Silempwale ni Marko 1:1-45
-
Olaleya wa Yohani Mpatisa (1-8)
-
Opatisiwa wa Yesu (9-11)
-
Yesu onneereriwa ni Satana (12, 13)
-
Yesu onnapatxera olaleera oGalileya (14, 15)
-
Onnawiitthana atthareli awe oopatxera (16-20)
-
Munepa woonanara onnoomoliwa (21-28)
-
Yesu onnaalamiha atthu antxipale oKafarnawu (29-34)
-
Yesu onnapaka nivekelo nipuro noohikhala atthu (35-39)
-
Namakokho mmoha onnalamihiwa (40-45)
1 Opatxera wa mitthenka sooreera woohima sa Yesu Kristu, Mwaana a Muluku.
2 Ntoko elempwalaaya ni profeta Yesaya: “(Nkawehani! Kinoomurumiha namitthenka ohoolo waa, yoowo aneera areherere mphirwaa.)
3 Nsu na mutthu ninnakhuwela onikareni* neeraka: ‘Mureherere ephiro ya Yehova! Mookolole misewe sawe.’”
4 Yohani Mpatisa, aari onikareni* aalaleeraka atthu weera opatiso ethoonyero ya orukunuxa murima weera mutthu aleveleliwe soottheka sawe.
5 Atthu ootheene a muttetthe wa oYudeya ni atthu ootheene yaakhala oYerusalemu, yannarowa okumana ni Yohani ni yannapatisiwa* nuuwo mmoolokoni Yordani nave-tho yannahima soottheka saya sootheene.
6 Yohani aawara ikuwo soopakiwa ni mapururu a ikamelu ni muyuununi mwawe anniitthukela sintu a exapala. Yootxa awe saari misoope ni oravo wa mutuphini.
7 Owo annalaleya eeraka: “Ottuli waka, onnawa mutthu ooweraxa okipwaha miyo, ni miyo nkiphwanenle wuurama ni otaphula mikoyi sa isantaaliya sawe.
8 Miyo koopatisani ni maahi, mene owo onkela woopatisakani ni munepa wootteela.”
9 Mahiku ene yaale, Yesu aakhuma oNazareti wa oGalileya ni aarowa opatisiwa ni Yohani mmoolokoni Yordani.
10 Akhumakaru mmaahini, moowaakuveya Yesu aahoona erimu ehuleyaka ni aahoona munepa wa Muluku omukhuruwelaka ntoko epompa.
11 Nave-tho, naahiwanyeya nsu naakhuma wiirimu neeraka: “Nyuwo Mwanaka, oosiveleyaxa, mwa nyuwo kinnahakalala.”
12 Moowaakuveya, munepa wootteela waamweeriha owo orowa onikareni.*
13 Nto, aakhala onikareni mahiku 40, ni aaheereriwa ni Satana. Owo aari ni asinama amutuphini ni malaika yannamukhavihera.
14 Atthukiwakaru Yohani, Yesu aarowa oGalileya alaleyaka mitthenka sooreera sa Muluku
15 eeraka: “Yoophiya etempu yaalaiherinwe, ni Omwene wa Muluku wohaattamela. Murukunuxe mirima sanyu ni muroromeleke mitthenka sooreera.”
16 Eettaka muxerexere mwa ephareya ya oGalileya aamoona Simoni ni Andreya munnawe Simoni. Awosa yaavonyera ntthavi mphareya woona weera yaari anamatotha a ihopa.
17 Ni Yesu aaweerela: “Mukitthare miyo, weera kookhaliheni anamatotha aatthu.”
18 Ni moowaakuveya, awosa yaahiya matthavi aya ni yaamutthara Yesu.
19 Eheettale seetthu, Yesu aamoona Yakobe mwaana a Zebedeyo ni munnawe Yohani, erehererakasa ntthavi mpaarkuni,
20 ni moohipisa owo aawiitthana. Awosa yaahaahiya apapaya, mpaarkuni vamoha ni anamuteko, enamuttharasa Yesu.
21 Awo yaarowa oKafarnawu.
Niphiyakaru nihiku na esaabadu, Yesu aavolowa musinakooka anapatxera oxuttiha.
