Silempwale ni Luka 7:1-50
7 Yesu amalihakaru ohima itthu aatthunaawe waaleela atthu, aavolowa oKafarnawu.
2 Vano, namuteko mmoha a muhooleli aanakhotto, yoowo owo aamusivelaawexa aavoreiwa vantxipale mpaka ohaleela okhwa.
3 Muhooleli aanakhotto iiwakaru woohima sa Yesu, owo aahaarumiha asitokweene aayuda akina onvekela Yesu weera awe amulamihe kaporo awe.
4 Awosa yaarowa okumana ni Yesu, ni yaapatxera omutxonttela moohihiyerereya yeeraka: “Mulopwana owo onnaphwanela okhaviheriwa ni nyuwo Apwiya,
5 mwaha wooweera owo onnasiveliwa ni nloko nahu, ni ti yoowo opanke esinakooka ahu.”
6 Yesu aavinya naawo. Mene ahaleelaka ophiya owannyawe, mutokweene aanakhotto aahaarumiha asinthamwene awe weera yamweerele: “Apwiya, muhiixupe, miyo nkiphwanenle owaakhelani owannyaka.
7 Mene ti yeeyo yaakeerinhe ohirowa okumana ni nyuwo. Muhime paahi masu, kaporo aka onoolama.
8 Miyo-tho mutthu kinlamuliwa, nave-tho kookhalano anakhotto kinaalamulaaka, ni kamweerela mmoha: ‘Orowe!’ owo onnarowa, ni kamweerela mukina: ‘Owe!’ owo onnawa, ni kamweerela kaporo aka: ‘Opake ela!’ owo onnapaka.”
9 Yesu iiwakaru masu a mulopwana ole, aatikhiniheya nuuwo, arukunuwaka, aaweha muloko mutokotoko waatthu waamutthara ni aaheera: “Kinnooleelani ekhaikhai: wIsraeli wootheene nkimphwannye mutthu orinono nroromelo ntokotoko ompwaha mulopwana ola.”
10 Vano ale yaarummwale etthikelaka owaani, yamphwannye kaporo ole alammeene.
11 Avinyakaru vaavale, Yesu aarowa esidade yiitthaniwa Nayimi, ni atthareli awe ni muloko mutokotoko waatthu waari vamoha nuuwo.
12 Emaara aattamelaawe vamulako wa esidade, eera ateexinweene mutthu mmoha ookhwa akumiheriwaka vaate, mwaana mmoha ene anaamukhweli. Ni muloko mutokotoko waatthu wa esidade ele, wannamuhoola naamukhweli ole.
13 Apwiya emoonakaru naamukhweli ole, yammorela ikharari ni yaamweerela: “Mmaale winla.”
14 Avinyaka, Yesu aahaattamela maaka* anavara ni alipa yaatenxe maaka,* yaaheemela. Nto Yesu aamweerela: “Mmiravo, kinnooleela: Ovinye!”
15 Ni mmiravo ole aakhwiiye aakilaathi ni anapatxera wuuluma, ni Yesu anveleela waameyawe.
16 Atthu ootheene yaahoova vantxipale ni yaapatxera onvuwiha Muluku yeeraka: “Oonikhumelela profeta mutokweene variyari vahu”, ni: “Muluku oomorela ikharari muloko awe.”
17 Ni mutthenka ola woohima sa yoowo, waamwaramwareya oYudeya wootheene ni mittetthe sootheene soowaattamela.
18 Nto, atthareli a Yohani, yaamuleela itthu sootheene iya.
19 Ni Yohani, aawiitthana atthareli awe eeli ni aahaarumiha wa Apwiya weera yaakohe: “Nyuwo muri Mesiya aalaiherinwe weera aamoowa elapo ya vathi, naari ninweherereke mutthu mukina aneera akhale Mesiya?”
20 Asilopwana ale emwaattamelakaru Yesu, yaamweerela: “Yohani Mpatisa orooniruma wa nyuwo weera nookoheeni: ‘Nyuwo muri Mesiya aalaiherinwe weera aamoowa elapo ya vathi, naari ninweherereke mutthu mukina aneera akhale Mesiya?’”
21 Emaara ene yeele, Yesu aalamiha ikwerere sa atthu antxipale, iretta ni aahoomola minepa soonanara, nave aahaalamiha alipa oohoona.
22 Yesu owaakhula enre: “Murowe, mwamuleele Yohani ele monnaanyu ni mwiiwalaanyu: alipa oohoona vano ennoona, alipa oorakala vano enneetta, anamakokho ennalamihiwa, ni alipa oohiiwa vano enniiwa, alipa ookhwa ennavinyererihiwa, ni mitthenka sooreera ennalaleeriwa alipa oohaawa.
23 Oohakalala taale ehimphwanya wa miyo etthu yoowaakwattuliha.”
24 Atthareli a Yohani epwahakaru, Yesu aapatxera wuuluma ni atthu woohima sa Yohani, aakohaka: “Eheeni mwaakenlaanyu woona onikareni? Neereke mwaakenle woona mutathi ottikinyiwaka ni epheyo?
25 Nto taani mwaakenlaanyu omoona? Mulopwana owanre ikuwo sooreera? Atthu enwara ikuwo sooreeera enkilaathi impa sa mamwene.
