Silempwale ni Marko 5:1-43
5 Yaaphiya ekhopela ekina ya ephareya, muttetthe wa oGerasa.
2 Yesu akhuruwakaru mpaarkuni, mulopwana mmoha aarino munepa woonanara aakhuma omahiye anarowa okumana ni Yesu.
3 Mulopwana owo, aakhala omahiye, mpaka mahiku ale khaavo aawenre omutthuka naari ni ekorenti mano.
4 Owo aaheereriwa otthukiwa ikwaha sintxipale mmettoni ni mmoononi ni ekorenti, menento owo annapasa ikorenti sa mmoononi ni annanyaanya ikorenti sa mmettoni, ni khaavo aawera onvara.
5 Ni voohihiyerereya, othana ni ohiyu, anneetteetta akhuwelaka omahiye ni mmwaako ni anniithikila ni maluku.
6 Mene amoonakaru Yesu siiwe-iwe, aamutthimakela anakokhora ohoolo wawe.
7 Nto owo, aakhuwela ni mmilo awe woothene eeraka: “Nyuwo Yesu, Mwaana a Muluku mutokweene, muntthuna eheeni ni miyo? Mulipele mwa nsina na Muluku weera khamunkela okihooxa.”
8 Mulopwana ole, uulumme hiihaale mwaha wooweera Yesu aaroomweerela: “Weyo munepa woonanara, omuhiye mulopwana owo!”
9 Vano, Yesu aamukoha: “Nsina nanyu taani?” Owo aahaakhula: “Nsina naka Lexiyawu,* mwaha wooweera hiyo nohaatta.”
10 Ni annamutxonttela Yesu weera ahoomolele muttetthe mukina minepa iye soonanara.
11 Naakhala nipuro vamwaako saaraayavo ikuluwe sintxipale sitxihiwaka.
12 Mwa yeeyo, minepa soonanara saamutxonttelela Yesu weera: “Munoomolele mukuluweni weera nakhaleke mwemmo.”
13 Ni Yesu aahaakhulela. Nto mwaha wa yeeyo, minepa iye soonanara saamuhiya mulopwana ole sinavolowa mukuluweni, ni ikuluwe iye soophiyera 2.000, saamorela mphareya sinattatta.
14 Mene atthu yaatxiha ikuluwe yaatthawa, ni ephiyakaru osidade ni mmawaani, yaahaaleela atthu etthu yeereñye, ni atthu awo yaarowa woona ele yeereñye.
15 Ni yaamwaattamela Yesu ni yaamoona mulopwana ole namatxiini saakhummaayamo ilexiyawu sa minepa soonanara, akilantheene, awanreene ni iisuwelaka ni atthu ale yaahoova.
16 Atthu yonne itthu iye seereyaka, yaahaaleela atthu awo etthu yeereñye ni mulopwana ole aarino minepa soonanara, ni ikuluwe.
17 Nto, yaapatxera omutxonttela Yesu weera akhume muttetthe ole.
18 Emaara Yesu anwelaawe paarku, mulopwana ole aarino minepa soonanara, aamutxonttela Yesu weera amutthare.
19 Mene Yesu khaakhulenle weera amutthare, nto aamweerela: “Murooke owaani waamusi anyu mwaaleele itthu sootheene Yehova oopakenlaaweni ni ikharari owoonihenraaweni.”
20 Vano, mulopwana ole aapwaha ni aapatxera olaleya oDekapoli* itthu sootheene Yesu ampakenlaawe; ni atthu ootheene yannatikhiniheya.
21 Yesu atthikelakaru mpaarkuni, aalapuwela ekhopela ekina, ni waathukumana muloko mutokotoko waatthu, ni owo aari muxerexere mwa ephareya.
22 Aahoowa mutokweene mmoha a musinakooka yoowo iitthaniwa Jairo, amoonakaru Yesu, aakokhora mmettoni mwawe.
23 Owo aamutxonttela ikwaha sintxipale eeraka: “Mwanaka mwaamuthiyana onoovoreiwa vantxipale,* vanonto, txontte nrowe mwamuhelele matata weera owo alame ni atthikele okhala mukumi.”
