Silempwale ni Marko 6:1-56
6 Yesu aakhuma nipuro nne anarowa esidade awe, ni atthareli awe yaamutthara.
2 Niphiyakaru nihiku na esaabadu, Yesu aapatxera oxuttiha musinakooka, atthu antxipale yaamwiiwale, yaatikhiniheya ni yaaheera: “Mulopwana ola ophwannye woowiini itthu sootheene iya? Mwaha wa heeni ovahinwaawe osuwela nno, ni mwaha wa heeni onweraawe opaka itthu iya sootikhiniha ni matataawe?
3 Ola khaiyene kalipinteeru mwaana a Maria ni munnawe Yakobe, Yosefe, Yuda ni Simoni? Ni asirokoraawe khaiyene tiyaala eri ni hiyo?” Tivawonto, awo khiyaamuroromenle.
4 Yesu aahaaleela ha: “Khaavo profeta onttittimihiwa muttetthe awe, variyari va amusi awe ni owannyawe.”
5 Ni khaapanke miteko sootikhiniha iwe, ohikhanle owiiyaathera matata alipa oovoreiwa ni waalamiha.
6 Mweekhaikhai, aatikhiniheya mwaha woohikhalano waya nroromelo. Aaheetteetta mittetthe sootheene soowaattamela, axuttihaka.
7 Yesu aawiitthana atthareli awe 12 ni aapatxera waarumiha eeli-eeli, ni aahaavaha owera woowoomola minepa soonanara.
8 Nave aahaavaha nlamulo weera ekuxe paahi muttootto yeettaka ekwaha, mene ehikuxe yootxa naari ehikuxe murupa wa yootxa ya mukwaha, naari musurukhu mmusakhoni,
9 mene aahaalamula weera eware isantaaliya ni ehikuxe soowara ikina.
10 Opwaha mwa yeeyo, aaweerela: “Empa eri yootheene munkelaanyu ovolowa, mukhale vaate vawo mpaka okhuma nipuro nno.
11 Nipuro nri poothe muneeraanyu muhaakheliwe naari atthu ohitthuna wiiwa mitthenka mukunxaanyu, mwaakhumaka nipuro nno, mutathe ntthupi nnaakhale mmanaanini mwanyu weera nwoonihere weera aaleeliwa.”
12 Yaavinya enaaleela atthu weera yannatthuneya orukunuxa mirima,
13 awosa yannawoomola mademoniyu* antxipale, yannaattikitthela aretta antxipale makhura* ni yannaalamiha.
14 Nto Herodi aahiiwa suulummwaka woohima sa Yesu, woona weera nsina na Yesu naahiiwanyeya ni atthu yanneera: “Owo Yohani Mpatisa, oroovinyererihiwa mookhwaani, tivanto onweraawe ovara miteko sootikhiniha.”
15 Mene atthu akina ohima yeera: “Owo Eliya.” Akina ohima yeera: “Owo profeta onlikana ni mmoha a maprofeta akhalayi.”
16 Mene Herodi iiwakaru eyo, aaheera: “Owo Yohani, ole miyo kimuhintaaka, oroovinyererihiwa mookhwaani.”
17 Aani, aari Herodi ene yoola aarumme ovariwa Yohani ni otthukiwa okateya, mwaha wa Herodiya, mwaarawe Filipe munnawe Herodi, mwaha wooweera Herodi aaroomuthela Herodiya.
18 Woona weera Yohani annamweerela ha Herodi: “Khamunaakhuleliwa omuthela Herodiya mwaara a munninyu.”
19 Nto mwaha wa yeeyo, Herodiya annamusontta Yohani, ni annatthuna omwiiva mene khavaawereya.
20 Herodi annamoova Yohani, mwaha wooweera aasuweela weera Yohani, aari mulopwana a exariya ni aamukokhorela Muluku ni Herodi annamwaakiha. Ikwaha sootheene aamwiiwaiye uulumaka, annavalavela ahisuwelaka etthu yoopaka, mene annanwiriyana moohakalala.
21 Naaphiya nihiku nooreerela, nihiku Herodi, aakwanihaawe iyaakha.* Herodi aahaawoopa ahooleli ootthuneya, asitokweene aanakhotto ni atthu oosuweliwaxa a oGalileya.
22 Nihiku nene nenne mwaana mwaamuthiyana a Herodiya, aavolowa ni aahiina mpaka omusiveliha Herodi vamoha ni atthu aawompaawe.* Herodi aamweerela ha mwali ole: “Mukivekele etthu muntthunaanyu miyo kinimoovahani.”
23 Aani, Herodi aalipela amweerelaka ha mwali ole: “Etthu eri poothe munkelaanyu okivekela pooti ehelaka mpuwa woomeelani eriyari ya omwene aka, kinimoovahani.”
24 Nto mwali ole aakhuma anarowa waakoha ameyawe: “Kivekeleke eheeni?” Awo yaamwaakhula: “Muru wa Yohani Mpatisa.”
25 Moowaakuveya, owo aatthimaka mpaka wa mwene anamuleela ele aatthunaawe, eeraka: “Kintthuna weera mukivahe mparathoni mu moowaakuveya muru wa Yohani Mpatisa.”
26 Nnaamweera yoovekela ele yaamuriipinhe murima mwene Herodi, mwene khaatthunne okhootta yoovekela ya mwali mwaha wa natiri ammannaawe ni mwaha wa atthu aawompaawe.*
27 Nto moowaakuveya mwene aamuruma nakhotto kwartaawe, ni nlamulo nooweera awiihe muru wa Yohani. Nakhotto ole aarowa okateya omuhita Yohani
28 ni aawiiha muru ole ahenleene mparathoni, owo aamwinnyerera muru ole mwali, ni mwali, aawinnya ameyawe.
