Silempwale ni Luka 20:1-47
20 Mahiku ene yaale, Yesu aaxuttihaka atthu mutemplu ni aalaleeraka mitthenka sooreera, yaahoowa asitokweene aanamakeya, alipa oolepa ni asitokweene aayuda
2 ni yaamweerela: “Munleele, ni ikuru heeni munweraanyu opaka itthu iya? Ni taani oovanheni ikuru sene seiya?”
3 Yesu aawaakhula: “Miyo-tho, kinimookohani etthu emoha, ni nyuwosa mukaakhule:
4 Opatiso wa Yohani, waari wa Muluku naari waatthu?”*
5 Yaaphwanya waakhula yaaworu yeeraka: “Waakhula neera vale: ‘Waakhuma wa Muluku’,* owo onkela oneerela: ‘Mwaha wa heeni nto muhimwaakhulenlaanyu?’
6 Menento neera vale: ‘Waatthu’, muloko wootheene onrowa onivonya maluku, mwaha wooweera onnaroromela weera Yohani aari profeta.”
7 Nto mwaha wa yeeyo, yaahaakhula yeeraka, khanisuwenle okhummaayawo.
8 Yesu aaweerela: “Miyo-tho nkinooleelani ikuru heeni sinkikhavihera owera ovara itthu* iya.”
9 Moottharelana, Yesu aapatxera waaleela atthu niphwanaphwaniho nna: “Mulopwana mmoha, aahaala ewuuva ni aahaahiyera anamalima ematta ele, ni aaheetta ekwaha arowaka elapo ekina, ni aaviriha etempu yintxipale areene weiwo.
10 Iwuuva siitthwakaru, owo aamurumiha kaporo awe wa anamalima ale, weera akuxe soowiima sawe. Nto anamalima ale emmanakaru yaamoomola matataru.*
11 Mene owo aahaarumihelasa kaporo mukina. Owo-tho yammana, yaamuulihiha muru ni yaamoomola matataru.*
12 Mene owo, aamuruma anaararu, mene anamalima ale yanvulaliha ni yaamoomola.
13 Nto mwaha wa yeeyo, mwaneene ematta ya ewuuva aaheera: ‘Kinkela opaka eheeni? Kinoomurumiha mwanaka, yoowo kimmusivelaaka. Woonaru enoomuttittimiha.’
14 Anamalima emoonakaru mwaana ole, yaahuuluma yaaworu yeeraka: ‘Ola tonrowa ohiyeriwa ematta ela. Vanonto nrowe nimwiive weera nihaleno yoohiyeriwaawe.’
15 Nto awosa, yaamukumihera vaate va ematta enamwiiva. Vanonto mwaneene ematta awa vale onkela waapakela eheeni anamalima ale?
16 Owo onootthika ni onoowiiva anamalima ale, ni onimwaavaherera ematta ele ya ewuuva anamalima akina.”
Yiiwakaru niphwanaphwaniho nna, awosa yaaheera: “Etthu eyo, ehiwe yeereye!”
17 Mene Yesu aahaawehexexa atthu anaakoha: “Vano, entaphulela eheeni yoolepa eneera: ‘Nluku anamateka yaakhonttaaya, naakhalihiwa nluku noolipiha empa’?
18 Ni ootheene ole onkela omorela nluku nno onimwinteya. Ni ole onkela omoreliwa ni nluku nno, onoonyanyeya.”
19 Menento etempu ene yeele, alipa oolepa ni asitokweene aanamakeya, yannaasaasa onvara, mwaha wooweera awo yaahoonelela weera owo aahimme niphwanaphwaniho nna awuupuwelelaka yaawo. Menento yannoova muloko waatthu.
20 Ni enwehexexakaru Yesu moomaaleleya, awo yaahaaruma asilopwana yaathummaaya weephiini weera yootherere okhala anaxariya weera envare ni masu awe, weera envaherere wa mutokweene a kuvernu.
21 Ni yaamweerela: “Muhusiha, hiyo noosuwela weera nyuwo munuuluma ekhaikhai ni munnaxuttiha nnene sene ni khamwaanoono nthalu, mene munxuttiha iphiro sa Muluku moovarihana ni ekhaikhai.
