Silempwale ni Luka 2:1-52
2 Mahiku ene yaale, Sesare Augustu aakumiha nlamulo nooweera atthu ootheene yampake namalepela.*
2 (Namalepela ola oopatxera, eereñye emaara Kirino aaraawe kovernatore a wAsiria.)
3 Ni atthu ootheene yaarowa ompaka namalepela,* mutthu ti mutthu elapo oyarinwaawe.
4 Yosefe tho, aarowa oGalileya esidade ya oNazareti wa oYudeya esidade ya Davidi, yeeyo yiitthaniwa Betelehemu, woona weera aari mmusi a Davidi.
5 Owo aarowa olepeliwa ni Maria, yoowo aamuthenlaawe. Etempu ene yeele, Maria eera ahaleelaka oyara.
6 Nto areene weiwo, naaphiya nihiku nooyara.
7 Maria aamuyara mwaana mwaamulopwana ompatxeraawe, ni anvitikelela ni ikuwo avinyaka aamwaatalela nipuro yaahiiwaayavo yootxa ya asinama, mwaha wooweera awosa khayaarino nipuro noophiyeravo.
8 Muttetthe ene yoole, yaakhala alipa ookukhula inama yaakhala vanlakani ewehawehaka inama ohiyu.
9 Mootutuxera, nlaika na Yehova naahaakhumelelasa yaawo ni waakhala waara mukhwipi mwaya mwaha wa ovuwa wa Yehova. Nto awo yaahoova vantxipale.
10 Mene nlaika nne naaheera: Muhoove, miyo kiri va weera kooleeleni mitthenka sooreera sineera saahakalalihe atthu ootheene.
11 Woona weera olelo ooyariwa nvuluxa esidade ya Davidi, yoowo ori Kristu Pwiya.
12 Ethoonyero enkela woosuwelihani ti ela: “Munomphwanya mwaana avitikelelinweene vakuwoni ni aatalelinweene nipuro enheliwaayavo yootxa ya inama.”
13 Voohipisa vamoha ni nlaika nne, yaakhumelela malaika mantxipale a wiirimu emuttottopelaka Muluku yeeraka:
14 “Avuwihiwe Muluku wiirimu, ni elapo ya vathi murettele okhale ni atthu ale owo onwaakhulelaawe.”*
15 Nto, malaika ale etthikelakaru wiirimu, alipa ookukhula inama, yaapatxera wuuluma mukina ni mukhwaawe yeerelanaka: “Nrowe moohipisa oBetelehemu, weera noone etthu yeereñye, yeeyo Yehova onisuwelinhaawe.”
16 Ni awo yaarowa moowaakuveya ni yamphwanya Maria vamoha ni Yosefe, ni mwaana aatalelinweene nipuro yaaheliwaayavo yootxa ya inama.
17 Yoonaakaru eyo, yaahima itthu sootheene yaalelinwaaya woohima sa mwaana owo.
18 Ni atthu yaatikhiniheya vantxipale ni etthu yaaleelinwaaya ni alipa ookukhula inama.
19 Vano Maria annasunka masu ale ootheene vamurimani vawe etthu yaataphulelaaya.
20 Vano, alipa ookukhula inama ale, yaatthika emuttottopelaka ni envuwihaka Muluku mwaha wa itthu sootheene yiiwalaaya ni yonnaaya moovarihana ni ele yaaleelinwaaya.
21 Niphiyakaru nihiku na na 8, yaaphiya etempu yoowiineliwa mwaana, ni yanvaha nsina na Yesu, nsina nenno aavahinwaawe ni nlaika ahinaaye orupaliwa.
22 Opwaha mwa yeeyo, ephiyakaru etempu yonvaha makeya a otteelihiwa moovarihana ni Nlamulo na Mose, awo yaamukuxera mwaana oYerusalemu weera yanvaherere Yehova,
23 moovarihana ni moota elempwalaaya mu Nlamulo na Yehova: “Anamwane asilopwana oopatxera oyariwa, entthuneya weera evahereriweke wa Yehova.”
24 Ni yaavaha mukuttho moovarihana ni ele ehimmwale mu Nlamuloni na Yehova: “Masiya meeli naari ipompa piili.”
25 Vano, oYerusalemu aakhala mulopwana mmoha iitthaniwa Simeyoni, mulopwana owo aari a exariya ni annamoova Muluku, ni aaweherera etempu Muluku aakelaawe waakhavihera ana a Israeli. Ni munepa wootteela waari ni yoowo.
