Silempwale ni Luka 4:1-44
4 Yesu akhaviheriwaka ni munepa wootteela wa Muluku, aakhuma omoolokoni Yordani, ni aakuxiwa ni munepa wootteela aroihiwaka onikareni,*
2 mpuwa mwa mahiku 40, owo aaheereriwa ni Diabo. Mahiku ene yaale, owo khaatxiiye etthu; nto emalakaru mahiku ale, owo aavoliwa etala.
3 Vano, Diabo aamweerela: “Waari weera nyuwo Mwaana a Muluku, mulamule nluku nna weera nithatuwe epaawu.”*
4 Mene Yesu waakhula enre: “Yoolempwa weera: ‘Mutthu khankhala ni ekumi mwaha wa epaawu* paahi.’”
5 Vano, Diabo aamukuxera Yesu vasulu anamoonihera moowaakuveya imwene sootheene sa mulaponi.
6 Woottharelana, Diabo aamweerela: “Kinimoovahani ovuwa wootheene ni owera wa imwene iya, mwaha wooweera miyo kohinnyiwa ni kinanvaha ole kimmutthunaaka.
7 Vano, wakhala weera munookikokhorela onaamukhala vakhaaniini, itthu sootheene iya, kinimoovahani.”
8 Yesu aamwaakhula eeraka: “ Yoolempwa weera: ‘Omukokhorele Yehova, Muluku aa, ni onvareleke muteko yooworu paahi.’”
9 Diabo aamukuxa Yesu, anamuroiha oYerusalemu ni aamwiiyaathi nipuro nootepaxa orakama na etemplu anamweerela: “Waari weera nyuwo mwaana a Muluku, mwiivonye va mpaka vathi,
10 woona weera yoolempwa: ‘Muluku onoorumiha malaika awe weera yookosoopeni’,
11 ni: ‘Awo, enimookaphulani weera manaani anyu ehimane nluku.’”
12 Yesu omwaakhula enre: “Yaahimmwa: ‘Ohimweerere Yehova Muluku aa.’”
13 Vano, Diabo amalihakaru omweerera Yesu, aamuhiya anapwaha awehereraka etempu ekina yooreerela.
14 Akhaviheriwaka ni munepa wootteela, Yesu, aatthikela oGalileya. Ni mitthenka sooreera woohima sa owo, saamwaramwareya muttetthe wootheene ole ni mittetthe soowaattamela.
15 Opwaha mwa yeeyo, owo aapatxera oxuttiha musinakookani mwaya ni annattittimihiwa ni atthu ootheene.
16 Avinyaka, owo aarowa oNazareti weiwo aahuuwalaawewo, ni moovarihana ni yookhovelelaawe, nihiku na esaabadu aarowa osinakooka, ni aaheemela weera asome soolepa.
17 Nto, aahinnyiwa eroolu ya profeta Yesaya, aahula eroolu eyo anaphwanya nipuro yaalempwalaaya ha:
18 “Munepa wa Yehova, ori ni miyo, mwaha wooweera Owo ookithanla weera kaalaleere alipa oohaawa mitthenka sooreera. Owo ookirumiha weera kilaleye otaphuliwa wa alipa ootthukiwa ni waalamiha alipa oohoona, ni waavuluxa ale enhaaxiwa,
19 weera kilaleye woohima sa etempu Yehova onkelaawe waareerela murima atthu.”
20 Mwa yeeyo, aawala eroolu anamutthikihera* murumeyi ni aakilaathi; nto atthu ootheene yaari musinakooka mmwe, yannanwehexexa.
21 Yesu, aapatxera wuuluma eeraka: “Olelo va, aakwanela masu ala mmanlaanyu wiiwa a Yoolepa ela.”
22 Atthu ootheene yaapatxera omuuluma nnene ni osiveliwa ni masu ooreera owo uulummaawe, ni yanneera: “Ola khaiyene mwaana a Yosefe?”
23 Mwa yeeyo, Yesu aaweerela: “Moohihovela, nyuwo munoovarela muteko masu ala mukihimaka miyo mweeraka: ‘Ameetiku mwiilamihe mwaneene anyu’, ni munimweera: ‘Mpake-tho owannyinyu nno,* itthu niiwalaahu weera moopaka oKafarnawu.’”