26 Vano, mwaakenle woona eheeni onikareni? Profeta? Aani, miyo kinnooleelani weera owo ompwaha profeta.
27 Owo mwaakenlaanyu omoona ti yoowo soolepa saahimmaaya seeraka: ‘Nkawehani! Kinoomurumiha namitthenka ohoolo wa, yoowo aneera areherere ephiro aa!’
28 Miyo kinnooleelani ekhaikhai weera: Waatthu ootheene eyarinwe ni muthiyana, khakhanle mutthu mutokweene ompwaha Yohani Mpatisa; mene ole ori ooyeva Momweneni mwa Muluku, onnampwaha Yohani.”
29 (Yiiwakaru eyo, atthu ootheene ni anamaliviha mpostu* yaahima weera Muluku naxariya, mwaha wooweera awo yaapatisinwe ni Yohani.
30 Mene afarisi ni alipa oosuwela Nlamulo, khayaapwattha yootthuna* ya Muluku wa yaawo, mwaha wooweera khayaapatisinwe ni Yohani.)
31 “Kinaalikanxere nnaani atthu ala, ni enlikana nnaani?
32 Alasa enlikana ni anamwane ekilanthi omerkatu,* enaakhuwelela asinkhwaaya: ‘Hiyo nohoorumihelani eflauta nyuwo mootxenle wiina; hiyo wanriipa murima mene nyuwo mootxenle okhupanyera.’
33 Vamoha-moharu, Yohani annamutthuka ramasaani veeli-veeli ni khaawura eviinyu, menento nyuwo ohima muneera: ‘Owo ookhalano munepa woonanara.’
34 Menento Mwaana a Mutthu, onnatxa ni onnawura eviinyu, menento nyuwo ohima muneera: ‘Nkanweehani vale! Namatxa ni namawura eviinyu, asinthamwene awe alipa ooliviha mpostu,* ni anamatxa!’
35 Nto, miruku sa mutthu sinooneya weera ti seekhaikhai ni miteko saya.”
36 Vano, nfarisi mmoha annanvekela voohihiyerereya weera arowe atxe vamoha owannyawe. Owo aarowa owannyawe nfarisi ole ni aakilaathi ahaamela emeesa.
37 Muthiyana mmoha a esidade ele aasuwelinwe okhala namattheka, asuwelakaru weera Yesu eera atxaaka vate va nfarisi, aakuxa ekarafa ya alabastru* yaarimo makhura oowinkhelaxa.
38 Aaheemela ottuli wa Yesu, mmanaanini mwawe ni aahinla, ni aapatxera onaaniha manaani a Yesu ni maithori awe, ni aapuputta ni maihi awe. Ni annapexari manaani a Yesu voohihiyerereya ni annayeehera makhura oowinkhela.
39 Nfarisi ole anwompe Yesu oonakaru ele, aahuupuwela vamurimani vawe: “Mulopwana ola aari profeta eekhaikhai, aamusuwela muthiyana heeni ola oninvara, weera namattheka.”
40 Nto mwaha wa yeeyo, Yesu aamweerela: “Simoni, kookhalano etthu kintthunaaka wooleelani.” Simoni waakhula enre: “Muhimeke Muhusiha!”
41 “Mulipa mmoha ookophiha musurukhu, aakhalano atthu eeli yaamukophenle. Mmoha aakomphe itenaariyu 500, mukina aakomphe 50.
42 Woona weera khayaawera omuliva, owo aahaalevelela ooweeli. Vanonto, waatthu ala eeli, taani aneera amusivelekexa namakophiha musurukhu?”
43 Simoni omwaakhula enre: “Ole omulevelenlaawexa.” Yesu aamweerela: “Mohaakhula nnene sene.”
44 Nto Yesu, aarukunuwa ananweha muthiyana ole ni aamweerela Simoni: “Moomoona muthiyana ola? Koophiya owannyinyu, nyuwo khamukivanhe maahi oorapiha manaani aka. Mene muthiyana ola, oonaaniha manaani aka ni maithori awe, ni oopuputta ni maihi awe.
45 Nyuwo khamukivanheru epeexu, menento muthiyana ola khahiyerenre opexari manaani aka.
46 Nyuwo khamuyeehenre makhura mmuruni mwaka, menento muthiyana ola, oyeehenre makhura oowinkhela mmanaanini mwaka.
47 Tivawonto kinooleelaakani: soottheka sawe nnaamweera sireene itokotoko,* sooleveleliwa, mwaha wooweera oosivela vantxipale. Mene ole onleveleliwa vakhaaniini, onsivela vakhaaniini.”
48 Vano, Yesu aamweerela muthiyana ole: “Soottheka sanyu, sooleveleliwa.”
49 Atthu yaari nuuwo vameesa, yaapatxera wuuluma yaaworu yeeraka: “Mutthu heeni yoola, onwera olevelela mpaka soottheka?”
50 Ni Yesu aamweerela muthiyana ole: “Murooke ni murettele. Nroromelo nanyu nohoovuluxani.”
Footnotes
^ Naari: “nrepa.”
^ Naari: “nrepa.”
^ Naari: “musonkho.”
^ Naari: “malamulo; miruku.”
^ Naari: “mapuro oowaattiwa, saapakiwa mithukumano.”
^ Naari: “musonkho.”
^ Naari: “sintxipale.”
