Silempwale ni Luka 24:1-53
24 Nihiku noopatxera na esemana, awosa yaaphiya oxeexelo omahiyeni wa Yesu, ekunxeene makhura oowinkhela yaawo yaareherenraaya.
2 Mene, yaahoona weera nluku naari vamulako vamahiye naapirikixiwa,
3 ni evolowakaru mmahiye, khayaaphwannye murutthu wa Apwiya Yesu.
4 Evalavenleene hiihaale, alopwana eeli yaawanre ikuwo sootxerimela, yaahoowa yeemela naawo.
5 Asithiyana ale, yaahoova ni yaahuuramela vathi; vano, asilopwana ale yaahaakoha: “Mwaha wa heeni mummwaasaanyu mutthu ori mukumi variyari va atthu ookhwa?
6 Owo khaavo va, oovinyererihiwa. Muupuweleke weera emaara aaraiye mukumi areene oGalileya, aahooleelani
7 weera Mwaana a Mutthu aamwinnyereriwa mmatatani mwa anamattheka, weera iiviwe vamwirini, ni nihiku nanaararu, anvinyererihiwa.”
8 Ni awosa yaahuupuwelela masu awe awo;
9 nto, yaatthika omahiyeni ni yaahaaleela arummwa 11 ni atthu akina itthu sootheene iya.
10 Asithiyana ene taala: Maria Madalena, Joana ni Maria, ameyawe Yakobe, vamoha ni athiyana akina, yaahaaleela itthu iya arummwa.
11 Mene, arummwa awo yuupuwela weera itthu yaahimaaya asithiyana ale, yaamweera wiipakela, nto mwaha wa yeeyo, khayaawaakhulenle asithiyana ale.*
12 Mene Pedru aavenya ni aatthimaka arowaka omahiye; ni uuramakaru aathurumela mmahiye ni onne paahi ikuwo sa eliinyu waavitikelelinwaaya murutthu wa Yesu. Vano, owo aapwaha iikohaka eheeni yeereñye.
13 Mene, nihiku nene nenne, atthareli eeli yaari vamukwahani erooka muttetthe mmoha oniitthaniwa Emawusi, yoowo waarakamenle oYerusalemu ikilomeetru 11,*
14 ni awo yeera etthekulaka woohima sa itthu sootheene seereñye.
15 Yeeraka wuuluma ni otthekula woohima sa itthu iya, Yesu mwaneene aawaattamela anapatxera weetta naawo,
16 mene awo, khayaamusuwenle.
17 Yesu aahaakoha: “Atthwaala entthekula woohima sa eheeni yeettaka?” Ni awo, yaaheemela eriipinweene murima.
18 Vano, mmoha aatthareli ale iitthaniwa Kleyopa aamwaakhula eeraka: “Neereke nyuwo mmalapo munkhala oYerusalemu nno, meekhaanyu muhisuwenle itthu seereñye mahiku ene yaala?”
19 Yesu aahaakoha: “Itthu heeni?” Awosa yaamwaakhula: “Itthu simukhumelenle* Yesu, Munazareti, profeta oowera ni masu ni miteko vahoolo va Muluku ni muloko waatthu ootheene,
20 ni asitokweene ahu aanamakeya ni ahooleli ahu, aamwinnyerera weera iiviwe ni okhomeliwa vamwirini.
21 Nto hiyo nuupuwela* weera mulopwana owo ti yoowo eera aavuluxe ana a Israeli. Ni opwaha mwa yeeyo, nna nihiku nanaararu ovenya nihiku itthu iya seereñyaaya.
22 Opwaha mwa yeeyo, asithiyana akina variyari vahu aanitikhiniha, mwaha wooweera yaaroopehera omahiyeni wawe
23 ni, ehiphwanyakaru murutthu awe, yaatthika, ehimaka weera yaahoona malaika, yaawo yaalenle weera owo oovenyerera.
24 Mene, atthu akina yaari variyari va hiyo, yaarowa omahiye ni yaaphwannye itthu ntoko hiihaale ene asithiyana yaahimenraaya, mene khayaamonne.”