26 Opwaha mwa yeeyo, owo aaleeliwa ni munepa wootteela wa Muluku weera khaakela okhwa ahimonne Kristu a Yehova.
27 Munepa wootteela waamweeriha orowa otemplu; ni Yesu avoloihiwakaru mutemplu ni asitiithi awe weera empakele ele Nlamulo naahimaaya,
28 owo aamukuxa mwaana mmatatani ananvuwiha Muluku eeraka:
29 “Apwiya, vano kaporo anyu pooti okhwa ni muretteele, moovarihana ni masu anyu,
30 mwaha wooweera maitho aka aamoona ole munrowaanyu onvarela muteko, weera mwaavuluxe atthu,
31 nyuwo mureherenraanyu weera ooniwe ni atthu ootheene,
32 waara weera okumihe epiphi wa amalapo ni ovuwa wa muloko awe ana a Israeli.”
33 Asipapawe mwaana, yannatikhina itthu saahimmwa woohima sa mwaana.
34 Vano Simeyoni aahaareeliha ni aaweerela ameyawe Yesu: “Mwaana ola oothanliwa okhala oowuuwiha atthu ni waavinxa atthu antxipale a wIsraeli, ni anaakhale-tho ethoonyero ya ohiiwanana
35 woohima sa nyuwo, nivaka noorakama nnimoothorolani ni yootthuna weera ikumiheriwe vaate minyuupuwelo sa atthu antxipale.”
36 Aakhala profeta mmoha muthiyana, Ana, mwaana a Fanuweli a nloko na Aseri. Muthiyana ola aari oowuuluvala ni atheliwakaru aakhanle ni aiyawe iyaakha 7 paahi.
37 Owo aari naamukhweli ni aarino iyaakha 84. Owo khaatxompela orowa otemplu ni annanvekela Muluku othana ni ohiyu, amutthukaka ramasaani ni apakaka mavekelo.
38 Emaara ene yeele, owo aaphiya anapatxera onvuwiha Muluku, uulumaka woohima sa mwaana ole ni atthu ootheene yaaweherera ovuluxiwa wa Yerusalemu.
39 Nto emalihakaru opaka itthu moovarihana ni Nlamulo na Yehova, yaatthikela oGalileya, esidade aya oNazareti.
40 Ni mwaana annavirelela wunnuwa akhalaka ni ikuru ni miruku sintxipale ni Muluku annavirelela omukhavihera.
41 Iyaakha sootheene, asipapawe yannarowa oYerusalemu erowelaka efeesta ya Mpaasika.
42 Emaara Yesu aaraaweno iyaakha 12, asipapawe ntoko yaakhovelenlaaya, yaarowa ofeestani ya Mpaasika.
43 Emalakaru efeesta ya Mpaasika, awo yaapatxera weetta mukwaha etthikelaka owaani, nto Yesu aahala oYerusalemu, mene asipapawe khayaasuwenle eyo.
44 Awo yuupuwela weera aari ni atthu akina yeetta mukwaha naawo, yaaheetta mukwaha oneettiwa nihiku nimoha, nto yaapatxera omwaasaasa mwa amusi aya ni atthu yaasuwenlaaya.
45 Nto woona weera khayamphwannye, yaatthikela oYerusalemu ni yaamwaasa nnene sene.
46 Evirakaru mahiku mararu, yamphwanya mutemplu akilantheene variyari va alipa ooxuttiha, awiiwelelaka ni aapakaka makoho.
47 Nto atthu ootheene yanwiriyana, yannatikhiniheya mwaha wa moota iiwexexaawe itthu ni moota aakhulaawe.
48 Asipapawe yaatikhiniheya emoonakaru ni ameyawe yaamweerela: “Mwanaka, mpakenle heeni yeela? Nkawehani, miyo ni apapinyu naavalavela niwaasakani.”
49 Mene owo aaweerela: “Mwaha wa heeni mwaakaasaanyu? Khamwaasuwela weera miyo waatthuneya okhala empa ya Atiithi aka?”
50 Mene awo, khayiiwexenxe etthu ele owo aahimaawe.
51 Nto Yesu, aatthikela ni asipapawe oNazareti, ni aavirelela owiiwelela. Opwaha mwa yeeyo, ameyawe yannaphimelela itthu sootheene ni yannuupuwelela.
52 Yesu annunnuwa, ni miruku sawe sannaatxeerereya ni annamuhakalaliha Muluku ni atthu.