Silempwale ni Marko 14:1-72
-
Asitokweene aanamakeya enaasaasera omwiiva Yesu (1, 2)
-
Makhura oowinkhela ennayeeheriwa va muru wa Yesu (3-9)
-
Yuda onnanvariha Yesu (10, 11)
-
Mpaasika oomalihera (12-21)
-
Opatxeriwa wa Yootxa ya Apwiya (22-26)
-
Yesu onnahima weera Pedru ammukhootta (27-31)
-
Yesu onnaapaka nivekelo oJethesemani (32-42)
-
Yesu onnavarihiwa (43-52)
-
Othorihiwa wa Yesu osineetriyu (53-65)
-
Pedru onnamukhootta Yesu (66-72)
14 Yavira mahiku meeli, aarowa okhala Mpaasika ni Efeesta ya Ipaawu soohiheliwa Efaramenta. Ni asitokweene aanamakeya ni alipa oolepa yeera yaasaasaka moota* yeeraaya envare ni omwiiva Yesu.
2 awosa yanneerelana: “Nihipake eyo variyari va efeesta weera ohikhale onyakuleleya variyari va atthu.”
3 Areene oBetania atxaaka* owannyawe Simoni namakokho, aahoowa muthiyana mmoha akunxeene ekarafa* ya makhura oowinkhela ni oorika yaapakinwe ni naartu oohitakanseriwa etthu. Aahula ekarafa ya alabastru ni aapatxera omuyeehera Yesu vamuru.
4 Nto mwaha wa yeeyo, akina yaari vale yaatikhiniheya ni yannuuluma yaaworu yeeraka: “Ennanariheliwani makhura ala oowinkhela?
5 Makhura ala yaakela otumihiwa ni itenaariyu* soopwaha 300, ni musurukhu ene yoowo ovahiwa alipa oohaawa!” Awo yaananariwa* vantxipale ni muthiyana ole.
6 Vano, Yesu aaweerela: “Mmuhiye, mwaha wa heeni mummuxupaanyu muthiyana ola? Ola ookipakela etthu yootepa oreera.
7 Mwaha wooweera nyuwo muneereke okhala ni atthu oohaawa mahiku ootheene ni muneereke waapakela itthu sooreera ikwaha sootheene muneeraanyu mutthuneke, mene ni miyo, khamunrowa okhalaka mahiku ootheene.
8 Muthiyana ola opanke ele onweraawe; oyeehenre erutthu aka makhura ala oowinkhela, arehereraka ovithiwa waka.
9 Kinnooleelani ekhaikhai weera mapuro ootheene ineeraaya silaleiwe mitthenka sooreera, itthu sootheene okipakenlaawe muthiyana ola sineereke wuulummwa uupuweliwaka.”
10 Yuda Iskarioti mmoha aarummwa ale 12, aarowa wa asitokweene aanamakeya ni yootthuna weera awinnyerere* Yesu mmatatani mwaya.
11 Asitokweene aanamakeya yiiwakaru eyo, yaahakalala vantxipale ni yaamulaihera onvaha musurukhu wa iparatha. Ovinyera vaavale, Yuda Iskarioti aapatxera waasaasa moota wonvariha Yesu.
12 Nto nihiku noopatxera na Efeesta ya Ipaawu soohiheliwa Efaramenta, nihiku nenno waavahiwa mukuttho wa Mpaasika, atthareli yaamukoha Yesu: “Muntthuna weera nareherere woowiini yootxa ya Mpaasika?”
13 Nto mwaha wa yeeyo, aahaarumiha atthareli awe eeli aweerelaka: “Murowe osidade, onimoophwanyani mulopwana mmoha akunxeene mwaapu wa maahi. Mmutthare yoowo,
14 ni empa eri poothe owo onkelaiye ovolowa, mmweerele mwaneene empa: ‘Muhusiha enre: “Nipuro na aletto ninkhala vaaviini, weera miyo vamoha ni atthareli aka nimutxe Mpaasika?”’
15 Ni owo, onoowooniherani nipuro ntokotoko noosulu noorehereriweene. Mwamureherere weiwo Mpaasika.”
16 Nto atthareli yaarowa enaphiya osidade, yaaphwannye itthu sootheene ntoko Yesu aahimenraawe ni yaareherera yootxa ya Mpaasika.
17 Wiilakaru, Yesu aaphiya ni arummwa 12.
18 Eriki otxa hiihaale ehaamenleene emeesa, Yesu aaheera: “Kinnooleelani ekhaikhai weera mmoha a nyuwo ontxa ni miyo, onookivariha.”
19 Awosa waapatxera waariipa murima, ni mutthu ti mutthu a yaawo annamukoha Yesu eeraka: “Apwiya, neereke ti miyo?”
20 Yesu owaakhula enre: “Ti mmoha a nyuwo 12, yoole onrera vamoha ni miyo mutixelani.
21 Woona weera Mwaana a Mutthu onoopwaha ntoko hiihaale silempwalaaya woohima sa yoowo. Menento ole onanvarihe Mwaana a Mutthu, phataari mutthu owo ahaayarinwe.”
