Silempwale ni Luka 18:1-43
18 Avenyaka, Yesu aahaaleela niphwanaphwaniho nimoha woohima sa otthuneya waya ovekela voohihiyerereya ni ohikhulumuwa,
2 eeraka: “Esidade emoha, aakhala mphuki ahaamoova Muluku, naari ahaamuttittimiha mutthu.
3 Esidade ene yeele, aakhala muthiyana mmoha naamukhweli, ni owo annarowa okumana ni mphuki ole amweerelaka: ‘Muulume mulattu aka ni mwiittani aka.’
4 Yaavira etempu mphuki ole amukhoottelaka, mene aahiiseerela muneene awe: ‘Miyo nkimmoova Muluku, ni nkimmuttittimiha naari mutthu mmoha mano,
5 mene, woona weera muthiyana ola naamukhweli onnakixupa, kinompakela exariya,* weera ahivireleleke okixupa ni yoovekelaawe mpaka miyo ohiwera onvilela.’”
6 Apwiya yaaheera: “Nkoonani ele mphuki opankaawe* nnaamweera areene oohixariya!
7 Mweekhaikhai, vano Muluku neereke khaakhavihera atthu awe oothanliwa yaawo aninvekela othana ni ohiyu, weera epakeliwe exariya, vaavo owo onaapixeraawe murima?
8 Kinnooleelani weera: Owo onimwaakhavihera moowaakuveya weera epakeliwe exariya. Vanonto, neereke Mwaana a Mutthu aawaaka onoophwanya nroromelo moota nna valaponi?”
9 Owo aahima niphwanaphwaniho nikina aahimaka atthu ale yiisoona okhala anaxariya ni yahaapwattha atthu akina.
10 “Alopwana eeli, yaarowa mutemplu ovekela: mmoha aari nfarisi mukina aari mulipa ooliviha mpostu.*
11 Nfarisi ole aapatxera ovekela vamurimani vawe eemenleene eeraka: ‘Khoo Muluku, miyo kinnooxukurelani mwaha wooweera nkikhanle ntoko atthu akinaawo, eri: anamwiiya, oohixariya, anamararuwa; naari nkikhanle ntoko mulipa ola ooliviha mpostu.*
12 Miyo kinnamutthuka ramasaani ikwaha piili va semanani, ni kinnavaha eparte ya naamuloko ya itthu sootheene kimphwanyaaka.’
13 Mene mulipa ole ooliviha mpostu,* eemenleene ottayi wene, khaatthunaru naari mano oweliha* maitho wiirimu, mene anniimana vakakasani eeraka: ‘Khoo Muluku, mukimorele ikharari miyo namattheka.’
14 Kinnooleelani weera: Mulopwana ola, ootthikela owannyawe areene naxariya ompwaha nfarisi ole. Mwaha wooweera ootheene ole onkela wiisunnuwiha onooyevihiwa, mene ole onkela wiiyeviha onimunnuwihiwa.”
15 Atthu-tho yannanwiihera anamwane oottuli weera aatave; mene atthareli awe yoonakaru eyo, yaapatxera waakhoottihera atthu.
16 Vanonto, Yesu aarumiha owiiheriwa anamwane oottuli, eeraka: “Mwaahiye anamwane eweeke wa miyo, ni muhaakhoottihere anamwane owa wa miyo, woona weera Omwene wa Muluku ti waatthu ale ankhala ntoko anamwane ala.
17 Kinnooleelani ekhaikhai weera: Ole ohinkela waakhela Omwene wa Muluku ntoko mwaana, ahiweherere weera onoovolowa Moomweneni mmo.”
18 Muhooleli mmoha aayuda aamukoha: “Muhusiha ooreera, etthu heeni kintthuneyaaka opaka weera kaphwanye ekumi yoohimala?”
19 Yesu, aamwaakhula: “Mwaha wa heeni munkiitthanaanyu Muhusiha ooreera? Khaavo ori ooreera, ahikhanle Muluku paahi.
20 Nyuwo moosuwela malamulo eneera: ‘Muhiraruwe, muhiive, muhiiye, muhimukhalele onamoona woowootha mukhwiinyu, mwaattittimihe apapinyu, ni ameyanyu.’”
