari musamariya.
17 Yesu aakoha eeraka: “Keera alopwaana elamihinwe yaari 10? Vanonto akina ala 9 ari woowiini?
18 Khaavo a yaawo ohokolonwe weera anvuwihe Muluku, ahikhanle mulopwana ola a nloko nikina.
19 Avinyaka, Yesu aamweerela: “Mweemele ni murooke. Nroromelo nanyu nohoolamihani.”
20 Afarisi yaamukoha Yesu woohima sa liini Omwene wa Muluku weeraaya owe, ni owo aawaakhula: “Omwene wa Muluku, khonwa ntoko etthu enooneya,
21 nave atthu kheehimaka: ‘Nkoonani, ori va,’ naari ori vale! Menento musuweleke weera Omwene wa Muluku ori variyari vanyu.”
22 Woottharelana owo aaweerela atthareli: “Enoophiya mahiku nyuwo munrowaanyu owehereraka weera Mwaana a Mutthu akhale vamoha ni nyuwo, mene nyuwo khamunkela omoona.
23 Ni atthu enrowa oweerelani: ‘Nkamoonani, owo ori vale!’ naari: ‘Mmoone owo ori va!’ Muhikhume naari muhaatthare.
24 Hiihaale ntoko overunya ommwaleelaaya erimu okhumaka moono mukina orooka moono mukina, onkela weereya hiiho nihiku Mwaana a Mutthu onkelaawe owa.
25 Woopatxerani eheereñye eyo, owo ontthuneya ohaaxiwa itthu sintxipale, okhoottiwa ni ohaaxiwa ni atthu amahiku ala.
26 Opwaha mwa yeeyo, hiihaale ntoko yeereñyaaya mahiku a Nowa, hiiho-tho onaakhale owa wa Mwaana a Mutthu:
27 atthu yannatxa, yannawura ni alopwana yannathela ni athiyana yannathelihiwa, mpaka nihiku nene nenne Nowa aavolonwaawe munikulani mpaka ophiya epula ya mirupi yaakhumpe atthu ootheene.
28 Emoha-moharu, enkela weereya etthu yeereñye mahiku a Lothi: atthu yannatxa, yannawura, yannathuma, yannatumiha, yannaala ni yannateka.
29 Mene nihiku Lothi aakhummaawe oSodoma, waamora mooro wiirimu ni enxofre ni yaahaanyaanya atthu ootheene.
30 Ni enimweereya etthu emoha-moharu, nihiku Mwaana a Mutthu onkelaawe wiisoonihera.
31 Nihiku nene nenno, mutthu aneera akhale vasulu va empa, itthu sawe ahiñyeene mpaani, ahikhuruwele vathi weera akuxe itthu sawe, vamoha-moharu-tho, ole anaakhale omatta ahitthikele owaani weera akuxe itthu ahiñyaawe ottuli.
32 Nwuupuweleke amwaarawe Lothi.
33 Ole onaasaasa ovuluxa ekumi* awe onooyeleela, mene ole aneera ayeleele ekumi awe onoovuluxa.
34 Kinnooleelani weera: Ohiyu ene yoowo, atthu eeli ekonne ekaama emoha, mmoha onookuxiwa ni mukina onoohiiwa.
35 Asithiyana eeli enxila nxilo nimoha, mmoha onookuxiwa ni mukina onoohiiwa.”
36 * ——
37 Nto mwaha wa yeeyo yaamukoha yeeraka: “Apwiya woowiini?” Aawaakhula eeraka: “Vari murutthu, tanrowaayavo othukumana axaaka.”*
Footnotes
^ Eveersu ela ennapwanyeya mwa aBiblya akina. Mene khemphwanyaneya mwa soolempwa sa matata sintxipale sootthuneya sa eKereku.
^ Naari: “inaka naari amurumasi.”