22 Nto etxaaka hiihaale, Yesu aakuxa epaawu, avekelakaru, aakawanya anaavaha atthareli awe eeraka: “Mukuxe; ela enthoonyera erutthu aka.”
23 Ni aakuxa ekoopho ya eviinyu, aavekela, avinyaka aahaavaha atthareli awe, ni ootheene yaawura.
24 Ni owo aaweerela: “Ela enthoonyera ephome aka ya nivarihano, yeeyo enkela oyeehiwa weera siliviwe soottheka saatthu antxipale.
25 Kinnooleelani ekhaikhai weera: Nkiwa kitthikela-tho owura soowiima sa mwiri wa iwuuva, mpaka nihiku nenno kinkelaaka owura eviinyu enyowani Moomweneni mwa Muluku.”
26 Yiipakaru itxipo,* yaarowa omwaako wa Oliveira.
27 Yesu aaweerela: “Ootheene nyuwo munookihiya, woona weera yoolempwa: ‘Kinrowa onvulaliha mukukhuli, ni iputtiputthi sinoomwaramwareya.’
28 Mene kavinyererihiwa vale, kinoohoola kirowaka oGalileya.”
29 Mene Pedru aamweerela: “Nnaamweera atthu ootheene ala yoohiyakani, miyo nkiwa koohiyaani.”
30 Nto mwaha wa yeeyo, Yesu aamweerela Pedru: “Kinnooleelani ekhaikhai weera olelo, aani, ohiyu ene yoola muthupi ohinaaye wiipa ikwaha piili, nyuwo munoorowa okikhootta ikwaha tthaaru.”
31 Mene Pedru aanyeserera eeraka: “Yakhala etthu kikhwe ni nyuwo mene wookhoottani hooye.” Nto atthareli ootheene yaapatxera ohima etthu emoha-moharu.
32 Aphiyakaru nipuro niitthaniwa oJethesemani, Yesu aaweerela atthareli awe: “Mukilaathi va miyo kavekele.”
33 Ni aamukuxa Pedru, Yakobe ni Yohani, aapatxera othanana ni oriipiwa murima.
34 Nto aaweerela: “Wookiriipa murima vantxipale mpaka ohalela okhwa. Muhale vaava ni mukhale oowehaweha.”
35 Eettaka vakhaaniini akelaka ohoolo, aahuuramela vathi anapatxera ovekela, weera vawereya etempu eyo ya maxupo, ehiphiye.
36 Ni aaheera: “Aba,* Tiithi, wa nyuwo itthu sootheene ti soowereya; muhiye ekoopho ela eviraka. Mene, yeereye moovarihana ni moota nyuwo muntthunaanyu, khaiyene moota miyo kintthunaaka.”
37 Owo atthikaka aaphwannye ekonaka ni aamweerela Pedru: “Simoni, munookona? Khanwenre okhala ni ikuru weera mukhale oohikona naari ewoora emoha?
38 Mukhale oowehaweha ni nvirelele ovekela weera muhimorele mooweereriwani. Murima wa mutthu pooti otthuna opaka etthu menento erutthu ya mutthu, ti yootteettheya.”
39 Owo aasusa ekwaha ekina ni aavekela, ahimaka etthu emoha-moharu.
40 Atthikelaka ekwaha yanaaveeli wa atthareli awe, aaphwannyesa eriki okona mwaha wooweera saahaavola ikhove, tivanto khiyaasuwela yoomwaakhula.
41 Atthikelaka ekwaha yanaararu aaweerela: “Mwa ewoora ntoko ela nyuwosa munimweera okona mwiitthuuwaka! Paahi! Yoophiya ewoora! Mwaana a Mutthu onkelaawe winnyereriwa* mmatatani mwa anamattheka.
42 Nvinye, nrowe. Ole oneera okivarihe oophiya.”
43 Woohipisa ariki wuuluma hiihaale, aaphiya Yuda mmoha aatthareli ale 12, vamoha nuuwo muloko mutokotoko waatthu ekunxeene ikatana saya ni ikopo. Atthu awo, yaarummwale ni asitokweene aanamakeya, alipa oolepa ni asitokweene aayuda.
44 Yoole eera anvarihe, aahaavaha ethoonyero awo eeraka: “Yoowo kineeraaka kinvahe epeexu, ti yoowo munvare, muhimuhiye atthawaka.”
45 Vano, amwaattamelaka owo aaheera: “Rabi!” ni ampexari.
46 Nto atthu yaari ni Yuda yanvara Yesu enamutthuka.
47 Nto mmoha aari vale, aahulula ekatana anathikila naaru na kaporo anamakeya mutokweene.
48 Mene Yesu aahaakoha: “Nwiiye okitthuka ntoko namwiiya ni ikatana ni mikopo?
49 Mahiku ootheene miyo kaakilaathi ni nyuwo mutemplu kixuttihaka; menento nyuwo khamwaakivara. Mene itthu iya sineereya weera sikwanele soolepa.”
