Silempwale ni Marko 12:1-44
12 Nto Yesu, aapatxera wuuluma naawo avarelaka muteko maphwanaphwaniho: “Mulopwana mmoha aarino ematta ya ewuuva, aapaka mukuso arukurerihaka ematta awe, aapaka etanki ni aathipa nlitti noowattela iwuuva, nave aateka empa* yoorakamela musulu; muhoolo mwaya, aahaahiyera anamalima ematta ele ni aarowa elapo ekina.
2 Vano, iwuuva siitthwalaaya, mwaneene ematta aamuruma kaporo awe wa anamalima weera yakuxe soowiima sawe.
3 Mene awosa, yanvara enammana, ni enamoomola matataru.*
4 Aamurumiha kaporo mukina ni anamalima ale, yammana vamuru ni yanveeha.
5 Vano aamurumiha mukina, nto alimi ale, yaamwiiva; ni aahaarumiha-tho akaporo akina antxipale: mene akina a yaawo, yaahaamana ni akina yaawiiva.
6 Mwaneene ematta ole, aahalano mutthu mmoha, mwanawe aamusivelaawexa. Nto okhwipi waya, aahaarumihelasa mwanawe owo eeraka: ‘Ola mwanaka, enoomuttittimihasa.’
7 Nto alimi ale, yaahuuluma yaaworu yeeraka: ‘Ola taneera ahiyeriwe ematta ela. Vano nrowe nimwiive weera nihaleno yoohiyeriwaawe.’
8 Nto awosa, yanvara enamwiiva ni enamukumihera vaate va ematta ele ya iwuuva.
9 Vanonto mwaneene ematta, onkela waapakela eheeni anamalima ale? Onootthika ni onoowiiva anamalima ale, ni onoowinnyerera ematta ele ya ewuuva, anamalima akina.
10 Nyuwosa khamusomme yoolepa eneera: ‘Nluku anamateka yaakhonttaaya, naakhalihiwa nluku noolipiha empa.
11 Nluku nno ninkhuma wa Yehova, ni ti yootikhiniha vamaithoni vahu’.”
12 Nto mwaha wa yeeyo, yaatthuna onvara mwaha wooweera yaasuwela weera owo aapaka niphwanaphwaniho nne aahimaka yaawo. Mene awosa, yannoova muloko mutokotoko waatthu, nto mwaha wa yeeyo, yaamuhiya enapwahasa.
13 Avinyaka afarisi yaahaaruma atthareli aya, vamoha ni atthareli a Herodi, weera yanvare Yesu ni masu awe.
14 Ephiyakaru, awosa yaamweerela: “Muhusiha, hiyo noosuwela weera nyuwo munuuluma ekhaikhai ni khamunaasaasa waasiveliha atthu, mwaha wooweera khamwaanoono nthalu* mene munxuttiha ikhaikhai sa Muluku, moovarihana ni ekhaikhai. Onnareerela omuliva mpostu* Sesare, naari hooye?
15 Nimuliveke naari nihimuliveke?” Yesu asuwelaka murima aya, aaweerela: “Mwaha wa heeni munkeereraanyu? Mukiwiihere etenaariyu emoha weera koone.”
16 Yanwiihera etenaariyu emoha, nto Yesu aahaakoha: “Ekhove ni yoolepa ela eri va, ti yawani?” Yaamwaakhula: “Ti ya Sesare.”
17 Nto Yesu aaweerela: “Munvaheke Sesare eri ya Sesare, ya Muluku eri ya Muluku.” Nto yaatikhiniheya nuuwo.
18 Nto asaduki yaale enhima weera khawaavoovo ovinyerera, yaamwaattamela enamukoha ha:
19 “Muhusiha, Mose oonilepela eeraka: Mulopwana akhwa vale ahimuyanre mwaana, munnawe aatheleke akunyaata awe,* weera amuyarele mwaana munnawe.
20 Mene yaakhala alopwana seete yaawo yaari asinna. Oopatxera aamuthela muthiyana nto ahinaaye omuyara mwaana aakhwa.
21 Ni anaaveeli aahaathela-tho akunyaata awe ale yaakhwelinwe, nto ahinaaye omuyara mwaana aakhwa-tho, ni yaaheereya-tho etthu emoha-moharu ni anaararu.
22 Ni khaavo wa alopwana ale seete yaawo yaari asinna, aamuyanre mwaana ni muthiyana ole. Omamaliheroni, muthiyana ole aahookhwa.
23 Vanonto, woovinyererihiwani wa alipa ookhwa, muthiyana ola, anaakhale mwaara awani? Noonaka weera asinna ale seete ootheene yaamuthela.”
24 Yesu aaweerela: “Nyuwosa khamusuwenle Soolepa naari owera wa Muluku. Tivanto muniisootothaanyu.
25 Woona weera emaara enkelaaya ovinyererihiwa alipa ookhwa, alopwana khethelaka ni athiyana khetheliwaka, woona weera enkela olikanaka ni malaika a wiirimu.