25 Mene, owo aaweerela: “Nyuwosa alolo, ni moota mumpisaanyu ororomela itthu sootheene saahimmwale ni maprofeta!
26 Khawaatthuneya weera Kristu ahaawe itthu iya ni ovolowa moovuwani mwawe?”
27 Ni owo aahaaleela itthu sootheene silempwale simmuhima owo, okhuma Soolepa sa Mose mpaka sa Maprofeta ootheene.
28 Yaattamelaka muttetthe yaakelaayawo, Yesu aahoonihera weera, aakhala ntoko aakela woorakamawo.
29 Mene awo, yaamunyeserera weera ahipwahe, yeeraka: “Mukhale ni hiyo, mwaha wooweera ohanle wiila ni nsuwa nihanle oneela.” Nto mwaha wa yeeyo, owo aavolowa anakhala naawosa.
30 Ni yeeraka otxa* hiihaale vamoha nuuwo, owo aakuxa epaawu, anavekela, aakawanya ni aapatxera waavaha awosa.
31 Nto mwaha wa yeeyo, yaamusuwela; mene owo aalakaseya.
32 Vano, yaaheerelana mukina ni mukhwaawe: “Emaara uulumaawe ni hiyo, annavara mirima sahu etempu uulumaawe ni hiyo mmuseweni ataphulelaka Soolepa.”
33 Awosa yaavinya etempu ene yeele, enatthikela oYerusalemu, ni yaahaaphwanya arummwa 11 vamoha ni atthu akina yaathukumanne naawo;
34 ni yanneera: “Mweekhaikhai, Apwiya aavinyererihiwa ni aamukhumelela Simoni!”
35 Vano, awosa yaahaaleela etthu yeereñye mmuseweni ni moota yaamusuwenlaaya owo akawanyakaru epaawu.
36 Yeeraka wuuluma hiihaale itthu iya, Yesu mwaneene aahaakhumelela variyari vaya ni aaweerela: “Murettele okhale ni nyuwo.”
37 Mene awo, yaatikhiniheya ni woova, yuupuwela weera yoona munepa.
38 Vanonto, owo aahaakoha eeraka: “Mwaha wa heeni muntikhinaanyu, ni mwaha wa heeni munhovelaanyu vamurimani vanyu?
39 Nwehe matata aka ni manaani aka, ni moone weera ti yoomi. Mukitave ni nwehe, woona weera munepa khawaanoono ethayi naari makhuva, ntoko nyuwo munkoonaanyu kiraaka.”
40 Uulumaka hiiho, aawoonihera matata awe ni manaani awe.
41 Mene awo nlelo khayaakhulela, mwaha woohakalala ni otikhiniheya. Nto owo aaweerela: “Neereke yookhalavo va etthu yootxa?”
42 Yanvaha epetaasu ya ehopa yoowooxiwa,
43 ni owo aahaakhela ni aapatxera okhuura awo yoonaka.
44 Avenyaka, owo aaweerela: “Ala masu miyo koolenlaakani emaara kaaraaka ni nyuwo, weera itthu sootheene silempwale woohima sa miyo mu Nlamuloni na Mose, maprofeta ni Mmasalmuni ontthuneya weera ikwanele.”
45 Vano, owo aahula muupuwelo aya weera yiiwexexeke etthu entaphulelaaya Soolepa,
46 ni aaweerela: “Yoolempwa weera Kristu aamuhaaxiwa ni nihiku nanaararu, anvenyererihiwa mwa alipa ookhwa,
47 ni mwa nsina nawe, saamulaleiwa mitthenka weera atthu ootheene* ettharuwe weera eleveleliwe soottheka saya, epatxeraka oYerusalemu.
48 Nyuwosa munrowa okhala anamoona a itthu iya.
49 Ni musuwele weera kinimoorumihelani ele Atiithi aka elaihenraaya. Mene, nvirelele okhala oYerusalemu mpaka waakhela owera onkhuma wiirimu.”
50 Moottharelana, aahaakuxa atthareli awe anaaroiha oBetania, weiwo, aaheemexa matata anaareeliha.
51 Eeraka waareeliha hiihaale, owo aakuxiwa anaroihiwa wiirimu.
52 Vano, awo yaahuurama enamuttittimiha ni yaatthikela oYerusalemu ehakalanleene vantxipale.
53 Ni awosa, yannakhala mutemplu mahiku ootheene envuwihaka Muluku.
Footnotes
^ Naari: “etthu ele yaahimmaaya.”
^ Ni eKereku: “Istaatiyu 60. Estaatiyu emoha yaakhalano imeetru 185.
^ Naari: “simweerenle.”
^ Naari: “naaweherera.”
^ Naari: “ehaamenleene emeesa.”
^ Naari: “maloko ootheene.”
