Silempwale ni Marko 7:1-37
7 Nto, afarisi ni alipa oolepa akina yaakhumme oYerusalemu yaathukumana ni Yesu.
2 Awosa yaawoona atthareli awe akina etxaaka mmatatani oriipaleene, eyo tiiyo, ehinyanwe*.
3 (Mwaha wooweera afarisi ni ayuda ootheene khentxa ehinyanwe matata mpaka mweekookhwinoni, ettharihaka sookhovelela saatthu a khalayi,
4 ni yaatthikaka omerkaatu, khentxa ehinaaye onyawa. Sookhala sookhovelela ikina yaakhenlaaya ni envarexexaaya, ntoko opatisa ikoopho, ixaaru ni ipanela sa ikhoopiri.)
5 Nto afarisi ni alipa oolepa yaamukoha Yesu: “Mwaha wa heeni atthareli anyu ehinttharaaya malamulo a makholo akhalayi, mene entxaaya yootxa ehinyanweene?”*
6 Owo aaweerela: “Yesaya aaprofetisanri oohimakani nyeenyu enexa, anamootha, ntoko elempwalaaya: ‘Muloko ola onkittittimiha ni eyano paahi, mene mirima saya siri ottayi wene ni miyo.
7 Ti vasiyoni vene enkikokhorelaaya, mwaha wooweera enxuttiha malamulo aatthu.’
8 Nyuwosa munnahiya otthara malamulo a Muluku, munavarexexa sookhovelela saatthu.”
9 Yesu aaweerela-tho: “Nyuwo munnawera otupha malamulo a Muluku, nvarexexaka sookhovelela sanyu.
10 Mwa ntakihero, Mose enre: ‘Mwaattittimihe apapinyu ni ameyanyu’ ni ‘Ole onrowa waaveeha apapawe naari ameyawe, iiviwe.’
11 Mene nyuwo ohima muneera ha: ‘Mutthu aweerela apapawe naari ameyawe “Itthu sootheene kiraakano keeraaka koovaheeni, ekorpa (eyo tiiyo, yoovaha kinkelaaka onvaha Muluku)’”,
12 nyuwo munnamukhoottihera waakhavihera apapawe naari ameyawe.
13 Mapakelo anyu itthu moota ola, onneeriha masu a Muluku ohikhalano mwiitti mwaha wa sookhovelela munxuttihaanyu. Ni munnapaka itthu sintxipale ntoko seiya.”
14 Iitthanakaru muloko ekwaha yanaaveli, aaheerela: “Mukiiwe ootheene nyuwo, ni mwiiwexexe etthu entaphulelaya ele kinhimaaka.
15 Khaiyene etthu envolowa mmwaano emmunanariha mutthu, mene ele enkhuma mmwaano emmunanariha mutthu.”
16 * ——
17 Ahiyakaru muloko mutokotoko waatthu, aaphiya nivaate nimoha, nto atthareli awe yaamukoha woohima sa niphwanaphwaniho nne.
18 Nto Yesu aahaakohasa: “Neereke nyuwo-tho nlelo khamuniiwexexa ntoko awo? Khamuniiwexexa weera khiyaavo etthu envolowa mmwaano mwa mutthu emmunanariha,
19 mwaha wooweera etthu eyo khenvolowa vamurimani mene enkela vanipwiipwini, avinyaka olatiriina.” Nto ni masu ala, Yesu aahoonihera weera sootxa sootheene sinnaakhuleliwa.*
20 Opwaha mwa yeeyo, Yesu aaheera: “Itthu sinkhuma mmwaanoni mwa mutthu simmunanariha mutthu.
21 Woona weera vamurimani va mutthu sinnakhumavo minyuupuwelo soonanara, ntoko okonihana woohireerela,* wiiya, wiiva,
22 oraruwa, winlela mihakhu, onanara murima, wootha, mweettelo woonanara onoonihera ohuuliwa muru, nrima, onveeha Muluku, wiisoona ni ohaathokorora atthu akina.
23 Itthu sootheene iya soonanara, sinkhuma vamurimani va mutthu. Nto ti seiya simmunanariha mutthu.”
24 Akhumakaru nipuro nne, Yesu aarowa muttetthe wa oTiro ni oSidoni, aaphiya nivaate nimoha ni khaatthuna weera atthu esuwele, menento khavaawereñye ohooniwa ni atthu.
25 Mwa yeeyo, muthiyana mmoha aarino mwanawe mwaamuthiyana aarino munepa woonanara, aahiiwa suulummwaka woohima sa Yesu ni aarowa okumana nuuwo, ni aakokhora ohoolo wawe.
26 Muthiyana ole aari mukereku, elapo awe ya osiro-fenisia, muthiyana ole annanvekela Yesu voohihiyerereya weera oomole munepa woonanara wanvanre mwanawe mwaamuthiyana.
27 Yesu omwaakhula enre: “Mwaahiyeke toko anamwane evoneke, mwaha wooweera khavanreerela okuxa epaawu ya anamwane waavaha axaana aalapwa.”
28 Vano owo aamwaakhula: “Aani Apwiya, mene axaana aalapwa, entxa inyenyeeri simmora vameesa anamwane emmorihaaya.”
29 Nto Yesu aamweerela: “Mwaha wa moota mwaakhunlaanyu, muroweke, munepa woonanara woomuhiya mwaninyu.”
30 Nto muthiyana ole aarowa owaani anamphwanya mwanawe akonneene vakaamani ni munepa ole woonanara omukhummeene.
31 Yesu atthikakaru oTiro, aavira oSidoni anarowa ephareya ya oGalileya aviraka muttetthe wa oDekapoli.*
32 Areene weiwe, Yesu aawiiheriwa mulopwana mmoha ahiiwa ni ahuuluma nnene ni aatxontteliwa weera amwiiyaathere ntata nawe.
33 Yesu aamukuxa mulopwana ole anamuroiha nipuro nahaakhanlaayawo atthu. Nto aamuhelela ikatha sawe mmaaruni. Ni Yesu aasenyera ikatha sawe avinyaka anatava nlumi na mulopwana ole.
34 Awehaka wiirimu, Yesu aahiittha iphumu ni aamweerela: “Efata”, eyo tiiyo: “Ohuleye.”
35 Nto maaru a mulopwana ole, yaahuleya ni nlumi naataphuwa, nto owo aapatxera wuuluma nnene sene.
36 Nto Yesu aahaaleela weera, ehimuleele mutthu mukina etthu ele, mene emaara Yesu aaleelaawe atthu ale weera ehihime etthu ele, awo yaamweera otepa olaleya.
37 Tivanto, atthu yaatikhiniheya vantxipale ni yanneera: “Owo onnapaka nnene itthu sootheene, mpaka onnaweeriha atthu oohiiwa wiiwa ni oohuuluma wuuluma.”
Footnotes
^ Onyawa onhimwa va, onhimwa onyawa mpaka mweekookhwinoni, ntoko yeeraaya afarisi ni ayuda.
^ Onyawa onhimmwa va, onhimmwa onyawa mpaka mweekookhwinoni, ntoko yeeraaya afarisi ni ayuda.
^ Eversu ela ennaphwanyeya mwa a Biblya akina. Mene khemphwanyeya mwa soolempwa sa matata sintxipale sootthuneya sa eKereku.
^ Naari: “ti sootteelihiwa.”
^ Ni eKereku: “porneía.” Nwehe masu oowiiwanyeihiwa.
^ Naari: “mittetthe sa isidade 10.”