26 Woohima sa ovinyererihiwa wa alipa ookhwa, khamusomme ele Muluku aamulenlaawe Mose vamwirini* mukhaanini wa miiwa, amweerelaka: ‘Miyo Muluku Abrahamu, a Isakhi ni Muluku a Yakobe’?
27 Owo Muluku aatthu akumi, khaiyene Muluku aatthu ookhwa. Nyuwosa munimwiisoototha.”
28 Mulipa oolepa mmoha aari vale iiwa emaara awo yuulumaaya, oonakaru weera Yesu aahaakhula nnene, aamukoha: “Nlamulo heeni nri noopatxera* a malamulo?”
29 Yesu aahaakhula: “Nlamulo noopatxera tinna: ‘Mwiiwe nyuwo ana a Israeli, Yehova Muluku ahu, ori mmoha paahi, Yehova.
30 Omusivele Yehova Muluku aa, ni murimaa wootheene, ni ekumi* aa yootheene, ni muupuwelo aa wootheene, ni ikuru sanyu sootheene.’
31 Nlamulo nanaaveeli tinna: ‘Omusivele mukhwaa ntoko oniisivelaawe.’ Khayaavo-tho malamulo makina ootepa otthuneya opwaha ala meeli.”
32 Mulipa oolepa ole, aamweerela: “Muhusiha, mohuuluma nnene, moovarihana ni ekhaikhai: ‘Owo Muluku mmoha paahi ni khakhanle Muluku mukina’,
33 Omusivela Muluku ni murima ahu wootheene, ni muupuwelo ahu wootheene, ni ikuru sootheene, ni omusivela mukhwiihu ntoko nniisivelaahu, ti wootepaxa otthuneya opwaha soovaha sootheene soohisiwa ni mikuttho.”*
34 Nto Yesu oonakaru weera aahaakhula nnene, aamweerela: “Omwene wa Muluku khawoorakamenleni.” Nto khaavo-tho eerera ompaka makoho.
35 Yesu ariki oxuttiha nlelo mutemplu, aakoha: “Vanonto moota heeni alipa oolepa enhimaaya weera Kristu mwaana a Davidi?
36 Davidi uupuxeriwaka ni munepa wootteela wa Muluku, ohimme ha: ‘Yehova ooweerela Apwiyaka: “Mukilaathi moono aka woolopwana mpaka miyo waavonyera vathi vamanaani aa, amwiittanaa.”’
37 Vano Davidi, aamwiitthanaka Apwiya, moota heeni onkelaawe okhala mwanawe?”
Ni muloko mutokotoko waatthu wannanwiriyana moohakalala.
38 Ni owo annaxuttiha eeraka: “Mwiikosoope ni alipa oolepa, aneetta ewanreene mikwansu, ni waasivela wuulumihiwa mapuro oowaatta atthu,
39 okilaathi ikatera soopatxera sa musinakooka, ni okilaathela mapuro oottittimiheya anfeestani.
40 Awosa ennawiiyera itthu asinaamukhweli, ni ennapaka mavekelo oorakama weera yooniwe ni atthu. Awo enoothorihiwa wootepaxa.”
41 Yesu aakilaathi vakhiviru va ikoofiri ni aapatxera owoona atthu ehelaka musurukhu mukoofirini mmwe, ni anamuhakhu antxipale yannahelamo musurukhu mwintxipale.
42 Aaphiya muthiyana mmoha naamukhweli, ni aahelamo mukoofirini mmwe makhoopiri meeli,* oohikhalano mwiitti.*
43 Vaavale, Yesu aawiitthana atthareli awe, anaweerela: “Kinnooleelani ekhaikhai weera: Muthiyana ola naamukhweli, oovonyeramo mukoofirini mu, musurukhu waapwaha atthu ootheene evonyenremo.
44 Woona weera ootheene yaale evonyenremo musurukhu* yaahanlaayano, mene muthiyana ola naamukhweli, moohaawani mwawe, ovonyenremo itthu sootheene aaraaweno weera akhale mukumi.”
Footnotes
^ Empa ela yaavareliwa muteko weera ewehawehiweke anamwiiya, naari asinama weera ehivolowe mmatta.
^ Naari: “ehimwinnyale etthu.”
^ Naari: “khamunweha mikhalelo saatthu.”
^ Naari: “musonkho.”
^ Ni eKereku: “naamukhweli.”
^ Mwiri onhimmwa va, mwiri yoole waapantte emaara Muluku uulumaawe ni Mose.
^ Naari: “nootepa otthuneya.”
^ Naari: “makeya.”
^ Ni eKereku: “ileeptoni piili.”
^ Naari: “amuttenko vakhaaniini.”
^ Naari: “itoroku.”
