Silempwale ni Luka 19:1-48
19 Vano Yesu aaphiya oYerikho ni aavira esidade.
2 Esidade ele, aakhala mulopwana mmoha iitthaniwa Zakeyo; owo aari mutokweene aanamaliviha mpostu* ni aari namuhakhu.
3 Owo eerera omoona taani aari Yesu, menento khaawera mwaha wa muloko mutokotoko wa atthu, ni owo aari ookhuveya.
4 Nto mwaha wa yeeyo, Zakeyo aatthimakela ohoolo anawela mmwirini wa efiiku weera amoone Yesu, woona weera Yesu aakela ovira mphiro ene yoole.
5 Vano, Yesu aphiyakaru nipuro nne, aaweha musulu ni aamweerela: “Zakeyo, mukhuruwe moowaakuveya, woona weera olelo kinrowa okhala owannyinyu.”
6 Mwa yeeyo, aakhuruwa anamwaakhelela Yesu moohakalala.
7 Atthu ootheene yaari vale yoonakaru eyo, yaapatxera waapa: “Owo okenle ophiyera vaate va namattheka.”
8 Vano, Zakeyo aaheemela aneera: “Nkawehani Apwiya, kinimwaavaha atthu oohaawa eriyari ya mihakhu saka, ni itthu kimwiiyenraaka mutthu, kinoomutthikihera ikwaha ixexe.”
9 Nto Yesu aamweerela: “Olelo, woophiya ovuluwa vaate va, mwaha wooweera ola-tho mwaana Abrahamu.
10 Mweekhaikhai, Mwaana a Mutthu, aawenle owaasaasa ni waavuluxa ale yaariheñye.”
11 Atthu nlelo yeeraka wiiwelela itthu iya, owo aahaaleela niphwanaphwaniho nikina, mwaha wooweera aahanle ophiya oYerusalemu, ni awosa yuupuwela weera Omwene wa Muluku, waakela owa etempu ene yeele.
12 Mwa yeeyo, Yesu aaweerela: “Mwaana a mwene aaheetta mukwaha woorakama arooka elapo ekina, weera akhale mwene ni otthika.
13 Awiitthanaka akaporo awe 10, aahaavaha imiina* 10, ni aaweerela: ‘Mmweetteke nakoso ni imiina iya mpaka miyo otthika.’
14 Mene atthu a elapo awe khayaamutthuna, ni yaarumiha ekhurupu yaanamitthenka ottuli wawe weera yahime: ‘Hiyo khanintthuna weera mulopwana ola akhale mwene ahu.’
15 “Akhalakaru mwene, owo aatthika ni aawiitthana akaporo ale aahiyenraawe musurukhu,* weera asuwele yaawinne kavi ni nakoso awo yaamweettaaya.
16 Vano kaporo oopatxera aaphiya aneera: ‘Apwiya, emiina anyu ele, koophwanyera imiina* ikina 10.’
17 Pwiyawe aamweerela: ‘Moopaka nnene kaporo ooreera murima! Woona weera moororomeleya ni itthu vakhaaniini, mulamuleleke isidade 10.’
18 Nto, aaphiya kaporo anaaveeli eeraka: ‘Apwiya, emiina* anyu ele koophwanyera imiina* 5 ikina.’
19 Pwiya aamweerela kaporo ole anaaveeli: ‘Nyuwo-tho, mulamuleleke isidade 5.’
20 Vano aaphiya mukina eeraka: ‘Apwiya, emiina* anyu ele ela, miyo kaaroottukutthera vakuwoni.
21 Mwaha wooweera kanwoovani, woona weera nyuwo mutthu ooxupa, munkumiha nipuro muhiiyaathalaanyu, ni munhepha etthu muhanlaanyu.’
22 Owo aamweerela: ‘Moovarihana ni masu anyu, miyo kinnoothorihani nyuwo kaporo oonanara murima. Ontthuna ohima weera weyo waasuwela weera miyo kamutthu ooxupa? Kinkumiha nipuro kihiiyanthaakavo ni kinhepha etthu kihanlaaka?
23 Vanonto, mwaha wa heeni mwahaaroihaanyu musurukhu aka* opanku, weera kaatthikaka kaakhele ni ixuuru?’
24 “Nto mwaha wa yeeyo, owo aaweerela atthu yaari vale: ‘Mmwaakhe emiina aka, munvahe ole orinono imiina* 10.’
25 Vano awo yaamwaakhula: ‘Apwiya, ola ookhalano imiina* 10!’
26 Owo aahaakhula: ‘Kinnooleelani weera ootheene ole okhanleno, onoovahiwa; mene ole ohikhanleno, mpaka yeeyo oraaweno onimwaakhiwa.
