Silempwale ni Marko 15:1-47
15 Oriki oxa, asitokweene aanamakeya vamoha ni asitokweene aayuda ni alipa oolepa, aani, Esineetriyu yootheene yaathukumana weera elaihane etthu yoopaka; avinyaka, yaamutthuka Yesu enamuroiha wa Pilatu.
2 Mene Pilatu, aamukoha: “Nyuwo Mwene aayuda?” Yesu waakhula enre: “Ti nyuwo munhima.”
3 Mene asitokweene aanamakeya yannamoothera Yesu itthu sintxipale.
4 Nto Pilatu, aatthikela omukoha Yesu eeraka: “Khamwaano masu oohima? Munniiwa itthu sootheene iya munootheriwaanyu.”
5 Mene Yesu khaakhunle etthu, nto mwaha wa yeeyo, Pilatu aatikhiniheya.
6 Yeele eri efeesta ya Mpaasika, Pilatu aakhalano yookhovelela ya omutaphula mutthu mmoha aatthukinwe, yoowo atthu yeeraaya emuthanle weera ataphuliwe.
7 Etempu ene yeele, eera atthukinweene Baraba, vamoha ni asikhwaawe yaawo yaatthukelinwe mwaha woowiiva.
8 Nto muloko mutokotoko waatthu, waamwaattamela Pilatu ni waapatxera onvekela weera apake etthu aakhovelenlaawe opaka aakhuveelaka Mpaasika.
9 Nto mwaha wa yeeyo, owo aahaakoha: “Muntthuna weera kimutaphule Mwene aayuda?”
10 Nto Pilatu, aasuwela weera asitokweene aanamakeya yanvaherenre Yesu mwaha wa nrima.
11 Mene asitokweene aanamakeya, yaasesera muloko waatthu weera evekele otaphuliwa Baraba ohiya otaphuliwa Yesu.
12 Pilatu aahaakoha veeli atthu eeraka: “Vano, kimutekele eheeni Yesu, yoowo mummweeraanyu* Mwene aayuda?”
13 Yaakhuwela-tho yeeraka: “Akhomeliwe vamwirini!”*
14 Menento Pilatu, aahaakoha-tho eeraka: “Mwaha eheeni? Etthu heeni yoonanara opankaawe mulopwana ola?” Mene yaakhuwela yeeraka: “Akhomeliwe vamwirini!”*
15 Nto, Pilatu atthunaka waasiveliha atthu, aamutaphula Baraba; ni aaruma owaxuliwa Yesu, ni wiiviwa vamwirini.
16 Vano, anakhotto yaamukuxa Yesu, emmukeliha owannyawe Pilatu, ephiyaakaru yaawiitthana anakhotto ootheene.
17 Awo yanwariha ekuwo yooxeera, ni yaapaka ekhara ya miiwa enanwariha mmuru;
18 ni yaapatxera omweerela: “Mwiivuluxe Mwene aayuda!”
19 Nave-tho yammana vamuru ni mutathi, ni yaamusenyera; vano, yaakokhora ohoolo wawe ekhalaka ntoko enoomuttittimiha.
20 Noomala omutheya, yaamurula ekuwo ele yooxeera enatthikela onwariha ikuwo sawe. Ni yaamukumihera vaate va esidade enarowa omukhomela vamwirini.
21 Nave-tho, mulopwana mmoha aavira vale akhumaka omatta, iitthaniwa Simoni a oKirene, apapawe Alexandre ni Rufu. Awosa yaamunyesereriha oteexa mwiri wa nihaaxero* wa Yesu.
22 Ni yaamukuxera nipuro niitthaniwa Golgota, eyo tiiyo “nipuro na ikarakasa”.
23 Iwe, yaaheerera onvaha eviinyu yootakanseriwa ni murette woohapala, emiira. Mene owo, aakhootta owura.
24 Ni yaamukhomela vamwirini, nave yaahaahulelana ikuwo sawe yaasaaseraka vaaviini eparakha yeeraaya emorelevo.*
25 Yaari ewoora ya 9 ya oxeexelo awo yaamukhomenlaaya vamwirini.
26 Ni yaalepa yoolepa yoomoothera yeera: “Mwene aayuda”.
27 Opwaha mwa yeeyo, anamwiiya eeli yaakhomelinwe vamoha nuuwo, mmoha moono woolopwana ni mukina moono woothiyana.
28 * ——
29 Ni atthu yaavira vale, yannanveeha Yesu ettikinyaka muru emweerelaka: “Hee! Nyuwo mwaarowa opwexa etemplu ni oteka mpuwa mwa mahiku mararu,
30 mwiivuluxe tthiri, mukhuruwaka vamwirini* vawo.”
