Silempwale ni Luka 22:1-71
-
Anamakeya ennampaka palano oomwiiva Yesu (1-6)
-
Mareherero a Mpaasika oomalihera (7-13)
-
Opatxeriwa wa Yootxa ya Apwiya (14-20)
-
Ole oneera okivarihe ori ni miyo vameesa (21-23)
-
Ovaanyihana woohima sa taani ari mutokweene (24-27)
-
Nivarihano na Yesu woohima sa omwene (28-30)
-
Yesu onnahima weera Pedru aamurowa omukhootta (31-34)
-
Onnatthuneya okhala oolikaneene, ikatana piili (35-38)
-
Nivekelo Yesu aapankaawe vamwaako sa Oliveira (39-46)
-
Yesu onnavariwa (47-53)
-
Pedru onnamukhootta Yesu (54-62)
-
Ennamutheya Yesu (63-65)
-
Yesu onnathorihiwa osineetriyu (66-71)
22 Vano, yannaattamela Efeesta ya Ipaawu soohiheliwa Efaramenta, yeeyo eniitthaniwa Mpaasika.
2 Ni asitokweene aanamakeya ni alipa oolepa yeera yaasaasaka moota wonvara Yesu, mwaha wooweera yannawoova atthu.
3 Vano, Satana aavolowa mwa Yuda, yoowo iitthaniwa Iskarioti, mmoha aarummwa 12,
4 ni aarowa wa asitokweene aanamakeya ni ahooleli a mutemplu, weera uulume ni yaawo woohima sa moota eeraawe aavaherere* Yesu.
5 Awosa yaahakalala yiiwakaru eyo ni yaahiiwanana onvaha musurukhu wa eparatha.
6 Nto mwaha wa yeeyo, owo aahaakhulela ni aapatxera waasaasa etempu yooreerela weera aavaherere* Yesu, muloko mutokotoko waatthu ohikhanlevo.
7 Naaphiya nihiku na Efeesta ya Ipaawu soohiheliwa Efaramenta, nenno waavahiwaaya mukuttho wa Mpaasika,
8 vano, Yesu aamuruma Pedru ni Yohani, eeraka: “Murowe ni mwareherere yootxa ya Mpaasika weera nitxe.”
9 Yaamukoha yeeraka: “Muntthuna weera nareherere woowiini?”
10 Yesu, aaweerela: “Mukiiwe: Mwaphiya osidade, mulopwana mmoha okunxe mwaapu wa maahi onimoophwanyani. Mmutthare mpaani aneeraawe avolowe.
11 Ni mmweerele mwaneene empa: ‘Muhusiha onirumme weera nookoheeni: “Nipuro na aletto ninkhala vaaviini, weera miyo vamoha ni atthareli aka nimutxe Mpaasika.’”
12 Ni owo onoowooniherani nipuro ntokotoko noorehereriweene noosulu. Mwamureherere weiwo.”
13 Awosa yaarowa ni yaaphwanya itthu sootheene ntoko Yesu aahimenraawe, ni yaareherera yootxa ya Mpaasika.
14 Ephiyakaru ewoora, Yesu ni atthareli awe yaakilaathi ehaamenleene emeesa.
15 Ni aaweerela: “Kannatthuna vantxipale otxa yootxa ela ya Mpaasika ni nyuwo kihinaaye ohaawa,
16 nto kinnooleelani weera: Nkitthikela omutxa Mpaasika mpaka onkelaawe okwanela Moomweneni mwa Muluku.”
17 Yesu aahaakhela ekoopho ya eviinyu, aavekela ni aaheera: “Mukuxe, mukawaneke,
18 kinnooleelani weera: Okhuma viinaano vaava, nkinkela owura eviinyu ela mpaka Omwene wa Muluku owa.”
19 Yesu aakuxa epaawu, anavekela, aakawanya ni anaavaha atthareli awe, eeraka: “Ela enthoonyera erutthu aka, yeeyo kinrowaaka ovaha weera mphwanye mureerelo. Nvirelele opaka ela mukuupuwelaka miyo.”
20 Amalihakaru otxa, aapaka etthu emoha-moharu ni ekoopho ya eviinyu, eeraka: “Ela, enthoonyera ephome aka ya nivarihano nnyowani moovarihana ni ephome aka, yeeyo kinkelaaka ovaha weera mphwanye mureerelo.