27 Opwaha mwa yeeyo, mwaawiihe va amwiittani aka, yaale yaakhootta weera kikhale mwene aya, ni nwiive ohoolo waka.’”
28 Ahimakaru itthu iya, Yesu aavirelela ekwaha awe arooka oYerusalemu.
29 Ni emaara aattamelaawe oBetefage ni oBetania mwaako wa Oliveira, Yesu aahaarumiha atthareli awe eeli,
30 ni aaweerela: “Murowe muttetthe ole onooneya, mwaphiya vale munomphwanya puuru mwaaxaana atthukelelinweene, yoowo ohitonko oweliwa ni mutthu. Mwamutaphule ni mukiwiihere.
31 Mene wakhala weera mutthu onimookohani: ‘Mwaha wa heeni mummutaphulaanyu?’ Mmweerele weera: ‘Apwiya, enoomuhaawela.’”
32 Vano, ale yaarummwale, yaarowa ni yaaphwanya itthu sootheene ntoko Yesu aalenlaawe.
33 Mene emaara yaamutaphulaaya puuru ole, asineene yaahaakoha: “Mummutaphulela heeni mwaaxaana ola a puuru?”
34 Waakhula yenre: “Apwiya, enoomuhaawela.”
35 Avinyaka yaamuroihela Yesu, ni yaahaatala ikuwo saya vasulu va puuru owo, ni Yesu anwela.
36 Emaara Yesu eettaawe, atthu yannaatala ikuwo saya mmuseweni.
37 Emaara aattamelaawe musewe onkhuruwela mwaako wa Oliveira, muloko mutokotoko wootheene wa atthareli waapatxera ohakalala onvuwihaka Muluku moowiiwanyeya, mwaha wa miteko sootheene sootikhiniha yonnaaya,
38 yeeraka: “Ooreeriwa tuule onwa ntoko Mwene, mwa nsina na Yehova! Okhale murettele variyari va atthu ni Muluku, ni ninvuwihe Muluku ori wiirimu!”
39 Vano, afarisi akina yaari variyari va muloko ole, yaamweerela Yesu: “Muhusiha, mwaalele atthareli anyu ala weera emaale.”
40 Mene Yesu aawaakhula eeraka: “Kinnooleelani weera yamaala vale, maluku teneera ekhuweleke.”
41 Ni aattamelakaru, Yesu aawehexexa esidade ni aahinlela,
42 eeraka: “Nyuwo, aani, nyuwo, mwaasuwenle itthu sinkela oweereelani samurettele sinvarihana nnihiku nna, mene vano itthu iyo sohiipithihiwa vamaithoni vanyu.
43 Enoophiya mahiku amwiittani anyu enrowaaya woorukurerani ni imiri itokotoko soothokowa ni anrowa wookumiherani maxupo.
44 Akina animoovonyerani nyuwo ni anamwane anyu vathi, ni awo khayoohiyerani nluku vasulu va nluku nikhwaaya, mwaha wooweera Muluku aahoowa woothorihani mene nyuwo khamwaasuwenle.”
45 Woottharelana, Yesu aavolowa mutemplu ni aapatxera owoomola atthu yaatumiha mmo,
46 aweerelaka: “Yoolempwa weera: ‘Empa aka enrowa okhala empa ya mavekelo’, mene nyuwo mumpaka nipuro naanamwiiya.”
47 Yesu annavirelela oxuttiha mahiku ootheene mutemplu, mene asitokweene aanamakeya ni alipa oolepa, ni asitokweene aayuda, yannaasaasera omwiiva,
48 mene, khayaasuwela moota woopaka eyo, mwaha wooweera muloko wootheene waatthu, wannamwiiwelela moomaaleleya.
Footnotes
^ Naari: “musonkho.”
^ Imiina sinhimmwa va, musurukhu. Emiina ene yeela veeKerekuni yaalemela 340g. Ni enhimmwa weera waari musurukhu waaphiyera idrakima 100.
^ Ni eKereku: “eparatha.”
^ Imiina sinhimmwa va, musurukhu. Emiina ene yeela veeKerekuni yaalemela 340g. Ni enhimmwa weera waari musurukhu waaphiyera idrakima 100.
^ Imiina sinhimmwa va, musurukhu. Emiina ene yeela veeKerekuni yaalemela 340g. Ni enhimmwa weera waari musurukhu waaphiyera idrakima 100.
^ Imiina sinhimmwa va, musurukhu. Emiina ene yeela veeKerekuni yaalemela 340g. Ni enhimmwa weera waari musurukhu waaphiyera idrakima 100.
^ Imiina sinhimmwa va, musurukhu. Emiina ene yeela veeKerekuni yaalemela 340g. Ni enhimmwa weera waari musurukhu waaphiyera idrakima 100.
^ Ni eKereku: “eparatha aka.”
^ Imiina sinhimmwa va, musurukhu. Emiina ene yeela veeKerekuni yaalemela 340g. Ni enhimmwa weera waari musurukhu waaphiyera idrakima 100.
^ Imiina sinhimmwa va, musurukhu. Emiina ene yeela veeKerekuni yaalemela 340g. Ni enhimmwa weera waari musurukhu waaphiyera idrakima 100.
