Silempwale ni Luka 5:1-39
5 Nihiku tinno, Yesu aari muxerexere mwa elaaku ya oJenesareti,* ni muloko mutokotoko waatthu wannamphunya ni yootthuna weera wiiwe masu a Muluku.
2 Owo aawoona apaarku eeli yeemexinweene muxerexere mwa elaaku, mene alipa oototha ihopa yeera ekhurunwemweene ni etxapaka matthavi.
3 Avolowaka mpaarkuni mmoha yoowo aari a Simoni, aavekela weera arakamiheliwe muxerexere mwa elaaku. Nto, aakilaathi mpaarkuni ni anapatxera oxuttiha muloko mutokotoko waatthu.
4 Amalihakaru wuuluma, Yesu aamweerela Simoni: “Murowe mpaka nipuro noowiixa, mwavonyere ntthavi weera nvare ihopa.”
5 Vano Simoni, waakhula enre: “Muhusiha, noovara muteko ohiyu wootheene ni khaniphwannye etthu, nto okhala weera mookivekela, kinoorowa ovonyera matthavi awo.”
6 Evonyerakaru ntthavi, yaavara ihopa sintxipale mpaka ntthavi opatxera waahuwa.
7 Vano, awo yaahaavaha ethoonyero akhwaaya yaari paarku mukina weera ewe waakhavihera; ni awo yaahoowa esariha ihopa apaarku ooweeli mpaka apaarku awo opatxera ottatta.
8 Simoni Pedru oonakaru eyo, aakokhora ohoolo wa Yesu eeraka: “Mususe wa miyo Pwiya, mwaha wooweera miyo namattheka.”
9 Owo vamoha ni atthu yaari ni yoowo, yaatikhiniheya vantxipale mwaha wa ihopa sintxipale yaavanraaya,
10 ni yaamweereela etthu emoha-moharu Yakobe ni Yohani anamwaane a Zebedeyo, yaawo yaavara muteko vamoha ni Simoni. Mene Yesu aamweerela Simoni: “Ohoove. Ovinyera viinaano vaava mpaka muhoolo, onrowa okhala namatotha aatthu.”
11 Nto, yaamukuxa paarku enamutthikihera muxerexere mwa elaaku, ni yaahiya itthu sootheene ni enamutthara Yesu.
12 Nihiku tinno, Yesu areene esidade emoha, aahoowa mutthu mmoha oosareya makokho. Owo amoonakaru Yesu, aakokhora ohoolo wawe ni anamuntxonttela eeraka: “Pwiya, mwatthuna vale mukilamihe.”
13 Nto Yesu, aahookola ntata nawe ni anamutava mulopwana ole eeraka: “Miyo kinnatthuna weera mulame.” Moohipisa, mulopwana ole aalama.
14 Nto Yesu, aamuleela mulopwana ole weera ahimuleele mutthu etthu ele, ni aahaatxeerera eeraka: “Murowe wa anamakeya, mwavahe yoovaha Mose aahimmaawe mwaha wa olamihiwa wanyu, weera awo esuwele weera moolamihiwa.”
15 Mene itthu iye Yesu aapakaawe, sannavirelela wiiwanyeya, ni muloko mutokotoko waatthu wannathukumana ni yootthuna weera omwiiwe ni olamihiwa iretta saya.
16 Mene ikwaha sintxipale, owo annarowa mapuro* oohikhala atthu weera avekele.
17 Nihiku nimoha a mahiku ene yaale, emaara Yesu aaxuttihaawe, yaakilaathi vaavale afarisi ni anamahusiha a Nlamulo, yaawo yaakhuma mittetthe sootheene sa oGalileya, oYudeya ni oYerusalemu. Vano ikuru sa Yehova saari ni Yesu weera aalamiheke atthu.
18 Nto, yaaphiya asilopwana akina emutenxeene vamaakani* mulopwana mmoha oorakala, awo yeerera onvoloiha mpaani ni omuhiya nipuro aaraawe Yesu.
19 Nto mwaha wa muloko mutokotoko waatthu, awosa khayaawenre ophwanya moota wonvoloiha mpaani aaraawemo Yesu. Nto mwaha wa yeeyo, yaaveta vasulu va empa. Evetakaru, yaakuruxela maaka* mpaka variyari vaatthu yaari ohoolo wa Yesu.
