Silempwale ni Marko 10:1-52
-
Ekasamentu ni omwalana (1-12)
-
Yesu onnaareeliha anamwane (13-16)
-
Nikoho na mulopwana a muhakhu (17-25)
-
Itthu atthu empakaaya weera ephwanye Omwene (26-31)
-
Okhwa wa Yesu onnahimmwa veeli (32-34)
-
Yoovekela ya Yakobe ni Yohani (35-45)
-
Yesu nlivo noowaavuluxa atthu antxipale (45)
-
-
Mulipa oohoona iitthaniwa Baritimeyo onnalamihiwa (46-52)
10 Yesu aakhuma nipuro nne, anarowa mwiilaano* wa oYudeya, ekhopela ekina ya mooloko Yordani, ni muloko mutokotoko waatthu waamurukurera-tho. Yesu aapatxera waaxuttiha ntoko eerelaiyeno.
2 Afarisi akina yaamwaattamela Yesu, etthunaka omweerera, yaamukoha waari weera mulopwana onnaakhuleliwa waahiya amwaarawe.
3 Yesu aawaakhula aakohaka ha: “Mose, oolamunleni eheeni?”
4 Awo waakhula yenre: “Mose aalamunle weera mulopwana amulepeleke mwaarawe etokumentu ya omwalana ni amoomoleke.”
5 Yesu owaakhula enre: “Waari mwaha woowuuma wanyu murima Mose oovanhaaweni nlamulo nna.
6 Mene woopatxerani, ‘Muluku ampanke mulopwana ni muthiyana.
7 Tivawonto, mulopwana onkelaawe waahiya apapawe ni ameyawe,
8 ni ooweeli aya enrowa okhala erutthu emoha,’ nto ovinyera vaavo, khasikhanle irutthu piili,* menento erutthu emoha paahi.
9 Tivawonto, ele Muluku ophitaanyalaawe mutthu ahimwalanyihe.”
10 Ereene mpaani, atthareli yaamukoha Yesu, woohima sa mwaha ene yoola.
11 Owo aaweerela: “Ole ommwalana ni amwaarawe ni anamuthela muthiyana mukina, onoomuraruwela mwaariye,
12 ni wakhala weera muthiyana oomwalana ni aiyawe, anathelana ni mulopwana mukina, onoomuraruwela iyawe.”
13 Vano atthu yaapatxera omuroihela Yesu anamwane weera aatave, mene atthareli yaahaakhoottihera atthu weera ehimuroihele Yesu anamwane.
14 Yesu oonakaru etthu ele, khawaamusivenlevo ni aaweerela: “Muhaakhoottihere anamwane owa wa miyo. Muhaakhoottihere, woona weera, Omwene wa Muluku ti waatthu ale enkhala ntoko anamwane ala.
15 Kinnooleelani ekhaikhai weera: Ole ohinkela waakhela Omwene wa Muluku ntoko mwaana, ahiweherere weera onoovolowa Moomweneni mmo.”
16 Owo aahaakhupaarela anamwane ni aapatxera waareeliha awiiyaatheraka matata awe.
17 Vaavo aakhumaawe, mulopwana mmoha aaphiya ariki otthimaka, aakokhora ohoolo wawe ni aamukoha ha: “Muhusiha ooreera, etthu heeni kintthuneyaaka opaka weera kaphwanye ekumi yoohimala?”
18 Yesu aamwaakhula: “Mwaha wa heeni nyuwo munkiitthanaanyu Muhusiha ooreera? Khaavo ori ooreera, ahikhanle Muluku paahi.
19 Nyuwo moosuwela malamulo eneera: ‘Muhiive; muhiraruwe; muhiiye; ohimukhalele onamoona woowootha mukhwaa; muhoothe; mwaattittimihe apapinyu ni ameyanyu.’”
20 Mulopwana ole aamweerela: “Muhusiha, miyo kinnakwanihera malamulo ootheene ala ovinyera emiravo aka.”
21 Yesu anweha mulopwana ole, nto woona weera annamusivela, aamweerela: “Ennoohalelani etthu emoha: murowe mwatumihe itthu muraanyuno, ni musurukhu ene yoowo mwaavahe atthu oohaawa, mwapaka eyo, munookhalano muhakhu wiirimu; ni nwe mukhale mutthareli aka.”
22 Ariipinweene murima mwaha wa masu a Yesu, aapwaha mwaha wooweera aakhalano itthu sintxipale sa weerutthuni.
23 Yesu awehakaru mukhwipi, aaweerela atthareli awe: “Moota onkelaaya okhala wooxupa atthu erino musurukhu mwintxipale ovolowa Moomweneni wa Muluku!”
24 Mene atthareli ale yaatikhiniheya ni masu a Yesu. Yesu aaweerela: “Anamwane aka, moota oraaya wooxupa ovolowa Moomweneni wa Muluku!
25 Ti vookhweya ekamelu ovolowa va mwiitheni wa sinkano, ohiya namuhakhu ovolowa Moomweneni wa Muluku.”
26 Atthareli yiiwakaru eyo, yaatikhiniheya vantxipale ni yaamukoha* ha: “Taaninto aneera avuluxiwe?”
27 Yesu aahaawehexexa awo anaweerela: “Vamaithoni va atthu eyo ti yoohiwereya, mene vamaithoni va Muluku, itthu sootheene ti soowereya.”