29 Atthareli a Yohani yiiwakaru eyo, yaarowa okuxa murutthu awe ni yaavitha mmahiyeni.
30 Arummwa yaathukumana vamoha ni Yesu, ni yaamuleela itthu sootheene yaapankaaya ni yaaxuttinhaaya.
31 Ni Yesu, aaweerela: “Nkakittharani, nwe nyuwo ni miyo nrowe nipuro noohikhala atthu weera niitthuuwe vakhaaniini.” Woona weera yaakhala atthu antxipale yaarowa ni yaawa, awosa khiyaarino etempu yootxa mano.
32 Tivawonto, yanwela paarku enarowa nipuro noohikhala atthu weera yakhale meekhaaya.
33 Mene atthu yaawoona awo ekhumaka ni yaasuwela nipuro yaakelaayawo. Nto, ekhumaka isidade soovirikana, yaarowa iwo yeettaka vathi ni yaapatxenre ophiya.
34 Ariki okhuruwaru mpaarkuni, Yesu aawoona atthu antxipale ni aahaamorela ikharari mwaha wooweera awo yaakhala ntoko iputtiputthi sinaasa weetta sihikhanleno mukukhuli, ni aapatxera waaxuttiha itthu sintxipale.
35 Waaxekuwaaya, atthareli awe yaamwaattamela enamweerela: “Nipuro nna noorakamelana ni mittetthe simakinwe, ni va, wooxekuwa.
36 Vanonto, mwaamware atthu ala weera erowe mmawaani yathume yootxa.”
37 Mene Yesu owaakhula enre: “Mwaavahe nyeenyu yootxa weera etxe.” Vano awo yaamukoha yeeraka: “Pooti orowa othuma ipaawu sa itenaariyu 200, weera naavahe atthu ala weera etxe?”
38 Nto Yesu, aawaakhula aakohaka ha: “Murinono ipaawu ikavi? Nkarowani moone!” Awo yoonakaru, yaaheera: “Iri ipaawu sinku ni ihopa piili.”
39 Vano, Yesu aahaaruma atthu okilaathi ikhurupu sene vamunyepuni.
40 Nto yaakilaathi ikhurupu saatthu 100 ni 50.
41 Mene akuxakaru ipaawu iye sinku ni ihopa iye piili, aaweha wiirimu ni aareeliha, avinyaka aakawanya ipaawu anapatxera waavaha atthareli awe, weera atthareli awe awo, yaavaheke atthu, ni aakawanya ihopa iye piili ni aahaavaha atthu ootheene.
42 Atthu ootheene yaahootxa mpaka ovona;
43 yaattottela ipaawu saahanle mpaka osara mittanka 12, nihikontariki ihopa saahanle.
44 Vano atthu yaatxiiye ipaawu iye, yaari 5.000 alopwanaru.
45 Moohipisa, Yesu aahaahooliha atthareli awe mpaarkuni weera ekele ekhopela ekina ya ephareya erowaka oBetsaida, owo aahala aamwaraka atthu.
46 Aamwarakaru atthu, Yesu aawela omwaako meekhaawe weera avekele.
47 Wiilakaru, paarku eera eettelaka eriyari ya ephareya, mene Yesu aari omokoni meekhaawe.
48 Nto, oonakaru weera yaakhalano maxupo oomweettiha paarku, mwaha wooweera aakela yaakhumaayawo epheyo, Yesu aarowa okumana naawo oyaaka nooxa* eettaka vasulu vamaahi a ephareya, mene meettelo awe awo aakhala ntoko anaavire.
49 Atthareli emoonakaru Yesu eettaka vasulu vamaahi a ephareya, yaahuupuwela yeeraka: “Malavi aala!” Ni yaakhuwela,
50 mwaha wooweera ootheene yaamoona ni yaatuthuwa. Mene moowaakuveya, Yesu aaweerela: “Mulipe murima! Ti miyo, muhoove.”
51 Nto, anwelakaru paarku yaaraayamo, epheyo yaamaala. Yoonakaru eyo, atthareli yaatikhiniheya vantxipale,
52 mwaha wooweera awo khayiiwexenxe etthu yaataphulelaaya ipaawu iye owo aakanwaawe, mene awo muupuwelo aya wannavirelela ohiiwexexa.
53 Emalihakaru olapuwa ephareya, yaaphiya oJenesareti ni yaamweemexa paarku weiwo.
54 Ekhuruwakaru mpaarkuni, atthu a nipuro nne yaamusuwela.
55 Mene atthu a muttetthe ole, yaarowa waaleela atthu akina a muttetthe ole, nenne nri nipuro yiiwaaya weera Yesu ori weiwo, yannamuroihela atthu oovoreiwa yaateexiyeene vamaakani.*
56 Ni ilapo sootheene, isidade naari mittetthe sootheene aaviraawe, yannahiiwa alipa oovoreiwa mapuro oowaattiwa,* yannanvekela weera aahiye weera etave mukhwipi mwa maleyaawe. Ni atthu ootheene yaatava maleyaawe, yannalama.
Footnotes
^ Naari: “minepa soonanara.”
^ Naari “aseitona.”
^ Naari: “aniversaariyu.”
^ Naari: “aatxaaweno.”
^ Naari: “aatxaaweno vameesa.”
^ Naari: “okhuma ewoora ya 3 mpaka okhuma wa nsuwa ewoora ya 6.”
^ Naari: “vanrepani.”
^ Mapuro saatumihiwaayavo itthu ni othummwa nave mapuro ene yaala sannapakiwa mithukumano.