24 Yesu ni mulopwana ole yaattimula, ni muloko mutokotoko wannamutthara ni wannamphunya.
25 Aakhala muthiyana mmoha aavirinhe iyaakha 12 ephome awe eyeeheyaka.
26 Owo aakosoopiwa ni mameetiku mantxipale ni aahaawa, nto mwaha wa yeeyo, owo aayeeha musurukhu awe wootheene mene khaalamme, ohiya olama owo aamweera otepa.
27 Iiwakaru woohima sa itthu Yesu aapakaawe, owo aamwaattamela ottuli Yesu variyari va muloko mutokotoko waatthu, ni aatava maleyaawe,
28 vano anniiseerela: “Katavaru maleyaawe, kinoolama.”
29 Ni moowaakuveya ephome yaahiya okhuma ni owo aahoona murutthuni mwawe weera aalamihiwa eretta ele yaamuxupa vantxipale.
30 Naanaanoru, Yesu aahoonelela weera saakhuma ikuru murutthuni mwawe, nto, aarukunuwela ottuli anakoha muloko waatthu: “Taani otanve maleyaaka?”
31 Atthareli awe yaamweerela: “Nyuwo mpaka okoha: ‘Taani yootanveni moonaka weera muloko mutokotoko waatthu onnoophunyani?’”
32 Mwa yeeyo, owo eera awehawehaka mukhwipi weera amoone taani aamutanve.
33 Vano, muthiyana ole oovaka ni othukumela ni asuwelaka etthu yaakhumelenle, aamwaattamela Yesu anamukokhorela ohoolo wawe ni aamuleela ekhaikhai yootheene.
34 Ni Yesu aamweerela: “Mwanaka, nroromelo nanyu nohoolamihani. Murooke ni murettele ni mulame erettaanyu enooxupani.”
35 Yesu nlelo ariki wuuluma, yaaphiya alopwana akina a owannyawe mutokweene a osinakooka ni yaamweerela mutokweene a osinakooka: “Mwaninyu ohookhwa! Mummuxupela heeni Muhusiha?”
36 Yesu iiwalaiye masu ale, aamweerela mutokweene a osinakooka: “Muhoove, mukhaleno nroromelo paahi.”
37 Yesu khaakhulenle otthariwa ni mutthu mukina ohikhanle ni Pedru, Yakobe ni Yohani munnawe Yakobe.
38 Nto awo, yaaphiya owannyawe mutokweene a osinakooka, ni Yesu aahoona onyakuleleya waatthu yinlaka ni okhuwela vantxipale.
39 Yesu avolowakaru mpaani aaweerela atthu: “Mwaha wa heeni muninlaanyu woonyakula? Mwaaruusi ola khakhwiiye, ola onimweera okona.”
40 Mwaha wa masu ala, atthu yaapatxera omutheya moomuramusa. Aavekelakaru atthu okhumela vaate, aahaakuxa apapawe ni ameyawe mwaaruusi ole, ni ale aathanliyaawe weera emutthare ni aarowa nipuro aaraawevo mwaaruusi ole.
41 Nto aavara ntata na mwaaruusi ole ni anamweerela: “Talita kumi,” eyo entaphulela: “Mwaaruusi, kinnooleela weyo: Ovinye!”
42 Ni moowaakuveya mwaaruusi ole, aavinya anapatxera weetta. (Owo aarino iyaakha 12.) Nto mwaha wa yeeyo, asipapawe mwaaruusi ole, khiyaawenre wiipithiha ohakalala waya.
43 Mene Yesu, aahaaleela ikwaha sintxipale weera ehimuleele mutthu etthu ele owo aapankaawe, ni aaruma weera avahiwe yootxa mwaaruusi ole.
Footnotes
^ Lexiyawu: “onhimwa waatta wa minepa iye soonanara.”
^ Naari: “mittetthe sa isidade 10.”
^ Naari: “ohanle okhwa.”