Silempwale ni Matheyo 1:1-25
1 Eliivuru ya nloko na Yesu Kristu,* mwaana a Davidi, mwaana a Abrahamu.
2 Abrahamu aamuyara Isakhi;Isakhi aamuyara Yakobe;Yakobe aamuyara Yuda ni asinnawe;
3 Yuda aamuyara Peresi ni Zera moorweela mwa Tamari;Peresi aamuyara Esironi;Esironi aamuyara Arami;
4 Arami aamuyara Aminadabi;Aminadabi aamuyara Nasoni;Nasoni aamuyara Salimoni;
5 Salimoni aamuyara Bowazi moorweela mwa Rahabi;Bowazi aamuyara Obedi moorweela mwa Ruthi;Obedi aamuyara Yese;
6 Yese aamuyara mwene Davidi.
Davidi aamuyara Salomoni moorweela mwa amwaariye Uriya;
7 Salomoni aamuyara Robowamu;Robowamu aamuyara Abiya;Abiya aamuyara Asa;
8 Asa aamuyara Yosafati;Yosafati aamuyara Yorami;Yorami aamuyara Oziya;
9 Oziya aamuyara Yotani;Yotani aamuyara Akhazi;Akhazi aamuyara Ezekiya;
10 Ezekiya aamuyara Manase;Manase aamuyara Amoni;Amoni aamuyara Yosiya;
11 Yosiya aamuyara Yekoniya etempu ayuda yaathaamiherinwaaya oBabilonia.
12 Areene oBabilonia, Yekoniya aamuyara Salatiyeli;Salatiyeli aamuyara Zorobabeli;
13 Zorobabeli aamuyara Abiyudi;Abiyudi aamuyara Eliyakimi;Eliyakimi aamuyara Azori;
14 Azori aamuyara Sadoki;Sadoki aamuyara Akimi;Akimi aamuyara Eliyudi;
15 Eliyudi aamuyara Eleazari;Eleazari aamuyara Mathani;Mathani aamuyara Yakobe;
16 Yakobe aamuyara Yosefe iyawe Maria, Maria ene yoole aamuyanre Yesu yoowo oneeriwa Kristu.
17 Maloko ootheene ovinyera wa Abrahamu mpaka wa Davidi yaari 14, ovinyera wa Davidi mpaka etempu ayuda yaathaamiherinwaaya oBabilonia, yaari 14 ni ovinyera etempu yaathaamiherinwaaya oBabilonia mpaka owa wa Kristu, yaari maloko 14.
18 Oyariwa wa Yesu Kristu weereñye ha: Etempu Maria ameyawe Yesu yaattomerinwaaya ni Yosefe, awo yaarupala moorweela mwa ikuru sa munepa wootteela wa Muluku, Yosefe ahinaaye ovolowa.*
19 Woona weera Yosefe aari mulopwana a exariya, owo khaatthuna omuulihiha muru Maria. Tivawonto, aalakenlaawe omuhiya mwa mwiitiho.
20 Amalakaru wuupuwelela omuhiya Maria moowiitiha, nlaika na Yehova* naamukhumelela moolohani nimweerelaka: “Yosefe mwaana a Davidi, ohoove omuthela Maria omuttomenraawe mwaha wa erukulu oraaweno, woona weera erukulu oraaweno orupanle moorweela mwa munepa wootteela wa Muluku.
21 Maria onoomuyara mwaana mwaamulopwana ni mwaana owo, weyo onvahe nsina na Yesu,* woona weera owo onimwaavuluxa atthu awe mwa soottheka saya.”
22 Mweekhaikhai, sootheene seereñye weera, ikwanele itthu Yehova uulummaawe. Khalayi, Muluku aamuupuxera mmoha a maprofeta awe olepa ha:
23 “Nkawehani! Mwali oohipatxeriwa anaarupale ni anaamuyare mwaana mwaamulopwana ni mwaana owo, anaavahiwe nsina na Emanuweli,” nsina nno nintaphulela weera: “Muluku ori ni hiyo.”
24 Yosefe aavinya aakonaawevo ni aapaka itthu moovarihana ni miruku aavahinwaiye ni nlaika na Yehova ni aamuthela Maria anamukuxera owannyawe.
25 Nnaamweera Yosefe aamuthenle Maria, owo khaakonneno mpaka Maria omuyara mwaana mwaamulopwana, ni Yosefe anvaha nsina na Yesu mwaana owo.
Footnotes
^ Naari: “Mesiya; oothanliwa.”
^ Naari: “ehinaaye opaka ekasamentu.”
^ Ela ekwaha yoopatxera ya ikwaha 237 nsina na Muluku, Yehova, nimphwanyeyaaya mwa soolempwa sa eKereku sa ekristu. Nwehe masu oowiiwanyeihiwa.
^ Nsina nna, va eHeeberi nneeriwa Yehoxuwa, nenno nintaphulela weera “Yehova ti nvuluxa.”