24 Vano owo aaweerela: “Kinnooleelani ekhaikhai weera: Khaavo profeta onaakhuleliwa elapo awe.
25 Kinnoororomelihani weera wIsraeli yaakhala asinaamukhweli antxipale etempu ya Eliya, epula ehiyakaru orupa mpuwa mwa iyaakha 3 ni minyeeri 6, yaakhala etala elapo yootheene ele.
26 Nnaamweera vareene hiiho, Eliya khaarumihinwe wa asinaamukhweli ene yaale yaari wIsraeli, mene owo, aarumihinwe wa naamukhweli oSarefati muttetthe wa oSidoni.
27 Nave-tho mahiku a profeta Eliseyo, wIsraeli yaakhala anamakokho antxipale, mene khaavo a yaawo aalamihinwe* ahikhanle paahi Namani a waSiria.”
28 Vano, atthu ootheene yaari osinakooka yiiwale masu ale, yaanyoonyiwa vantxipale,
29 ni yaamukuxa moowaakuveya enamukeliha okhwipi wa esidade ni yaamuroiha muxerexere mwa mwaako wa esidade ele yaaraaya, ni yootthuna weera emukakhele vathi.
30 Mene owo, aavira variyari vaya anapwaha.
31 Avinyaka Yesu aakhuruwela oKafarnawu esidade ya oGalileya. Owo eera aaxuttihaka atthu nihiku na esaabadu,
32 ni atthu awo yaatikhiniheya mwaha wa moota aaxuttihaawe, woona weera itthu aaxuttihaawe saakhuma wa Muluku.
33 Musinakooka, aakhala mulopwana mmoha aarino munepa woonanara, nto owo aakhuwela eeraka:
34 “Aah! Yesu muNazareti, muntthuna eheeni ni hiyo? Mwaawenle oninyaanya? Miyo kohoosuwelani nyuwo taani: nyuwo Ootteela murummwale ni Muluku.”
35 Mene Yesu, aamuximwela amweerelaka: “Omaale, ni omuhiye mulopwana owo.” Vano, anvonyerakaru vathi variyari vaya, Demoniyu* ole aamuhiya mulopwana ole ahinvulalinhe.
36 Mwaha wa yeeyo, atthu ootheene waawuuma owanoni ni yaapatxera weerelana mukina ni mukhwaawe: “Masu heeni yaala? Owo onnawera oruma minepa soonanara, nto minepa iyo sinnakhuma!”
37 Nto mwaha wa itthu iya, mitthenka woohima sa yoowo saamwaramwareya mittetthe sootheene soowaattamela.
38 Akhumakaru osinakooka, aaphiya owannyawe Simoni. Apwiya-mwaana awe Simoni, yeera yaavoreyaka vantxipale efeepere* ni aavekeliwa weera aakhavihere.
39 Nto Yesu aahuurama aalamiha efeepere yaavoreya. Etempu ene yeele, awo yaavinya enapatxera owaapela yootxa.
40 Nsuwa nneelakaru, Yesu aawiiheriwa atthu antxipale yaarino iretta soohiyana-hiyana ni owo annawiiyaathera matata ni annaalamiha.
41 Ohiya yeeyo paahi, saakhuma wa atthu antxipale minepa soonanara sikhuwelaka seeraka: “Nyuwo, Mwaana a Muluku.” Mene Yesu annaximwela, ni owo khaahiya iyo wuuluma, woona weera iyo, saasuwela weera owo aari Kristu.
42 Nto vaxaakaru, owo aarowa nipuro noohikhala atthu. Vano muloko mutokotoko waatthu, waapatxera omwaasaasa mpaka ophiya nipuro owo aaraawe. Ni yaaheerera omukhoottiha weera ahikhume nipuro nne.
43 Mene owo aaweerela: “Kintthuneya olaleya mitthenka sa Omwene wa Muluku mittetthe mikina, mwaha wooweera tiyeeyo kirummwalaaka opaka.”
44 Nto owo, aavirelela waalaleera atthu musinakookani mwa oYudeya.
Footnotes
^ Naari: “yootxa.”
^ Naari: “yootxa.”
^ Naari: “anamuhokoloxera.”
^ Naari: “mmuttettheni mwanyu.”
^ Naari: “aatteelihinwe.”
^ Naari: “miunepa woonanara.”
^ Naari: “yaapwexaka erutthu.”