21 Mulopwana ole aamweerela: “Miyo kinnakwanihera malamulo ootheene ala ovenyera enamwane aka.”
22 Yesu iiwakaru eyo, aamweerela: “Ennoohalelani etthu emoha: mwatumihe itthu sootheene muraanyuno ni musurukhu ene yoowo mwaavahe atthu oohaawa, mwapaka eyo, munookhalano muhakhu wiirimu; ni nwe mukhale mutthareli aka.”
23 Iiwakaru masu ala a Yesu, aariipiwa murima mwaha wooweera aari namuhakhu.
24 Yesu anweha owo ni aaheera: “Moota onkelaaya okhala wooxupa atthu arino musurukhu muntxipale ovolowa Moomweneni mwa Muluku!
25 Mweekhaikhai, ti wookhweya ekamelu ovolowa va mwiitheni va sinkano, ohiya namuhakhu ovolowa Moomweneni mwa Muluku.”
26 Atthu yiiwale masu ale, yaaheera: “Taani nto aneera avuluwe?”
27 Yesu aaheera: “Itthu siri soohiwereya vamaithoni va atthu, ti soowereya vamaithoni va Muluku.”
28 Mene Pedru, aaheera: “Nkawehani, noohiya itthu sootheene naaraahuno nnoottharani nyuwo.”
29 Yesu aaweerela: “Miyo kinnoororomelihani nyuwo weera: Khaavo ohiñye empa, amwaarawe, asinnawe, apapawe naari anamwane awe mwaha wa Omwene wa Muluku,
30 oneera ahaakhele itthu sintxipale etempu ela, muhoolo omamaliheroni wa itthu soonanara sa elapo ela,* ekumi yoohimala.”
31 Vano Yesu aawiitthana arummwa 12, anaaroiha nipuro noohikhala atthu ni aaweerela: “Mwiiwe, ninrowa oYerusalemu, ni itthu sootheene silempwale moorweela mwa maprofeta woohima sa Mwaana a Mutthu, sinookwaniheriwa.
32 Mwa ntakihero, awo enoomwinnyerera mmatatani mwa amalapo, ni awo enonveeha, onwaxula ni omusenyera.
33 Ni yanwaxula vale, anoorowa omwiiva, mene nihiku nanaararu, owo onoovinyererihiwa.”
34 Mene awo khayiiwexenxe etthu yaataphulelaaya masu ala, mwaha wooweera masu ala, yaahiipithihiwa wa yaawo, ni awo khayiiwexenxe ele yaahimmwa.
35 Emaara Yesu aattamelaawe oYerikho, mulipa oohoona mmoha aakilanthi muxerexere mwa musewe avekaka eximola.
36 Iiwaka ovira muloko mutokotoko waatthu, aakoha eheeni yeereya.
37 Yaamwaakhula yeeraka: “Yesu Munazareti onoovira!”
38 Nto mwaha wa yeeyo, owo aakhuwela eeraka: “Yesu, Mwaana a Davidi, mukimorele ikharari miyo!”
39 Mene atthu yaari ohoolo yaapatxera omuximwela emweerelaka mmaale, mene owo aamweera ovirelela okhuwela vantxipale eeraka: “Mwaana a Davidi, mukimorele ikharari miyo!”
40 Yesu aaheemela ni aaruma weera awiiheriwe mulopwana ole. Mulopwana ole amwaattamelakaru, Yesu aamukoha:
41 “Muntthuna weera koopakeleni eheeni?” Owo aahaakhula: “Apwiya, kintthuna weera maitho aka ehuleye.”
42 Vano Yesu aamweerela: “Mooneke. Nroromelo nanyu nohoolamihani.”
43 Ni owo aatthikela woona moowaakuveya ni aapatxera omutthara anvuwihaka Muluku. Vamoha-moharu, atthu ootheene yoonakaru eyo, yanvuwiha Muluku.
Footnotes
^ Naari: “kinimuuluma mulattu awe.”
^ Naari: “ohimmaawe.”
^ Naari: “musonkho.”
^ Naari: “musonkho.”
^ Naari: “musonkho.”
^ Naari: “owehiha, oweha.”
