Silempwale ni Marko 8:1-38
8 Mahiku ene yaale, muloko mutokotoko waatthu waathukumana ekwaha yanaaveeli ni Yesu ni awo khiyaarino etthu yootxa. Nto Yesu aawiitthana atthareli awe ni aaweerela ha:
2 “Ennakimoriha ikharari atthu ala, mwaha wooweera aavira mahiku mararu ereene ni miyo ni khiyaano yootxa.
3 Wakhala weera miyo kinimwaamwara ni etala, awo enookomoka mmuseweni ni akina a yaawo ekhumme ottayi wene.”
4 Atthareli awe yaamukoha: “Nipuro nna noorakamela ni mittetthe simakinwe, ninkela ophwanya woowiini ipaawu eneeraaya etxe atthu ala mpaka ovona?”
5 Nto mwaha wa yeeyo, Yesu aahaakohasa: “Murinono ipaawu ikavi?” Yaamwaakhula: “Seete.”
6 Ni aahaaruma atthu okilaathi vathi. Vano aakuxa ipaawu seete iye anavekela ni aakawanya anapatxera waavaha atthareli awe weera atthareli awe awo, evaheke muloko mutokotoko waatthu.
7 Saakhalavo-tho ihopa, nto, avekelakaru* aaweerela atthareli awe weera yaakaweleke atthu.
8 Vano, atthu ale yaahootxa mpaka ovona ni yaattottela iye saatxinwe ihala mpaka osara mittanka* seete.
9 Atthu yaatxiiye yaari 4.000 alopwanaru. Avinyaka owo aahaamwara.
10 Yesu vamoha ni atthareli awe yanwela paarku moowaakuveya enarowa, yaaphiya muttetthe wa oDalmanuta.
11 Areene weiwe, afarisi yaamwaattamela ni enapatxera ovaanyihana ni yoowo, envekelaka weera awoonihere ethoonyero ya wiirimu weera emweerere.
12 Nto Yesu, aahiittha iphumu ni aaheera: “Mwaha wa heeni atthu ala enaasaasaaya ethoonyero? Kinnooleelani ekhaikhai weera khiyaavoovo ethoonyero enkelaaya wooniheriwa atthu ala.”
13 Vano, aahaahiya yaawo ananwela paarku veeli anarowa ekhopela ekina ya ephareya.
14 Mene atthareli awe yaattiwala okuxa yootxa* ni khiyaakunxe yootxa ekina mpaarkuni ehikhanle epaawu emoha.
15 Yesu aawooperera atthareli awe aweerelaka: “Muhule maitho ni mwiikosoope ni efaramenta ya afarisi ni efaramenta ya Herodi.”
16 Nto atthareli yaapatxera wuuluma yaaworu mwaha woohikuxa yootxa.*
17 Yesu asuwelakaru etthu yuulumaaya, aaweerela aakohaka ha: “Mwaha wa heeni munuulumaanyu woohima sa ohikuxa yootxa?* Nlelo khamuniiwexexa? Muupuwelo anyu nlelo khoniiwexexa?
18 ‘Nnaamweera mureeneno maitho, nyuwo khamunoona, ni nnaamweera mureeneno maaru, nyuwo khamuniiwa?’ Neereke khamunuupuwelela
19 woohima sa mittanka mikavi soosareya nyuwo mwaattottenlaanyu emaara yeeyo kaakawannyaaka ipaawu sinku yaatxiiyaaya alopwana 5.000?” Omwaakhula yenre: “12.”
20 “Ni vaavo kaakawannyaaka ipaawu seete yaatxiiyaaya alopwana 4.000, ni mittanka* mikavi soosareya nyuwo mwaattottenlaanyu?” Omwaakhula yenre: “seete.”
21 Nto mwaha wa yeeyo, Yesu aahaakoha: “Nyuwosa nlelo khamuniiwexexa?”
22 Nto yaaphiya oBetisaida. Areene weiwo, aawiiheriwa mutthu oohoona ni yaamutxonttela weera amutave.
23 Yesu anvara ntata mulipa ole oohoona amukeliha okhwipi wa muttetthe. Amusenyerakaru mmaithoni, aamwiikaathera matata ni aamukoha: “Munnoona etthu?”
24 Mulopwana ole aahula maitho ni aamwaakhula Yesu eeraka: “Kinwoona atthu, mene atthu awo enkhala ntoko miri sineetta.”
25 Nto Yesu, aamwiikaathera ekwaha yanaaveeli matata mmaithoni ni mulopwana ole aapatxera woona nnene, ni maitho awe yaahuleya anoona nnene itthu sootheene woohikhala maxupo.
26 Vano, Yesu aamweerela: “Muroweke owaani, mene muhivolowe mmuttettheni.”
27 Yesu ni atthareli awe, yaavinya enarowa mittetthe sa oKesareya wa oFilipe, mphironi, aahaakoha atthareli awe: “Atthu enhima weera miyo taani?”
28 Omwaakhula yenre: “Akina eneera nyuwo Yohani Mpatisa, akina Eliya ni atthu akina enhima weera nyuwo mmoha a Maprofeta.”
29 Vano owo aahaakoha awo: “Ankhanto nyuwosa, muneera miyo taani?” Pedru aahaakhula: “Nyuwo Kristu.”
30 Yesu, aahaaleela atthareli awe moowaalipihera weera, ehimuleele mutthu weera owo Kristu.
31 Ovinya etempu ene yeele, Yesu aapatxera waaleela atthareli awe weera annatthuneya orowa oYerusalemu ni iwo, aamuhaaxiwa ni asitokweene aayuda, asitokweene aanamakeya ni alipa oolepa. Ni iwo aamwiiviwa, mene anvinyererihiwa nihiku nanaararu.
32 Yesu aahimme etthu ela moohikhuwa. Nto Pedru aamukuxera Yesu okhwipi, ni aapatxera omuximwela mwaha woohima itthu iye.
33 Nto mwaha wa yeeyo, Yesu aamurera ettuli Pedru anaaweha atthareli awe ni aamuximwela Pedru eeraka: “Okhale ottayi ni miyo Satana! Mwaha wooweera khamwaano minyuupuwelo sa Muluku, menento saatthu.”
34 Nto Yesu, aahiitthana muloko mutokotoko waatthu vamoha ni atthareli awe, ni aaweerela: “Ole ontthuna okhala mutthareli aka, aikhootte mwaneene awe ni akuxe mwiri wa nihaaxero* ni avireleleke okitthara.
35 Mene ole oneera avuluxe ekumi awe onooyeleela, mene ole oneera oyeleele ekumi awe mwaha wa miyo ni mwaha wa mitthenka sooreera, onoophwanya ekumi awe.
36 Yooreera eheeni, ophwanya elapo yootheene ya vathi, eeraka mutthu ayeleele ekumi awe yootheene?
37 Mutthu onrowa otxentxiha ni eheeni ekumi awe?
38 Akhala mutthu yoowo onuulihiwa muru mwaha wa miyo ni mwaha wa masu aka, variyari va atthu ala oohiroromeleya* ni anamattheka, Mwaana a Mutthu-tho, onimuulihiwa muru wa yoowo, aawaaka vamoha ni malaika ootteela moovuwani mwa Atiithi awe.”
Footnotes
^ Naari: “areelihakaru.”
^ Naari: “mittanka saaheliwa yootxa.”
^ Naari: “epaawu.”
^ Naari: “epaawu.”
^ Naari: “ipaawu.”
^ Naari: “mittanka saaheliwa yootxa.”
^ Ni eKereku: “ooraruwa.”
