Silempwale ni Luka 8:1-56
-
Asithiyana yaamuhoola Yesu (1-3)
-
Niphwanaphwaniho na mulipa oowaala iso (4-8)
-
Etthu yaamweeriha Yesu ovarela muteko maphwanaphwaniho (9, 10)
-
Wiiwanyeihiwa wa niphwanaphwaniho na mulipa onaala iso (11-15)
-
Muthuko khontthuneya okhuneeliwa (16-18)
-
Ameyawe ni asinnawe Yesu (19-21)
-
Yesu onnamaaliha epheyo (22-25)
-
Yesu onnaaruma mademooniyu owoluwa mukuluweni (26-39)
-
Mwaana mwaamuthiyana a Jairo; muthiyana mmoha onnatava ikuwo sa Yesu (40-56)
8 Evinreene etempu vakhaaniini, owo aapatxera weetta esidade ni esidade, muttetthe ni muttetthe, alaleyaka mitthenka sooreera sa Omwene wa Muluku. Ni arummwa 12, yaari vamoha ni yoowo,
2 ni yaakhala asithiyana akina yaawo yaakumihinwe minepa soonanara ni yaalamihinwe iretta. Asithiyana ene taala: Maria iitthaniwa Madalena, yoowo saakumihinwaayamo minepa 7 soonanara;
3 Joana mwaara aKuza, mutokweene a empa ya Herodi; Susana; ni asithiyana akina antxipale yaamukhavihera, evarelaka muteko itthu saya.
4 Emaara muloko mutokotoko waatthu waathukumannaaya vamoha ni atthu ale yaaweela okumana ni Yesu yaakhuma isidade soohiyana-hiyana, Yesu aahuuluma naawo niphwanaphwaniho.
5 Namalima mmoha aavinya anarowa waala iso sawe. Nto amisaka hiihaale, iso ikina saamorenle muxerexere mwa musewe ni saanyikaliwa, nave apalame yaahoowa enatxa.
6 Ikina saamorenle vamalukuni, simelakaru, saahuuma mwaha wooweera khawaariirelavo.
7 Iso ikina saamorenle vamiiwani, mene miiwa sunnunwe vamoha ni iso iye saavuvuriwa.
8 Mene iso ikina saamorenle etthaya ya etxaatxira, simelakaru saahiimiha soowiima 100 opwaha ele yaalinwe. Amalihakaru ohima itthu iya, Yesu aahima ni masu oowiiwanyeya eeraka: “Ale eri ni maaru oowiiwa, yiiweke.”
9 Nto atthareli awe, yaamukoha woohima sa etthu naataphulelaaya niphwanaphwaniho nne.
10 Yesu owaakhula enre: “Nyuwo munnaakhuleliwa osuwela isiiri sa Omwene, mene, wa atthu akina hooye, itthu sootheene enleeliwa ni maphwanaphwaniho, weera yooneke mene enooneke vasiyoni vene, ni yiiweke mene kheniiwexexa.
11 Mene niphwanaphwaniho nna yootaphulelaaya tiila: iso, masu a Muluku.
12 Iye saamorenle muxerexere mwa musewe, atthu ale eneera yaiwakaru masu a Muluku, annawa Diabo anawaakha ele yaalinwe vamurimani vaya, ni yootthuna weera ehiroromele ni ehivuluxiwe.
13 Iye saamorenle vamalukuni, inaathoonyera atthu ale eneera yiiwa masu a Muluku, enaakhulela moohakalala mene khiyaanoono mikakaari. Ennakhalano nroromelo etempu ya vakhaaniini, mene etempu yooweereriwa, ennahiya ororomela.
14 Iso iye saamorenle vamiiwani, sinaathoonyera atthu ale eniiwa masu a Muluku, mene mwaha wa soovalaveliha sa ekumi, mihakhu ni otthuna opuha ennavuvura masu awo yiiwalaaya, nto khenwera wiimiha soowiima.
15 Iso iye saamorenle etthaya ya etxaatxira, sinaathoonyera atthu ale eneera yiiwakaru masu a Muluku, enaakhulela ni murima aya wootheene enakumihera soowiima evilelaka maxupo.
16 “Khaavo mutthu oneera apattiha muthuko aniiyaathi vathi vamuttanka naari anahiya vathi va ekaama, mene onheliwa vasulu weera atthu ootheene envolowa mpaani yooneke waara.