22 Ni atthu yaatikhiniheya mwaha wa moota aaxuttihaawe, woona weera owo aaxuttiha ntoko mutthu aavahinwe owera ni Muluku, ohiya ntoko alipa oolepa.
23 Etempu ene yeele, musinakookani mmwe aakhalamo mulopwana mmoha aarinono munepa woonanara. Nto mulopwana owo aakhuwela eeraka:
24 “Yesu muNazareti, muntthuna eheeni ni hiyo? Mwaawenle oninyaanya? Miyo kohoosuwelani nyuwo taani: nyuwo Ootteela murummwale ni Muluku!”
25 Mene Yesu, aamuximwela amweerelaka: “Omaale, ni omuhiye mulopwana owo!”
26 Munepa ole woonanara onvonyerakaru vathi mulopwana ole, aathukumela ni aakhuwela ni mmilo awe wootheene ni munepa ole woonanara waamuhiya.
27 Nto atthu ootheene yaatikhiniheya ni yaapatxera okohana yaaworu yeeraka: “Eheeniila? Oxuttiha onyowani! Owo onnalamulela minepa soonanara ni minepa iyo sinnamwiiwelela.”
28 Nto etthu ele aapankaawe Yesu, yaahiiwanyeya iparte sootheene sa oGalileya.
29 Evinyakaru musinakooka, Yesu vamoha ni Yakobe ni Yohani yaarowa owannyawe Simoni ni Andreya.
30 Apwiyamwaana awe Simoni yeera yiisaatalenleene evoreiwaka efeepere* moowaakuveya, aaleeliwa Yesu.
31 Yesu aarowa nipuro yaaraayavo aahaavara ntata ni aaweemexa nto efeepere yaahaamaala ni yaapatxera omwaapeela yootxa.
32 Wiilakaru nsuwa nriki oneelaru, atthu yaahaakuxa aretta ootheene ni atthu yaarino minepa soonanara enamuroihela Yesu;
33 ni atthu ootheene a esidade ele yaathukumana vamulako.
34 Nto owo, aahaalamiha atthu yaavoreiwa iretta soovirikana ni aahoomola minepa soonanara. Mene khaahiya minepa iyo soonanara suulumaka, woona weera iyo, saasuwela weera owo aari Kristu.
35 Oxeexelo nsuwa nihinaaye okhuma, aavinya anarowa nipuro noohikhala atthu, aphiyakaru nipuro nno aapatxera ovekela.
36 Moowi hiihaale, Simoni ni atthu akina aaraaweno, yaarowa omwaasaasa.
37 Emphwanyakaru, yaamweerela: “Atthu ootheene enoowaasani.”
38 Nto Yesu aaweerela: “Nrowe mittetthe ikina soowaattamela weera miyo-tho kalaleere weiwo, woona weera tiyeeyo miyo kaawenlaaka.”
39 Vano, owo aaheetteetta muttetthe wootheene wa oGalileya alaleyaka musinakookani mwaya ni oomolaka minepa soonanara.
40 Namakokho mmoha aamwaattamela anamutxonttela akokhonreene, eeraka: “Pwiya, mwatthuna vale, mukilamihe.”
41 Nto Yesu, ammorela ikharari mulopwana ole; ni aahookola ntata nawe anamutava eeraka: “Miyo kinnatthuna weera mulame!”
42 Moohipisa, aalama.
43 Mene Yesu aamweerela, orooke ni aamuleela moowiiwanyeya weera:
44 “Mwiikosoope weera muhimuleele mutthu etthu ela, mene murowe mwiisooneihe wa anamakeya ni mwavahe mukuttho Mose aahimmaawe mwaha wa olamihiwa wanyu weera awo esuwele weera moolamihiwa.”
45 Avinyakaru vale, mulopwana ole aapatxera olaleya muttetthe wootheene etthu aapakelinwaawe. Nto mwaha wa yeeyo, Yesu khaawera ovolowa osidade ooniwaka, nto aakhala mapuro avaate yahaattela okhala atthu. Nnaamweera vareene hiiho, atthu amittetthe soovirikana yannawa okumana nuuwo.
