Silempwale ni Marko 4:1-41
-
MAPHWANAPHWANIHO WOOHIMA SA OMWENE (1-34)
-
Namalima (1-9)
-
Etthu yaamweeriha Yesu ovarela muteko maphwanaphwaniho (10-12)
-
Wiiwanyehiwa wa niphwanaphwaniho na namalima (13-20)
-
Muthuko khonheliwa vathi va muttanka (21-23)
-
Murinko munvarelaanyu muteko weera mwaarinkeleno atthu akina (24, 25)
-
Namalima onkona (26-29)
-
Enuku ya emostarta (30-32)
-
Wuuluma avarelaka maphwanaphwaniho (33, 34)
-
-
Yesu onnamaaliha epheyo (35-41)
4 Yesu aapatxera oxuttiha-tho muxerexere mwa ephareya ni muloko mutokotoko waatthu, waathukumana ohoolo wawe. Nto mwaha wa yeeyo, owo aavolowa mpaarkuni ni aakilaathi, ni aasusa ni paarku anarakamela muxerexere mwa ephareya, nto muloko wootheene waatthu waahanle muxerexere mwa ephareya.
2 Ni owo, aapatxera waaxuttiha itthu sintxipale avarelaka muteko maphwanaphwaniho. Annaaxuttiha ahimaka ha:
3 “Mwiiwe: Namalima mmoha aavinya anarowa omisa iso sawe.
4 Nto amisaka hiihaale, iso ikina saamorenle muxerexere mwa musewe nto apalame yaawa enatxa.
5 Nto iso ikina, saamorenle vamalukuni yahaakhanlaayavo etthaya yintxipale, saamela moowaakuveya mwaha wooweera etthaya yaari vale khayantte.
6 Mene nsuwa noopakaru, saanyaala ni saahoosa mwaha wooweera khasaakhanleno mikakaari.
7 Iso ikina, saamorenle vamiiwani, mene miiwa saahunnuwa sinavuvura iso iye, ni iso iye, khasaakuminhe soowiima.
8 Mene iso ikina, saamorenle etthaya ya etxaatxira ni saapatxera wiimiha soowiima ni saahiimiha ikina 30, 60 ni 100 opwaha iye saalinwe.”
9 Ni aahaatxeerera eeraka: “Ale eri ni maaru oowiiwa, yiiweke.”
10 Omwareyakaru muloko mutokotoko waatthu, atthu yaamurukurenre yaahoowa ni arummwa 12, ni yaamukoha woohima sa etthu yaataphulelaaya maphwanaphwaniho.
11 Yesu aaweerela: “Nyuwosa, mohaakhuleliwa osuwela isiiri sa Omwene wa Muluku, mene atthu akina enxuttihiwa ni maphwanaphwaniho,
12 weera yooneke, mene nnaamweera vareene hiiho khenkela woonaka, ni weera yiiweeke mene nnaamweera vareene hiiho khenkela wiiwexexaka etthu entaphulelaaya, ni awo khenrowa ottharuwa weera eleveleliwe.”
13 Opwaha mwa yeeyo, owo aaweerela: “Nyuwosa khamuniiwexexa etthu entaphulelaaya niphwanaphwaniho nna; vanonto, munkela wiiwexexa hayi maphwanaphwaniho makina?
14 “Namalima, tiyoole onlaleya masu a Muluku.*
15 Mene iso iye saalinwe muxerexere mwa musewe, atthu ale eneera yiiwakaru masu a Muluku, Satana anawa anawaakha ele yaalinwe vamurimani vaya.
16 Vamoha-moharu, iso iye saalinwe vamalukuni, enaathoonyera atthu ale eneera yiiwa masu a Muluku, moowaakuveya enaakhulela moohakalala.
17 Mwa yeeyo, nnaamweera ehikhanleno mikakaari, ennavirelela okhala mwa etempu vakhaaniini, mene yakhumelela vale maxupo naari ottharatthariwa mwaha wa masu a Muluku, ennamora.
18 Ni iye saalinwe vamiiwani, enaathoonyera atthu ale eniiwa masu a Muluku,
19 mene mwaha woowinlela itthu sa elapo ela* ni woototha wa mihakhu ni soowinlela sa murima sootheene, sinnavuvura masu awo, ni kheniimiha soowiima.
20 Omamaliheroni waya, iso iye saalinwe etthaya ya etxaatxira, enaathoonyera atthu ale eniiwa masu a Muluku enaakhulela, ni eniimiha soowiima: 30, 60, ni 100 opwaha iye saalinwe.”
