Silempwale ni Marko 9:1-50
-
Othatuwa wa Yesu (1-13)
-
Olamihiwa wa mwaana aarino munepa woonanara (14-29)
-
Wa ale erino nroromelo, itthu sootheene ti soowereya (23)
-
-
Okhwa wa Yesu onnahimmwa veeli (30-32)
-
Atthareli ennavaanyihana woohima sa taani a yaawo ori mutokweene (33-37)
-
Ole ohinnivirikanyiha ori ni hiyo (38-41)
-
Nluku nookwattuliha (42-48)
-
“Ekumi anyu ekhaleno maakha” (49, 50)
9 Yesu aahaaleela-tho: “Kinnooleelani ekhaikhai weera: “Akina eri va, khenkela okhwa ehinaaye woona Omwene wa Muluku owaaka ni owera.”
2 Evirakaru mahiku 6, Yesu aamwiitthana Pedru, Yakobe ni Yohani, ni aahaakuxera yaaworu mwaako woorakama. Nto Yesu aathatuwa ohoolo waya;
3 soowara sawe saakhala soowaara ni sootteela vantxipale, khaavo mutthu ootxapa elapo ela ya vathi, eera awere otteeliha hiihaale.
4 Nave-tho, aamukhumelela Eliya ni Mose, ni awo yaatthekula ni Yesu.
5 Vanonto Pedru aamweerela Yesu: “Rabi,* ti wooreera weera nikhaleke wenno. Nrowe nipake itenta* tthaaru: emoha yawinyu, ya Mose ni ekina ya Eliya.”
6 Mweekhaikhai, awo yannoova vantxipale, ni khayaasuwela etthu yoopaka.
7 Naakhumelela nihutte naakhunenle, ni nsu nikhumaka munihutteni, naaheera: “Ola mwanaka oosiveleyaxa, mwa yoowo kinnahakalala. Mmwiiweleleke.”
8 Moohipisa, yaaweha mukhwipi ni khiyaamonne mutthu mukina ahikhanle Yesu paahi.
9 Etthikaka* Yesu aahaaleela weera ehimuleele mutthu yoowooniheriwa ele mpaka Mwaana a Mutthu ovinyererihiwa.
10 Awosa yaahiiwelela* masu a Yesu, mene yannakohana yaaworu etthu heeni yaataphulelaaya masu ooweera Yesu ovinyererihiwa mookhwaani.
11 Ni atthareli awe yaamukoha yeeraka: “Mwaha wa heeni alipa oolepa enhimaaya weera ontthuneya owa toko Eliya?”
12 Yesu owaakhula enre: “Eliya awe toko weera areherere itthu sootheene. Vano ela envarihana hayi ni ele elempwe woohima sa Mwaana a Mutthu weera owo ontthuneya ohooxiwa itthu sintxipale ni oramusiwa?
13 Mene kinnooleelani ekhaikhai weera Eliya, ohoowa nave aamweeriha itthu sootheene yaatthunaaya ntoko elempwalaaya voohima sa yoowo.”
14 Ephiyakaru nipuro yaaraayavo atthareli akina, yaahoona muloko mutokotoko waatthu waarukurenreene awo ni alipa oolepa evaanyihanaka ni yaawo.
15 Mene muloko mutokotoko waatthu omoonakaru, waatikhiniheya ni waatthimaka weera omuulumihe.
16 Nto Yesu aahaakoha: “Munvaanyihana woohima sa eheeni ni alipa oolepa?”
17 Mutthu mmoha aari variyari va muloko ole mutokotoko waatthu aamwaakhula: “Muhusiha, kirimwaaruuhela atthareli anyu mwanaka mwaha wooweera owo ookhalano munepa woohuuluma.
18 Nenne nri nipuro munepa owo woohuuluma onamphwanyaayavo, onnanvonyera vathi ni owo onnakhuma nipheru mmwaano, onnakhuuriha maino ni onnayeleela ikuru. Miyo kohaavekela atthareli anyu weera yoomole munepa owo, menento khewenre woomola.”
19 Yesu waakhula enre: “Nyuwo atthu oohikhala ni nroromelo ni oowuuma murima, mpaka liini kineeraaka kikhale ni nyuwo? Kinkela woovilelani mpaka liini? Mukiwiihere va.”
20 Nto yaamuroiha wa Yesu, munepa ole omoonakaru Yesu, moowaakuveya waamuthukumeliha mwaana ni aamorela vathi, ni mwaana ole aapatxera oluwela akhumaka nipheru mmwaano.
21 Nto Yesu aahaakoha apapawe mwaana: “Opatxenre liini weera hiiha?” Awo yaamwaakhula: “Ovinyera enamwane,
22 ni munepa owo onnanvonyera vamooroni ikwaha sintxipale, ni mmaahini weera omwiive. Mwawera vale opaka etthu, txontte mpake, munimorele ikharari weera munikhavihere.”
23 Yesu aaweerela: “Mwaha wa heeni munhimaanyu weera: ‘Mwawera!’ Wa atthu ale erino nroromelo, itthu sootheene ti soowereya.”
24 Moowaakuveya, apapawe mwaana ole yaakhuwela yeeraka: “Miyo kookhalano nroromelo! Mukikhavihere waatxeerera nroromelo naka!”