28 Pedru aapatxera wuuluma eeraka: “Nkawehani, noohiya itthu sootheene nnoottharani.”
29 Yesu aahaakhula eeraka: “Miyo kinnoororomelihani weera: Khaavo ohiñye empa, munnawe, asirokora awe, ameyawe, apapawe, anamwane awe naari ematta awe mwaha wa nsina naka ni mwaha wa mitthenka sooreera,
30 aneera ahaakhele itthu sintxipale etempu ela, impa, asinnawe, asirokorawe, ameyawe, anamwane awe, ni imatta sawe ni ottharatthariwa, ni muhoolo omamaliheroni wa itthu soonanara sa elapo ela* ekumi yoohimala.
31 Antxipale eri oopatxera, enkela okhala oomalihera, ni antxipale eri oomalihera enkela okhala oopatxera.”
32 Vano yeettaka mmuseweni erowaka oYerusalemu, Yesu aari ohoolo, nto atthareli awe yaatikhiniheya vantxipale; mene ale yaamutthara yannoova. Yesu aawiitthana-tho atthareli awe ale 12 wiiphiini, anapatxera waaleela itthu saakela omweereela:
33 “Mwiiwe, ninkela oYerusalemu ni Mwaana a Mutthu onimwinnyereriwa mmatatani mwa asitokweene aanamakeya ni mwa alipa oolepa. Ni awo enoomwiiva ni enonveleela mmatatani mwa amalapo,
34 ni awo enompuhera,* omusenyera, onwaxula ni omwiiva, mene onookela ovinyererihiwa nihiku nanaararu.”
35 Anamwane a Zebedeyo Yakobe ni Yohani, yaamwaattamela Yesu enamweerela: “Muhusiha, munivahe etthu ninkelaahu woovekelani.”
36 Yesu aahaakohasa: “Muntthuna weera miyo koopakeleni eheeni?”
37 Omwaakhula yenre: “Ninveka weera mmoha a hiyo, akilaathi moono anyu woolopwana ni mukina woothiyana moovuwani mwanyu.”
38 Yesu owaakhula enre: “Nyuwosa khamusuwenle etthu munvekelaanyu. Neereke munoowurera ekoopho yeeyo kinwureraaka? Naari munoopatisiwa ni opatiso yoowo kimpatisiwaaka?”
39 Omwaakhula yenre: “Aani.” Vano Yesu aaweerela: “Nyuwosa munoowurera ekoopho kinwureraaka, ni munoopatisiwa ni opatiso kipatisinwaakano.
40 Mene okilaathi moono woolopwana naari woothiyana, khaiyene muritti aka. Mene mapuro ala taatthu ale ethanlelinwe.”
41 Atthareli akina 10, esuwelakaru eyo, yaamunyoonyeriwa Yakobe ni Yohani.
42 Mene Yesu aawiitthana atthareli awe ootheene ni aaweerela: “Nyuwosa moosuwela weera anamalamulela a mulaponi, ennaalamulela atthu ntoko entthunelaaya, ni asitokweene ennavarela muteko ikuru saya weera yaawere atthu.
43 Nto eheereye hiiha wa nyuwo, mene ole ontthuna okhala mutokweene variyari vanyu, ontthuneya okhala kaporo anyu.
44 Ni ole ontthuna okhala oopatxera variyari vanyu, ontthuneya weera akhaleke kaporo aatthu ootheene.
45 Hiiho-tho, mpaka Mwaana a Mutthu, owiiye khaiyene weera avareliweke muteko, mene weera aavareleke muteko atthu ni oveleela ekumi awe ntoko nlivo weera aavuluxe atthu antxipale.”
46 Awosa yaaphiya oYerikho. Mene vaavo owo vamoha ni atthareli awe ni muloko mutokotoko waatthu waakhumaaya oYerikho, Baritimeyo mwaana a Timeyo, mulopwana mmoha aaveka eximola, eera akilantheene muxerexere mwa musewe.
47 Iiwakaru weera aari Yesu Munazareti, owo aapatxera okhuwela eeraka: “Yesu mwaana a Davidi, mukimorele ikharari!”
48 Nto mwaha wa yeeyo, atthu antxipale yaapatxera omweewula emweerelaka, mmaale, mene owo aamweera ovirelela okhuwela vantxipale eeraka: “Mwaana a Davidi, mukimorele ikharari!”
49 Nto Yesu aaheemela ni aaheera: “Mmwiitthane.” Nto atthu yaamwiitthana mulipa oohoona ole emweerelaka: “Mulipe murima! Nvinye, owo onoowiitthanani.”
50 Avonyeraka maleya awe okhwipi, aavinya moowaakuveya anarowa aaraiyewo Yesu.
51 Vano Yesu aamukoha: “Muntthuna weera koopakeleni eheeni?” Mulipa oohoona ole aamwaakhula eeraka: “Rabi,* kintthuna weera kitthikele woona.”
52 Ni Yesu, aamweerela: “Muroweke, nroromelo nanyu, nohoolamihani.” Ni mulopwana ole, moohipisa aatthikela woona ni aapatxera omutthara Yesu musewe aarowaawewo.
Footnotes
^ Naari: “ofronteera.”
^ Naari: “khekhanle atthu eeli.”
^ Apaale: “yaakohana mukina ni mukhwaawe.”
^ Naari: “enonveeha.”
^ Entaphulela Muhusiha.
