Silempwale ni Matheyo 17:1-27
17 Evirakaru mahiku 6, Yesu aamwiitthana Pedru, Yakobe ni munnawe eeriwa Yohani, aahaakuxera yaaworu omwaako woorakama.
2 Nto Yesu aathatuwa ohoolo waya ni owiitho wawe wannaara ntoko nsuwa, ikuwo sawe saathatuwa sootteela* ntoko waara.
3 Athatunweene hiihaale, aamukhumelela Mose ni Eliya enatthekula nuuwo.
4 Vanonto, Pedru aamweerela Yesu: “Pwiya, ti wooreera weera nikhaleke wenno, mwatthuna vale, miyo pooti opaka itenta* tthaaru, emoha yawinyu, ya Mose ni ekina ya Eliya.”
5 Ariki wuuluma hiihaale, nihutte noowaara naahaakhunela. Ni moohipisa nsu nikhumaka munihutteni mmo naaheera: “Ola mwanaka oosiveleyaxa, mwa yoowo kinnahakalala. Mmwiiweleleke.”
6 Atthareli ale yiiwakaru masu ale yaahoova vantxipale, yaakokhora ni yaahuuramela vathi.
7 Yesu, aawaattamela awo anaatava ni anaweerela: “Mweemele, muhoove.”
8 Yeemexakaru miru, khiyaamonne mutthu mukina ahikhanle Yesu paahi.
9 Etthikaka* omwaako aahaaleela weera: “Ehimuleele mutthu yoowooniheriwa ele, mpaka Mwaana a Mutthu ovinyererihiwa.”
10 Atthareli awe, yaamukoha yeeraka: “Mwaha wa heeni alipa oolepa enhimaaya weera ontthuneya toko owa Eliya?”
11 Yesu owaakhula enre: “Eliya awe toko weera areherere itthu sootheene.
12 Miyo kinnooleelani weera Eliya ohoowa, menento awo khemusuwenle, nave aamweeriha etthu yaatthunaaya. Emoha-moharu, Mwaana a Mutthu onoohasuliwa naawo.”
13 Vano, atthareli yaahoonelela weera owo aamuhima Yohani Mpatisa.
14 Aphiyakaru nipuro yaaraayavo atthu antxipale, mulopwana mmoha aamwaattamela anakokhora ohoolo wawe amweerelaka:
15 “Pwiya, mummorele ikharari mwanaka, owo neetxiletxile ni onnavoreiwa ni onnamorela ikwaha sintxipale vamooroni ni mmaahini.
16 Kaahaawihera atthareli anyu, nto awo khewenre omulamiha.”
17 Yesu waakhula enre: “Nyuwo atthu oohikhala ni nroromelo ni oowuuma murima! Mpaka liini kineeraaka kikhale ni nyuwo? Kinkela woovilelani mpaka liini? Mukiwiihere va.”
18 Yesu aahuulumela nlaika nne noonanara ni naamuhiya mmiravo ole, ni ovinya etempu ene yeele, aalama.
19 Moottharelana, atthareli yaamwaattamela Yesu weephiini enamukoha: “Mwaha wa heeni hiyo nihiwenraahu woomola nlaika nne noonanara?”
20 Owaakhula enre: “Mwaha wookhalano nroromelo vakhaaniini. Kinnooleelani ekhaikhai wakhala weera munookhalano nroromelo ninlikana ni enuku ya emostarta,* munimweerela mwaako, opheleye va weemele vale, ni owo onoopheleya ni khiyaavo etthu eneera yooxupekeni.”
21 * ——
22 Yaari etempu Yesu aathukumannaawe vamoha ni atthareli awe oGalileya aalenlaawe weera: “Mwaana a Mutthu, onoovahereriwa mmatatani mwa atthu,
23 ni atthu awo enookela omwiiva ni nihiku nanaararu onoovinyererihiwa.” Atthareli awe, yaariipiwa murima vantxipale.
24 Ephiyakaru oKafarnawu, asilopwana yaaliviha mpostu* yaamwaattamela Pedru enamukoha ha: “Muhusiha anyu khanliva mpostu?”
25 Pedru owaakhula enre: “Onnaliva.” Avolowakaru mpaani, Yesu aapatxenre omukoha: “Munoonela hayi Simoni? Mamwene a mulaponi enaaliviha taani mpostu? Enaaliviha anamwane aya naari atthu ehaasuwenlaaya?”
26 Owo waakhula enre: “Atthu ehaasuwenlaaya” Yesu aamweerela, nto eyo enoonihera weera anamwane a mamwene khenliva mpostu.
27 Nto weera nihaakwatulihe awosa, nvinye va murowe ophareya, mwavonyere nimeso nanyu mphareya, ehopa yoopatxera munkelaanyu owarula mwaathamihe munoophwanya mpuwa mmo musurukhu wa eparatha. Mukuxe musurukhu owo mwakilivele mpostu miyo ni nyuwo.”
Footnotes
^ Naari: “sannatxerimela.”
^ Naari: “mikottha.”
^ Naari: “ekhuruwaka.”
^ Enuku ya emostarta emphwanyeya wIsraeli ni ela pooti wunnuwa mpaka ophiyera imeetru 4 ni ennakhalano ithampi.
^ Eversu ela ennaphwanyeya mwa a Biblya akina. Mene khemphwanyeya mwa soolempwa sa matata sintxipale sootthuneya sa eKereku.
^ Ni eKereku: “itrakima piili.”