25 Yesu oonaka weera muloko waatthu wannawaattamela, moowaakuveya owo aahuulumela munepa ole woonanara eerelaka: “Munepa woohuuluma ni woohiiwa, kinnoolamula weera omuhiye mwaana ola ni ohimutthikele-tho!”
26 Munepa woonanara okhuwelakaru ni omuthukumelihakaru vantxipale, waamuhiya ni mwaana ole aakhala ntoko orookhwa, nto atthu antxipale yaahima weera: “Owo ohookhwa!”
27 Yesu anvara ntata anamweemexa, ni owo aaheemela.
28 Ephiyakaru nivaate nimoha, atthareli yaamwaattamela Yesu weephiini enamukoha ha: “Mwaha wa heeni hiyo nihiwenraahu woomola nlaika nne noonanara?”
29 Yesu owaakhula enre: “Nlaika noonanara ntoko nna, ninwera woomoliwa nnivekelo paahi.”
30 Yesu ni atthareli awe, yaakhuma nipuro nne, enavira oGalileya ni khaatthuna weera atthu esuwele eyo,
31 woona weera Yesu aaxuttiha atthareli awe, aweerelaka: “Mwaana a Mutthu onoovahereriwa* mmatatani mwa atthu, mene atthu awo enoomwiiva. Mene nnaamweera iivinweene onoorowa ovinyererihiwa yavira mahiku mararu.”
32 Mene khayiiwexexa etthu owo aaleelaawe, mene yannoova omukoha.
33 Yaaphiya oKafarnawu. Nto ephiyakaru vaate, owo aahaakoha atthareli awe: “Mwaavaanyihana woohima sa eheeni mmuseweni?”
34 Awo khiyaakhunle etthu, mwaha wooweera mmuseweni yaavaanyihana woohima sa taani aari mutokweene a yaawo.
35 Nto Yesu, aakilaathi awiitthana atthareli ale 12 anaweerela: “Ole ontthuna okhala oopatxera, akhaleke oomalihera aatthu ootheene ni murumeyi aatthu ootheene.”
36 Nto Yesu, aamwiitthana mwaana anamuhiya variyari vaya, aamukhupaarela ni anaweerela:
37 “Ole ommwaakhela mwaana ntoko ola mwa nsina naka, onnakaakhelela miyo; ni ale enkaakhela miyo, ennawaakhela ale ekirumme.”
38 Yohani aamwerela Yesu: “Muhusiha, noomoona mutthu oomolaka minepa soonanara mwa nsina nanyu, ni hiyo noheerera omukhoottihera mwaha wooweera owo khannitthara.”
39 Vano Yesu aaheera: “Muheerere omukhoottihera, mwaha wooweera khaavo onvara miteko sootikhiniha mwa nsina naka, avinyaka anuuluma itthu soonanara wa miyo.
40 Tthiri ole ohinnivirikanyiha, ori ni hiyo.
41 Miyo kinnoororomelihani weera ole onkela woovahani maahi oowura mwaha wookhala atthareli a Kristu, mweekhaikhai mutthu owo khanrowa oyeleela nlivo nawe.
42 Mene mutthu onkela omukwattuliha mmoha aasikhaani ala erino nroromelo mwa miyo, phataari mutthu owo aatthukelelinwe muxikoni mwawe nluku noolemela, nenno puuru oneettihaawe ni aavonyerinwe mphareya.
43 “Wakhala weera ntata nanyu ninnootthekihani, muthikile. Phataari waakhela ekumi mututhunyaka, ohikhanle oriheliwa matata anyu oomeeli oGehena,* omooroni ohintxipha.
44 * ——
45 Wakhala weera nnaani nanyu ninnootthekihani muthikile. Phataari waakhela ekumi murakanleene, ohikhanle ovonyeriwa oGehena* ni manaani anyu oomeeli.
46 * ——
47 Wakhala weera niitho nanyu ninnootthekihani, mukumihe murihe. Phataari ovolowa Moomweneni wa Muluku nniitho nimoha, ohikhanle oriheliwa oGehena* ni maitho oomeeli,
48 weiwo minyunku sihinkhwaayawo ni mooro ohintxiphaayawo.
49 “Atthu ntoko ala, ontthuneya waahela mooro ntoko hiihaale eneeleeliwaayano yootxa.
50 Maakha tooreera, vano, maakha yahiya osiva, munkela otthikihera hayi osiva waya? Ekumi anyu ekhaleno maakha ni mukhaleno murettele mukina ni mukhwaawe.”
Footnotes
^ Naari: “muhusiha.”
^ Naari: “mikottha.”
^ Naari: “ekhuruwaka omwaako.”
^ Apaale: “khayaamulenle mutthu mukina.”
^ Naari: “onimwinnyereriwa, onoovarihiwa.”
^ Eversu ela ennaphwanyeya mwa a Biblya akina. Mene khemphwanyeya mwa soolempwa sa matata sintxipale sootthuneya sa eKereku.
^ Eversu ela ennaphwanyeya mwa a Biblya akina. Mene khemphwanyeya mwa soolempwa sa matata sintxipale sootthuneya sa eKereku.