17 Mene khiyaavo etthu yiipithihinwe ehinrowa othupululiwa, ni khiyaavo etthu evithinwe nnene ehinrowa osuweliwa.
18 Tivanto, mwiiwexexeke nnene moota muniiwaanyu; woona weera yoole okhalanne onoovahiwa-tho, mene ole ohikhanleno onrowa waakhiwa mpaka yeele onuupuwelaawe weera ookhalano.”
19 Vano, ameyawe vamoha ni asinnawe yaaphiya, mene yaahootxeela omwaattamela owo, mwaha wooweera atthu yaari antxipale.
20 Vano atthu yaamweerela: “Ameyanyu ni asinninyu eri vaate vale antthuna owoonani.”
21 Vano Yesu aawaakhula atthu ale: “Ameyaka ni asinnaka ti yaala aniiwa masu a Muluku enavarela muteko.”
22 Nihiku nimoha, Yesu aaweerela atthareli awe: “Nrowe nlapuwele ekhopela ekina ya elaaku.” Vano, awo yaavolowa mpaarkuni ni yaapwaha.
23 Mene yeeraka weetta hiihaale, Yesu aakona. Nto mulaaku mmwe, yaakhumelela epheyo etokotoko, nto paarku aapatxera okhuneeliwa ni muteku-teku wa maahi ni aahanle oneela.
24 Nto mwaha wa yeeyo, yanvenxa yeeraka: “Muhusiha, Muhusiha, nihanle vakhaaniini okhwa!” Owo aavenya anamaaliha epheyo, ni muteku-teku wa maahi waamaala ni waakhala omaaleleya wa maahi.
25 Vano owo aahaakoha: “Nri woowiini nroromelo nanyu?” Mene awo yaahoova vantxipale ni otikhiniheya ni yanneerelana mukina ni mukhwaawe: “Mulopwana heeni yoola? owo onnalamula epheyo ni maahi ni iyo sinnamwiiwelela.”
26 Ni yaaphiya ekhopela ekina ya elaaku, muttetthe wa oGerasa, ekhopela ekina ya oGalileya.
27 Yesu akhuruwakaru, mulopwana mmoha a esidade ele aarino munepa woonanara aarowa okumana nuuwo. Yaavira etempu yintxipale owo ahiwaraka ikuwo naari khaakhala vaate mene aakhala munikhukuni.*
28 Mulopwana ole amoonakaru Yesu, aakhuwela ni aakokhora ohoolo wawe, amweerelaka moowiiwanyeya: “Yesu, Mwaana a Muluku mutokweene, muntthuna eheeni ni miyo? Kinnoovekelani weera muhikihooxe.”
29 (Yesu aalamula weera munepa woonanara ole omuhiye mulopwana ole. Mene ikwaha sintxipale wannanvara, ni mulopwana owo aatthukiwa ni ikorenti mmatatani, mmettoni ni annawehawehiwa, mene owo annapasa ikorenti iyo ni annakuxiwa ni demoniyu* aroihiwaka mapuro oohikhala atthu.)
30 Vano Yesu aamukoha: “Nsina nanyu taani?” Owo aahaakhula: “Nsina naka Lexiyawu,” mwaha wooweera aavariwa ni mademoniyu* mantxipale.
31 Minepa soonanara iye, sannamutxonttela Yesu weera ahivonyere nipuro noowiixa.
32 Vamwaako vaavale, saakhalavo ikuluwe saatxa; nto mwaha wa yeeyo, minepa iye soonanara sanvekela Yesu weera awaakhulele ovolowa mukuluweni, nto Yesu aahaakulela.
33 Vano, mademoniyu* yaamuhiya mulopwana ole enavolowa mukuluweni, ni ikuluwe iye saatthimakela nipuro noowiixera ni saahiivonyera mulaaku, sinattatta.
34 Vano, atthu yaatxiha ikuluwe yoonakaru etthu ele yeereñye, yaatthawa ni ephiyakaru osidade ni mmawaani yaahaaleela atthu etthu yeereñye.
35 Avinyaka, atthu yaarowa woona ele yeereñye. Emwaattamelakaru Yesu, yaamoona mulopwana ole yaakhummaayamo mademoniyu* awanreene, iisuwelaka, ni akilantheene nipuro aaraawevo* Yesu; ni atthu ale yaahoova.