21 “Vano, musuwele weera ole onkela okivariha ori vamoha ni miyo vameesa.
22 Mweekhaikhai, Mwaana a Mutthu onoopwaha, moovarihana ni ele yaahimmwale; mene, ootakhaliwa ole onanvariha!”
23 Nto, yaapatxera okohana yaaworu etthunaka osuwela taani eera apake etthu siiyeeyo.
24 Nto, atthareli yaapatxera ovaanyihana woohima sa taani aari mutokweene a yaawo.
25 Nto Yesu aaweerela: “Anamalamulela a mulaponi annaalamulela atthu ntoko entthunelaaya, ni ale erino owera wa yaawo ennasuweliwa okhala atthu oopaka ‘itthu sooreera.’
26 Mene nyuwosa, muheereke hiiho. Mene ole ori mutokweene variyari vanyu, akhaleke ntoko mwaana, ni ole ori muhooleli, akhaleke ntoko ole onvara muteko.
27 Vanonto, taani ori mutokweene: tuule ontxa vameesa, naari tuule onwiiha yootxa?* Keera tuule ontxa? Mene miyo kiri variyari vanyu ntoko ole onvara muteko.
28 “Nyuwosa khamwaakihiñye emaara kaavirihaaka maxupo;
29 miyo kinnapaka nivarihano na omwene ni nyuwo, ntoko hiihaale Atiithi aka epankaaya nivarihano ni miyo,
30 weera mutxe ni owura vameesani vaka Moomweneni mwaka, ni okilaathela ihitxe weera muthorihe mahimo 12 ana a Israeli.
31 “Simoni, Simoni mwiiwe ela: Satana ontthuna weera ootheene nyuwo nveeriwe ntoko tiriku.
32 Mene kinnapaka mavekelo koovekelelakani nyuwo weera nroromelo nanyu nihitteettheye; weera mwatthika vale, mwaalipihe asinninyu.”
33 Nto owo aaheera: “Apwiya, kiri oolikaneene orowa ni nyuwo okateya, naari okhwa.”
34 Mene Yesu aamweerela: “Pedru, kinnooleelani weera: Olelo, muthupi khonrowa wiipa muhinaayeene nyuwo okikhootta ikwaha tthaaru weera mookisuwela.”
35 Vano Yesu aahaakohasa: “Vaavale koorummaakani weera muhikuxe murupa wa musurukhu, murupa wa yootxa, ni isantaaliya, keereke yaahoothowani etthu?” Awo waakhula yenre: “Hooye!”
36 Vano, owo aaweerela: “Mene vano, ole onaakhaleno murupa wa musurukhu, murupa wa yootxa, ahihiye; mene ole oneera ahikhaleno ekatana, atumihe mukwansu awe, ni athume emoha.
37 Mene kinnooleelani weera ontthuneya okwanela ele elempwale woohima sa miyo, yeeyo eneera: ‘Owo ohaalikeleliwa vamoha ni anamattheka.’ Aani, yoolepa ela ennakwanela wa miyo.”
38 Vano, yaamweerela: “Apwiya, nookhalano va ikatana piili.” Ni owo aawaakhula aweerelaka: “Sookwana seiyo.”
39 Akhumakaru nipuro nne, aarowa omwaako sa Oliveira, ntoko aakhovelenlaawe, ni atthareli awe yaamutthara.
40 Ephiyakaru iwo aaweerela: “Mulipihere ovekela, weera muhimorele mooweereriwani.”
41 Owo aasusa arakamela vakhaaniini, aakokhora anapatxera ovekela,
42 eeraka: “Tiithi, wawereya muhiye ekoopho ela eviraka. Mene yeereye moovarihana ni moota nyuwo muntthunaanyu, khaiyene ntoko miyo kintthunaaka.”
43 Vano, nlaika na wiirimu, naamukhumelela ni nnamulipiha.
44 Vano, Yesu waamuriipa murima vantxipale, ni aatepa ovekela alipiheraka; ni orettheela wawe waari ntoko mattoyi-ttoyi a ephome emmorela vathi.
45 Amalihakaru ovekela aarowa nipuro yaaraaya atthareli awe, ni aaphwannye ekonaka, ekhulumunweene mwaha wooriipiwa murima.
