Silempwale ni Matheyo 11:1-30
11 Yesu amalihakaru waavaha miruku atthareli awe ale 12, aakhuma nipuro nne anarowa isidade saari vakhiviru ni anaalaleera atthu.
2 Yohani areene mukateya, aahiiwa voohima sa miteko Kristu aavaraawe ni aahaaruma atthareli awe
3 weera yamukohe Yesu: “Nyuwo muri Mesiya aalaiherinwe weera aamoowa elapo ya vathi, naari ninweherereke mutthu mukina aneera akhale Mesiya?”
4 Yesu owaakhula enre: “Murowe mwamuleele Yohani, ele munoonaanyu ni muniwaanyu:
5 Alipa oohoona vano ennoona, alipa oorakala vano enneetta, anamakokho ennalamihiwa, ni alipa oohiiwa vano enniiwa, alipa ookhwa ennavinyererihiwa, ni mitthenka sooreera ennalaleeriwa alipa oohaawa.
6 Oohakalala taale ehimphwanya wa miyo etthu yowaakwattuliha.”
7 Emaara atthareli a Yohani yaapwahaaya, Yesu aapatxera wuuluma ni atthu voohima sa Yohani, aakohaka: “Eheeni mwaakenlaanyu woona onikareni? Neereke mwaakenle woona mutathi ottikinyiwaka ni epheyo?
8 Nto taani mwaakenlaanyu omoona? Mulopwana owanre ikuwo sooreera? Atthu enwara ikuwo sooreera enkilaathi impa sa mamwene.
9 Vano mwaakelela woona eheeni onikareni? Mwaakenle omoona profeta? Aani, miyo kinnooleelani weera owo ompwaha profeta.
10 Owo mwaakelaanyu omoona, tiyoole soolepa saahimmaaya seeraka: ‘Nkawehani! kinoomurumiha namitthenka ohoolo wa, yoowo aneera oreherere mphirwaa!’
11 Miyo kinnooleelani ekhaikhai weera: Wa atthu ootheene eyarinwe ni muthiyana, khakhumelenle mutthu mutokweene ompwaha Yohani Mpatisa. Mene ole ori ooyeva Moomweneni wa wiirimu, onnampwaha Yohani.
12 Ovinya mahiku a Yohani Mpatisa mpaka olelo va, Omwene wa Muluku, ntthuvelo atthu eniilipiheraaya weera ephwanye. Nto ale eniilipihera, ennaphwanya.
13 Okhuma mahiku Yohani Mpatisa aapatxenraawe ovara muteko awe, Maprofeta ootheene ni Malamulo yaahima itthu saakela weereya muhoolo.
14 Vano mwatthuna waakhulela, ‘Yohani Eliya,’ yoole maprofeta yaamuhimmaaya weera aamoowa.
15 Ale eri ni maaru oowiiwa, yiiweke.
16 “Kinaalikanxere nnaani atthu ala? Alasa enlikana ni anamwane ekilanthi omerkaatu* enaakhuwelela asinkhwaaya:
17 ‘Hiyo nohoorumihelani eflauta nyuwo mootxenle wiina, hiyo wanriipa murima mene nyuwo mootxenle okhupanyera.’
18 Vamoha-moharu, Yohani annamutthuka ramasaani veeli-veeli ni khaawura eviinyu, menento atthu yeera: ‘Owo ookhalano munepa woonanara.’
19 Menento Mwaana a Mutthu, onnatxa ni onnawura eviinyu, menento atthu eneera: ‘Nkanweheeni vale! Namatxa ni namawura eviinyu, asinthamwene awe alipa ooliviha mpostu, ni anamattheka.’ Nto miruku sa mutthu, sinooneya weera ti seekhaikhai ni miteko saya.”
20 Vano, Yesu aapatxera wuulumela ni masu isidade iye sahaattharunwe nnaamweera aavanremo miteko sintxipale sootikhiniha opwaha mapuro makina.
21 Eeraka: “Ootakhaliwa ti nyuwo atthu oKorazini! Ni atthu oBetisaida! Mwaha wooweera, waari weera atthu oTiro ni oSidoni ahoona miirira sipakinwe mmittettheni mwanyu, saano awo yaattharunwe khalayi ni ewanreene esaakho* ni ekilantheene vattuurani.
22 Mene miyo kinnooleelani weera: Nihiku noothoriha itthu sinkela okhumelela oKorazini ni oBetisaida, sinkela okhala sootepa oxupa opwaha oTiro ni oSidoni.
23 Neereke nyuwo atthu oKafarnawu, munimunnuwihiwa mpaka wiirimu? Nyuwo munkela wuulihihiwa muru* mwaha wooweera, waari weera miteko sootikhiniha sipakinwe mmittettheni mwanyu saapakinwe oSodoma, saano Sodoma ahinyaanyinwe.
24 Mene miyo kinnooleelani weera: Nihiku noothoriha itthu sinkela okhumelela oKafarnawu, sinkela okhala sootepa oxupa opwaha ele enkela weereya oSodoma.”
25 Etempu ene yeele, Yesu aaheera: “Tiithi kinnoovuwihani variyari va atthuni, nyuwo Tiithi, Pwiya a wiirimu ni elapo ya vathi, mwaha wooweera khamwaasuwelinhe itthu iya anamiruku ni asuweli, menento mwaasuwelinhe atthu eri ntoko anamwane akhaanini.’
26 Aani Tiithi, mwaha wooweera nyuwo mootthuna opaka itthu mooteene yoola.’
27 Itthu sootheene kohinnyereriwa ni Apapaka ni khaavo omusuwenle nnene sene Mwaana waapwaha Apapawe ni khaavo aasuwenle nnene sene Atiithi ompwaha Mwanaya ni ale Mwaana ontthunaawe waasuweliha.
28 Nkawani wa miyo ootheene nyuwo muri ookhulumuwa ni nyuwo mulemelinwe miritti sanyu, miyo kinoowiitthuuwihani.
29 Mukhale atthareli aka ni muxuttere ni miyo, woona weera miyo toomaala ni oowiiyeviha, mwapaka eyo, munoophwanya wiitthuuwa mweekumini mwanyu.
30 Okhala mutthareli aka* khonxupa ni muritti aka ti wooveya.”
Footnotes
^ Naari: “mapuro oowaattiwa.”
^ Ni eKereku: “Onimooroihani mmahiye.” Nwehe masu oowiiwanyeihiwa.
^ Ni eKereku: “Mwaakhulele exuuku aka.”