36 Atthu yonne itthu iye seereyaka, yaahaaleela atthu awo moota mulopwana ole aarino minepa soonanara aalamihinwaawe.
37 Atthu antxipale a muttetthe wa oGerasa, ni soowaattamela, yanvekela Yesu weera akhume muttetthe ole mwaha wooweera yannoova vantxipale. Vano owo anwela paarku anapwaha.
38 Mene mulopwana ole saakhummaayamo minepa soonanara, annamutxonttela Yesu weera amuhiye orowa vamoha nuuwo, mene Yesu aamweerela aroweke owaani, eeraka:
39 “Mutthikeleke owaani ni mwavireleleke ohima itthu Muluku oopakenlaaweni.” Owo aapwaha owaani alaleyaka esidade yootheene itthu sootheene Yesu ampakenlaawe.
40 Yesu atthikakaru, muloko mutokotoko waatthu waamwaakhela mooreera murima, mwaha wooweera atthu ootheene yannanweherera.
41 Aahoowa mulopwana mmoha yoowo iitthaniwa Jairo; aari mutokweene amusinakooka. Ni owo aakokhora mmettoni mwa Yesu anapatxera omutxonttelela weera arowe owannyawe,
42 mwaha wooweera mwanawe mmoha ene mwaamuthiyana aarinono iyaakha 12, aahanle vakhaaniini okhwa. Yesu areene mphironi arooka, muloko mutokotoko wannamphunya.
43 Aakhala muthiyana mmoha aavirinhe iyaakha 12 ephome awe eyeeheyaka, ni khaavoovo mutthu aawenre omulamiha.
44 Owo aamwaattamela Yesu ottuli wawe ni aatava mukhwipi mwa maleya a Yesu, ni ovinya etempu ene yeele, ephome awe muthiyana ole yaahiya oyeeheya.
45 Nto mwaha wa yeeyo, Yesu aakoha: “Taani okitanve?” Nto woona weera atthu ootheene yannakhootta, Pedru aamweerela Yesu: “Muhusiha, muloko waatthu onnoorukurerani ni onnoophunyani.”
46 Mene Yesu aaheera: “Ookhala okitanve, mwaha wooweera koosuwela weera sookhuma ikuru murutthuni mwaka.”
47 Oonakaru weera yaahooneleliwa, muthiyana ole aamwaattamela Yesu athukumelaka ni aakokhora ohoolo wawe, ni aahima nthowa naamweerinhe omutava ni moota aalamihinwaiye woowaakuveya.
48 Mene Yesu aamweerela: “Mwanaka, murooke ni murettele, nroromelo nanyu, nohoolamihani.”
49 Yesu nlelo ariki wuuluma, aaphiya mutthu mmoha oowannyawe mutokweene a osinakooka, eeraka: “Mwaninyu ohookhwa. Muhimuxupe-tho muhusiha.”
50 Yesu iiwalaiye masu ale, aamweerela mutokweene* amusinakooka: “Muhoove, mukhaleno nroromelo paahi, ni mwaninyu onoovuluxiwa.”
51 Aphiyakaru vaate, Yesu khaakhulenle otthariwa ni mutthu mukina ohikhanle ni Pedru, Yohani ni Yakobe, vamoha ni apapawe ni ameyawe mwaaruusi ole.
52 Mene atthu ootheene yanninla ni wiikhupanyera mwaha wa mwaaruusi ole. Nto Yesu aaweerela: “Mmaale winla, mwaaruusi ola khakhwiiye onimweera okona.”
53 Mwaha wa masu ala, atthu yaapatxera omutheya moomuramusa mwaha wooweera yaasuwela weera mwaaruusi ole, ohookhwa.
54 Mene owo aavara ntata na mwaaruusi ole ni aamwiitthana: “Mwaaruusi, ovinye!”
55 Ni mwaaruusi ole aatthikela okhala mukumi ni Yesu aaruma weera avahiwe yootxa.
56 Nto asipapawe khiyaawera wiipithiha ohakalala waya, nto Yesu aaweerela weera ehimuleele mutthu mukina etthu ele yeereñye.
Footnotes
^ Naari: “mmahiyeni.”
^ Naari: “munepa woonanara.”
^ Naari: “minepa soonanara.”
^ Naari: “minepa soonanara.”
^ Naari: “minepa soonanara.”
^ Ni eKereku: “mmanaanini.”
^ Mutokweene onhimmwa va, Jairo.