50 Nto atthareli ootheene yaamuhiya enatthawa.
51 Vano, mmiravo mmoha aawanre yoowara emoha veerutthuni aapatxera omutthara Yesu vakhiviru, nto aaheerera ovariwa,
52 nto ahiyaka yoowara awe ya eliinyu, aatthawa ahiwanre.*
53 Yaamuroiha Yesu wa namakeya mutokweene; ni asitokweene ootheene aanamakeya, asitokwene aayuda ni alipa oolepa yaathukumana.
54 Mene Pedru annamutthara eettaka ottayi wene mpaka ophiya vaate va namakeya mutokweene, ni aakilaathi vamoha ni anamuteko anoora mooro.
55 Asitokweene aanamakeya ni Esineetriyu yootheene, yannawaasaasera anamoona weera emoothere Yesu, weera ewere omwiiva, mene khiyamphwannye naari namoona mmoha mano.
56 Mweekhaikhai, yannawa anamoona antxipale oomoothera, mene onamoonaaya, khawaavarihana.
57 Mene atthu akina yanneemela enahima onamoonaaya woomoothera yeeraka:
58 “Hiyo noomwiiwa mulopwana ola eeraka: ‘Miyo kinoopwexa etemplu ela etekinwe naatthu, ni oteka mpuwa mwa mahiku mararu etemplu yeeyo eneera ehipakiwe ni matata aatthu.’”
59 Mene nnaamweera atthu ale yaahima itthu iya, onamoonaaya khawaavarihana.
60 Nto, mutokweene aanamakeya aaheemela variyari va atthu ale anamukoha Yesu eeraka: “Mookhalano masu oohima? Munhima heeni woohima sa onamoona wa atthu ala?”
61 Nto owo, aavirelela omaala ni khaakhunle etthu. Nto mutokweene aanamakeya aatthikela omukoha eeraka: “Nyuwo mwa Kristu, Mwaana a Muluku Ootteela?”
62 Yesu aahaakhula: “Ti yoomi; ni nyuwosa munoomoona Mwaana a Mutthu akilantheene moono woolopwana wa Muluku oowera, awaaka mmahutteni wiirimu.”
63 Nto mwaha wa yeeyo, namakeya mutokweene aapera ikuwo sawe eeraka: “Mwaha wa heeni nnaahaawelaahu anamoona?
64 Nyuwosa moomwiiwa va anveehaka Muluku. Moonelo anyu toovi?” Ootheene yaahaakhulela weera owo annaphwanela wiiviwa.
65 Nto akina a yaawo yaapatxera omusenyera, omukhuneela owiitho, ni ommana yeeraka: “Nkahimani, taani oomanneni?” Emmanakaru owiitho anakhotto yaamukuxa.
66 Nto emaara Pedru, aaraiye vaate, aaphiya namuteko muthiyana a mutokweene aanamakeya.
67 Amoonakaru Pedru ooraka mooro, anwehexexa anamweerela: “Nyuwo-tho mwaari ni Yesu Munazareti.”
68 Mene owo aakhootta eeraka: “Nkimusuwenle mutthu owo naari nkisuwenle etthu munhimaanyu”, ni aakhumela mulako wa vaate.
69 Namuteko mmoha muthiyana aamoona, ni aapatxera oweerela atthu yaari vale eeraka: “Ola-tho mmoha a mulopwana ole.”
70 Mwa ekwaha yanaaveeli owo aakhootta. Moohipisa atthu yaari vaavale yaapatxera omweerela Pedru: “Moohihovela, nyuwo mmoha a mulopwana ole, nyuwo tooGalileya.”
71 Mene owo, aapatxera wiisuulumela alipelaka eeraka: “Miyo nkimusuwenle mulopwana owo mummuhimaanyu!”
72 Ni moohipisa muthupi waahiipa ekwaha yanaaveeli ni Pedru aahuupuwela ele Yesu aamulenlaawe eeraka: “Muthupi ohinaaye wiipa ikwaha piili, nyuwo munoorowa okikhootta ikwaha tthaaru.” Ni ariipinweene murima vantxipale aapatxera winla.
Footnotes
^ Naari: “mwa miruku.”
^ Naari: “ahaamenleene emeesa.”
^ Naari: “ya alabastru.” Nwehe masu oowiiwanyeihiwa.
^ Nwehe masu oowiiwanyeihiwa.
^ Naari: “yuuluma nuuwo moonyoonyiwa; ni yaamuthoriha.”
^ Naari: “anvariha.”
^ Naari: “masalimu.”
^ Masu ala, ni eramaiku ni eKereku entaphulela “khoo Tiithi!”
^ Naari: “ovarihiwa.”
^ Naari: “awanreene yoowara ya mpuwa paahi.”