21 Nave-tho, aaweerela: “Neereke onnakuxiwa muthuko onaheliwa vathi va muttanka naari vathi vakaama? Khaiyene onheliwaka vasulu?
22 Mene khiyaavo etthu yiipithihinwe ehinrowa othupululiwa, ni khiyaavo etthu evithinwe nnene ehinrowa osuweliwa.
23 Ale eri ni maaru oowiiwa, yiiweke.”
24 Aaweerela-tho: “Mwiiwexexeke nnene ele muniwaanyu. Murinko munvarelaanyu muteko weera mwaarinkeleno atthu akina, onkela ovareliwa muteko yooweene-tho weera murinkeliweno nyuwo-tho, mene wa nyuwo, onimwaatxeereriwa.
25 Tivanto, yoole okhalanne, onoovahiwa-tho, mene ole ohikhanleno, onrowa waakhiwa mpaka yeele oraaweno.”
26 Ni aavirelela ohima eeraka: “Omwene wa Muluku, ori ntoko mulopwana ommisa iso sawe mmatta.
27 Mulopwana owo, onnakona ohiyu ni onnavinya vaxa, ni iso sinnamela ni sinnunnuwa nnaamweera owo ahisuwenle moota simmelaaya ni sinunnuwaaya.
28 Etthaya meekhaayaru, enniimiha vakhaani-vakhaani soowiima: woopatxerani, eso ennunnuwa avinyaka ninnakhumelela nikala, ni omamaliheroni, sinnakhumelela iso mmakalani.
29 Mene vaavo soowiima siniitthwaaya, namalima onnakuxa etxikwakwa anahepha, mwaha wooweera yoophiya etempu yoowuurula.”
30 Ni owo aahaatxeerera ohima eeraka: “Ninkela olikanxera ni eheeni Omwene wa Muluku, naari nniphwanaphwaniho heeni nneeraahu nivarele muteko weera niiwanyeiheno?
31 Omwene wa Muluku onoolikana ni enuku ekhaanini* yeeyo emaara yaaliwaaya, yaari enuku yootepaxa oyeva, opwaha inuku sootheene sa vathi.
32 Mene yaaliwa vale, ennunnuwa enakhala mwiri mutokotoko, ni onnakumiha itamphi itokotoko, nto ipalame sa wiirimu sinnawa sinapaka ipuru saya mutamphini mwaya.”
33 Ni maphwanaphwaniho ntoko ala, Yesu annaxuttiha masu a Muluku mpakana yeeraaya yiiwexexevo.
34 Mweekhaikhai, khiyaavo etthu aahimaawe woohikhala niphwanaphwaniho, mene annaataphulela maphwanaphwaniho awo atthareli awe yakhalavo yaaworu.
35 Nihiku nene nenne, nsuwa nriki oneela, Yesu aaweerela atthareli awe: “Nrowe nlapuwele ekhopela ekina ya ephareya.”
36 Amwarakaru muloko mutokotoko waatthu, atthareli awe yaamukuxa Yesu mpaarkuni mwemmwe aaraiyemo, ni apaarku akina yaamutthara.
37 Yaahoopa epheyo etokotoko ni mutekuteku wa maahi wannammana paarku, mpaka paarku ohalela oneelihiwa ni mutekuteku wa maahi.
38 Mene Yesu aari ottuli wa paarku akonaka ahaamenleene ekapiseera,* nto atthareli awe yanvinxa ehimaka ha: “Muhusiha, khamunoona weera nihanle okhwa?”
39 Vano, Yesu aavinya anamaaliha epheyo ni aaheerela ephareya ha: “Omaale! Wiikhalele!” Ni epheyo yaamaala, ni waakhala omaaleleya otokotoko.
40 Vano Yesu aahaakoha eeraka: “Mwaha wa heeni munoovaanyu? Neereke mpaka va khamwaanoono nroromelo?”
41 Ni awo, yaahoova vantxipale ni yaaheerelana yaaworu: “Mulopwana heeni yoola? Oniiweleliwa ni epheyo mpakana ni ephareya.”
Footnotes
^ Ni eKereku: “namalima onaala nsu.”
^ Naari: “itthu soonanara sa elapo ela.” Nwehe masu oowiiwanyeihiwa.
^ Naari: “emostarta.”
^ Naari “epiiro.”