31 Vamoha-moharu-tho, asitokweene aanamakeya vamoha ni alipa oolepa, yannamutheya yeeraka: “Owo oowera waavuluxa atthu akina, mene khanwera wiivuluxa mwaneene awe!
32 Kristu Mwene ana a Israeli, akhuruwe viinaano va vamwirini* vawo weera hiyo nimoone ni nimuroromeleke.” Mpaka naanamwiiyeene-tho yaakhomelinwe vamoha nuuwo vamwirini, yannanveeha.
33 Ephiyakaru ewoora ya 12, yaapatxera epiphi elapo ele yootheene mpaka ewoora ya 15.
34 Ni ewoora ya 15, Yesu aakhuwela ni mmilo awe wootheene eeraka: “Eli, Eli, Lama sabaktani?” eyo tiiyo: “Muluku aka, Muluku aka, mwaha wa heeni mukihiñyaanyu?”
35 Ni yiiwakaru eyo, akina yaari vakhiviru vale yaaheera: “Nkamwiiweeni!* Owo ommwiitthana Eliya.”
36 Nto mutthu mmoha, aatthimaka arowa okuxa exponxa* anaruweya nviinyuni yoowaawa, aatthukelela vamutathini ananvaha Yesu weera awure, eeraka: “Mmuhiye! Weera noone waari weera, Eliya onoowa onvinxa vamwirini vale.”
37 Mene Yesu, aakhuwela vantxipale ni aahookhwa.
38 Nto ekortiina ya mutemplu, yaapereya okhuma osulu mpaka vathi.
39 Nto muhooleli aanakhotto aari nipuro nene nenne, oonakaru weera Yesu aakhwiiye moota ene yoole, aaheera: “Mweekhaikhai, mulopwana ola aari Mwaana a Muluku.”
40 Nave-tho vaavale, yaakhalavo asithiyana yeemenle ottayi wene enwehaka Yesu; wa athiyana ene yaala, aakhalavo Maria Madalena, Maria ameyawe Yakobe mukhaani ni Yosefe, ni Salome.
41 Asithiyana ala, yannamuhoola ni yannamukhavihera emaara owo aaraawe oGalileya. Nave-tho nipuro nne, yaakhalavo asithiyana antxipale yaawo yaaronwe vamoha ni Yesu oYerusalemu.
42 Nto, woona weera nsuwa naahanle oneela ni weera naari nihiku naarehereriwa, eyo tiiyo, naari nihiku nihinaaye ophiya nihiku na esaabadu,
43 aaphiya Yosefe yoowo aari a elapo ya wArimatheya, yoowo aari mutokweene mmoha oottittimiheyaxa a osineetriyu, yoowo-tho aaweherera owa wa Omwene wa Muluku. Moolipa murima, owo aarowa wuuluma ni Pilatu, ni aavekela murutthu wa Yesu.
44 Nto Pilatu, aahaasaasera osuwela waari weera Yesu ohookhwa, nto mwaha wa yeeyo, aamwiitthana muhooleli aanakhotto anamukoha waari weera Yesu ohookhwa.
45 Iiwakaru ni muhooleli aanakhotto weera Yesu ohookhwa, aamwaakhulela Yosefe okuxa murutthu wa Yesu.
46 Yosefe, aathuma ekuwo ya eliinyu ni aakumiha murutthu wa Yesu vamwirini,* avinyaka aavitikelela ni ekuwo ya eliinyu ni anvitha mmahiyeni, nenno naathipinwe vamwala. Avinyaka aapirikixela nluku mpaka vamulako va nihiye.
47 Nto, Maria Madalena ni Maria ameyawe Yosefe, yaahala vaavale ewehaka nihiye Yesu aavithinwaawe.
Footnotes
^ Naari: “mummwiitthanaanyu.”
^ Naari: “iiviwe vamwirini.”
^ Naari: “iiviwe vamwirini.”
^ Naari: “yaasaaseraka taani yeera emmorele eparakha.”
^ Eversu ela ennaphwanyeya mwa
^ Naari: “mwiri wa nihaaxero.” Nwehe masu oowiiwanyeihiwa.
^ Naari: “mwiri wa nihaaxero.” Nwehe masu oowiiwanyeihiwa.
^ Naari: “nkanweheeni.”
^ Naari: “nttapwatta.”
^ Naari: “vamwirini wa nihaaxero.” Nwehe masu oowiiwanyeihiwa.