22 Onnareerela omuliva mpostu* Sesare, naari hooye?”
23 Mene owo aahoonelela miruku saya ni aaweerela:
24 “Mukoonihere etenaariyu. Ekhove ela ni yoolepa ela eri va, ti yawani?” Yaamwaakhula: “Ti ya Sesare.”
25 Mene owo aaweerela: “Moohihovela, munvaheke Sesare eri ya Sesare, mene ya Muluku, munvaheke Muluku.”
26 Nto, khayaawenre onvara ni masu ale owo aahimmaawe ohoolo waatthu. Nto, etikhiniheñyeene ni moota aakhunlaawe yaamaala.
27 Vano, asaduki akina yaawo enhima weera khawaavo ovinyerera, yaamwaattamela enamukoha:
28 “Muhusiha, Mose oonilepela eeraka: ‘Mulopwana akhwa vale ahimuyanre mwaana, munnawe aatheleke akunyaata* awe weera amuyarele mwaana munnawe.’
29 Nto yaakhala alopwana seete, yaawo yaari asinna. Oopatxera aamuthela muthiyana, mene aakhwiiye ahinaaye omuyara mwaana,
30 anaaveeli-tho, yaamweerela etthu emoha-moharu
31 ni anaararu aahaathela akunyaata* awe. Ni yaaheereya etthu emoha-moharu ni ootheene ale seete; yaahookhwa ehimuyanre mwaana.
32 Omamaliheroni, muthiyana ole aahookhwa.
33 Vanonto, woovinyererihiwani wa alipa ookhwa, muthiyana ola anaakhale mwaara awani? Noonaka weera asinna ale seete yaamuthela.”
34 Yesu aaweerela: “Anamwane a elapo ela,* ennathela ni ennatheliwa,
35 mene ale ephwanenle waakhela elapo enwa ni moovinyererihiwani mwa alipa ookhwa, khenthela naari khentheliwa.
36 Mweekhaikhai, awo khenkhwa-tho, mwaha wooweera enlikana ni malaika ni anamwane a Muluku mwaha woovinyererihiwa.
37 Woohima sa ovinyererihiwa wa alipa ookhwa, mpaka Mose aahima eyo va yooweereya ya mwiri wamiiwa, vaavo ommwiitthanaawe Yehova ‘okhala Muluku Abrahamu, Muluku a Isakhi ni Muluku a Yakobe.’
38 Owo Muluku aatthu akumi, khaiyene aatthu ookhwa. Woona weera atthu ootheene awo, vamaithoni vawe akumi.”
39 Yeeraka omwaakhula, alipa oolepa akina yaamweerela: “ Muhusiha, mohuuluma nnene.”
40 Ni khaavo a yaawo eerera omukoha etthu ekina.*
41 Voottharelana, aahaakoha: “Moota heeni enhimmwaaya weera: Kristu mwaana a Davidi?
42 Mwaha wooweera Davidi mwaneene oohima va eliivuru ya Nsalmu eeraka: ‘Yehova ooweerela Apwiya aka: “Mukilaathi moono aka woolopwana,
43 mpaka miyo waavonyera vathi vamanaani aa amwittani aa.’”
44 Vano, Davidi aamwiitthanaka okhala Apwiya, moota heeni onkelaawe okhala mwanawe?”
45 Ni muloko waatthu omwiiwelelaka hiihaale, owo aaweerela atthareli awe:
46 “Mwiikosoope ni alipa oolepa, onaasivela weetta ewanreene mikwansu, wuulumihiwa mapuro oowaattiwa atthu, okilaathela ikatera soopatxera* sa musinakookani, ni okilaathela mapuro oottittimiheya a nfeestani,
47 ennawiiyera itthu asinaamukhweli, ni ennapaka mavekelo oorakama weera yooniwe ni atthu. Awo enoothorihiwa wootepaxa.”
Footnotes
^ Naari: “waakhuma wa atthu.”
^ Naari: “wiirimu.”
^ Naari: “miteko.”
^ Naari: “ehimwinnyale etthu.”
^ Naari: “ehimwinnyale etthu.”
^ Naari: “musonkho.”
^ Ni eKereku: “naamukhweli.”
^ Ni eKereku: “naamukhweli.”
^ Naari: “sookoha sikina.”
^ Naari: “sooreera.”