46 Owo aahaakoha eeraka: “Mwaha wa heeni munkonaanyu? Mweemele ni nvireleleke ovekela weera muhimorele mooweereriwani.”
47 Eeraka wuuluma hiihaale, waaphiya muloko mutokotoko waatthu, yoowo waahooleliwa ni mulopwana mmoha iitthaniwa Yuda Iskarioti, mmoha aarummwa ale 12, ni aamwaattamela Yesu weera ampexari.
48 Nto, Yesu aamukoha: “Yuda, munanvariha Mwaana a Mutthu ni epeexu emoha?”
49 Ale yaari ni Yesu yonnaaya etthu yaakela weereya, yaamukoha yeeraka: “Apwiya, nivareleke muteko ikatana iya?”
50 Mene mmoha a yaawo, aamuthikila naaru noolopwana kaporo a mutokweene aanamakeya.
51 Mene Yesu, owaakhula enre: “Muheere hiiho!” Ni aavara naaru na kaporo ole ni aamulamiha.
52 Nto Yesu aaweerela asitokweene aanamakeya, ahooleli a mutemplu ni asitokweene aayuda, yaawenle onvara eeraka: “Nyuwo mukiwenle ni ekatana ni mikopo ntoko namwiiya?
53 Emaara miyo kaaraaka vamoha ni nyuwo mutemplu nenne nri nihiku, khamwaakitthuka. Mene ela ewoora anyu, ni ewoora enlamulelaaya epiphi.”
54 Mene, yanvara enamuroiha vaate va mutokweene aanamakeya. Mene Pedru, annamutthara eettaka ottayi wene.
55 Emaara atthu yaakunkhaaya mooro variyari va vaate, yaakilaathi vamoha. Pedru-tho aakilaathi vamoha naawo.
56 Mene, kaporo mmoha mwaamuthiyana amoonakaru Pedru akilantheene vaakukhinwe mooro, anwehexexa nnene sene ni aaheera: “Mulopwana ola aari ni yoowo.”
57 Mene owo, aakhootta eeraka: “Muthiyana, nkimusuwenle.”
58 Evinreene etempu vakhaaniini, mutthu mukina aamoona ni aamweerela: “Nyuwo-tho mmoha a mulopwana ole.” Mene Pedru aaheera: “Mulopwana, khaiyene ti miyo.”
59 Evinreene ewoora emoha, mulopwana mukina aapatxera ohima moonyeserera eeraka: “Mulopwana ola moohihovela aari vamoha nuuwo, woona weera muGalileya!”
60 Mene Pedru aaheera: “Nkisuwenle etthu munhimaanyu mulopwana.” Etempu ene yeele nlelo eeraka wuuluma, muthupi waahiipa.
61 Nto, Apwiya yaarukunuwa enanwehexexa Pedru, ni Pedru aahuupuwela ele Apwiya yaamulenlaaya yeeraka: “Olelo muthupi ohinaaye wiipa, nyuwo munoorowa okikhootta ikwaha tthaaru.”
62 Avenyaka vaavo, Pedru aakhumela vaate aaninla ariipinweene murima vantxipale.
63 Alopwana yanvanre Yesu, yaapatxera omutheya ni ommana;
64 avenyaka, emukhuneelakaru owiitho wawe, yaamukoha: “Mwaareene profeta! Munleele, taani oomanneni?”
65 Ni yannuuluma masu mantxipale onveha Muluku, emuhimaka Yesu.
66 Vaxaakaru, yaathukumana asitokweene aayuda, asitokweene aanamakeya, alipa oolepa, ni awo yaamuroiha Osineetriyu ni yaamweerela;
67 “Nyuwo mwaareene Kristu, munleele.” Mene owo aaweerela: “Nnaamweera kooleelakani, nyuwo khamunrowa ororomela.
68 Opwaha mwa yeeyo, waari weera kohookohani, nyuwo khamwaakela okaakhula.
69 Nto, ovinya viinaano mpaka muhoolo, Mwaana a Mutthu onookilaathi moono woolopwana wa Muluku oowera.”
70 Nto mwaha wa yeeyo, atthu ootheene yaamukoha yeeraka: “Vanonto, nyuwo Mwaana a Muluku?” Yesu aawaakhula eeraka: “Ti nyuwosa munhima weera ti miyo.”
71 Nto awo yaaheera: “Mwaha wa heeni nnaahaawelaahu anamoona akina? Noonaka weera hiyo noomwiiwa uulumaka ni eyano awe.”