20 Yesu oonakaru nroromelo yaaraayanosa, aamweerela mulopwana ole: “Soottheka sanyu, sooleveleliwa.”
21 Vano, alipa oolepa ni afarisi, yaapatxera wuuluma yeeraka: “Ola taani onuuluma itthu sonveeha Muluku? Taani onwera olevelela soottheka ahikhanle Muluku?”
22 Vano, Yesu asuwelaka muupuwelo aya, aawaakhula aakohaka ha: “Munuupuwela eheeni mmurimani mwanyu?
23 Eheeni eri yookhweya, wuuluma weera: ‘Soottheka sanyu sooleveleliwa’, naari: ‘Nvinye mweette’?
24 Nto weera musuwele, weera Mwaana a Mutthu ookhalano owera woolevelela soottheka valaponi . . .”, Yesu aamweerela ha mulipa ole oorakala: “Kinnooleelani weera nvinye mukuxe maaka* anyu murooke owaani.”
25 Nto owo, aavinya ohoolo waya emoonaka ni aakuxa maaka* aakonenlaawe anarowa owaani anvuwihaka Muluku.
26 Vano, atthu ootheene yaatikhiniheya vantxipale ni yanvuwiha Muluku, esareñyeene woova yanneera: “Olelo, nohoona itthu sootikhiniha!”
27 Avinyaka vaavale, Yesu aakhuma ni aamoona namaliviha mpostu* mmoha iitthaniwa Levi, akilantheene alivihaka mpostu* ni aamweerela: “Mukhale mutthareli aka.”
28 Ni Levi, ahiyaka itthu sootheene ottuli, aavinya anapatxera omutthara.
29 Nto Levi, aapaka efeesta etokotoko weera amwaakhelele owannyawe ni waakhala muloko mutokotoko wa anamaliviha mpostu* ni atthu akina yaatxa* vamoha ni yaawo.
30 Nto mwaha wa yeeyo, afarisi ni alipa oolepaaya, yaapatxera wuuluma vathi-vathi ni atthareli a Yesu eweerelaka ha: “Mwaha wa heeni nyuwosa muntxaanyu ni owura vamoha ni alipa ooliviha mpostu ni anamattheka?”
31 Yesu aawaakhula eeraka: “Atthu akumi khemmuhaawela meetiku, mene ale envoreiwa.
32 Miyo nkaawenle owiitthana anaxariya, mene anamattheka weera ettharuwe.”
33 Awo yaamweerela: “Atthareli a Yohani, ennamutthuka ramasaani veeli-veeli ni ennavekela, ni etthu emoha-moharu-tho ennapaka afarisi. Mene atthareli anyu ennatxa ni ennawura.”
34 Yesu aaweerela: “Neereke nyuwo pooti oweeriha asinthamwene a mutthu ottomenre, oriipiwa murima nthamwene aya areene ni yaawo?
35 Mene enoophiya mahiku nthamwene aya ole ottomenre eneeraaya yaakhiwe; nto yaphiya mahiku ene yaawo, eneeraaya emutthukeke ramasaani.”
36 Ni aahaaleela-tho niphwanaphwaniho nikina: “Khaavo mutthu onaahula etxikampa enyowani weera atothele ekuwo yakhalayi. Eera hiiho, etxikampa enyowani enoothikila ekuwo yakhalayi ni khewa yiiwanana ni yakhalayi.
37 Vamoha-moharu, khaavo onhela eviinyu ya viinaano mmurupani sa ixapala sa khalayi. Wakhala weera mutthu oopaka eyo, murupa wa eviinyu onoophuleya ni eviinyu eyo enooyeeheya, nave mirupa iyo inoonanara.
38 Vanonto, eviinyu enyowani, entthuneya oheliwaka mmurupani munyowani.
39 Khaavo oneera amaliha owura eviinyu yakhalayi, anatthuna owura eviinyu enyowani, mwaha wooweera ohima oneera: ‘Eviinyu ya khalayi tensiva.’”
Footnotes
^ Eyo tiiyo, ephareya ya oGalileya.
^ Naari: “onikareni.”
^ Naari: “vanrepani.”
^ Naari: “nrepa.”
^ Naari: “nrepa.”
^ Naari: “nrepa.”
^ Naari: “musonkho.”
^ Naari: “musonkho.”
^ Naari: “musonkho.”
^ Naari: “yaahaamenle emeesa.”
