Silempwale ni Matheyo 18:1-35
18 Ewoora ene yeele, atthareli yaamwaattamela Yesu, enamukoha ha: “Taani ori mutokweene Moomweneni wa wiirimu?”
2 Nto Yesu, aamwiitthana mwaana anamuhiya variyari vaya
3 ni aahaaleela: “Kinnooleelani ekhaikhai weera: Mwaahirukunuxe* mirima sanyu munkhala ntoko anamwane ala, muhiweherere weera munoovolowa Moomweneni wa wiirimu.
4 Tivawonto, ole oniiyeviha ntoko mwaana ola, ori mutokweene Moomweneni wa wiirimu
5 ni ole ommwaakhelela mwaana ntoko ola mwa nsina naka, onnakaakhelela miyo.
6 Mene mutthu onkela omukwattuliha mmoha aasikhaani ala erino nroromelo mwa miyo, phataari mutthu owo aatthukelelinwe muxikoni mwawe nluku noolemela nenno puuru oneettihaawe ni aavonyerinwe mphareya moowiixa.
7 “Ootakhaliwa atthu a mulaponi, mwaha wooweera ennaweeriha atthu akina okwattuliwa. Ekhaikhai weera enookhala atthu awo enweeriha akhwaaya okwattuliwa mene atthu empaka etthu eyo aatakhaliwa!
8 Wakhala weera ntata nanyu naari nnaani nanyu ninnootthekihani mukumihe ni murihe, phataari waakhela ekumi mututhunyaka naari murakanleene, ohikhanle matata anyu naari manaani anyu oomeeli ovonyeriwa vamooroni ohintxipha.
9 Nave-tho wakhala weera niitho nanyu ninnootthekihani, mukumihe ni murihe, phataari waakhela ekumi nniitho nimoha ohikhanle ovonyeriwa oGehena* ni maiitho oomeeli.
10 Mwiikosoope weera muhimuramuse mmoha aasikhaani ala. Kinnooleelani weera malaika eri wiirimu ennoona ekhove ya Atiithi aka eri wiirimu.
11 * ——
12 “Munoonela hayi? Mutthu akhalano iputtiputthi 100, emoha eriheya, neereke khanhiya iye 99 omwaako anarowa waasaasa ele eriheñye?
13 Ni aphwanya vale, kinnooleelani weera: onoohakalala vantxipale ni ele yaariheñye opwaha iye 99 sahaariheñye.
14 Vamoha-moharu, Atiithi aka* eri wiirimu khentthuna weera mmoha aasikhaani ala eriheye.
15 “Opwaha mwa yeeyo, munninyu ootthekelani, murowe mwamoonihere yoottheka awe muhimukunxe mutthu mukina. Awiiwani moomukhavihera munninyu opaka etthu yooreera.
16 Owo aahiwiiwani, mmukuxe mutthu mmoha naari eeli, nto moovarihana ni onamoona* wa atthu eeli naari araru, mwaha wootheene wuulummwe omale.
17 Wakhala weera khanwiiwani, mwamuhime mmulokoni, wakhala weera khantthuna wiiwa muloko, mmooneke owo okhala ntoko mutthu a mulaponi naari namaliviha mpostu.
18 “Kinnooleelani ekhaikhai weera: Itthu sootheene muneeraanyu mutthuke elapo ela ya vathi, sinaatthukiwe wiirimu, ni itthu sootheene muneeraanyu mutaphule elapo ela ya vathi, inootaphuliwa wiirimu.
19 Wakhala weera eeli a nyuwo muri elapo ela ya vathi mohaavekela etthu yootthuneya Atiithi aka eri wiirimu, awo enoowaakhulelani woovahani etthu eyo.
20 Nipuro ethukumannaayavo atthu eeli naari araru mwa nsina naka, miyo tho kiri vaavo.”
21 Pedru aamwaattamela Yesu anamukoha: “Apwiya, ikwaha ikavi kintthuneyaaka omulevelela munnaka akitthekela vale? Kimuleveleleke mpaka ikwaha seete?”
22 Yesu omwaakhula enre: “Miyo nkinooleelani weera mmuleveleleke mpaka ikwaha seete, mene mmuleveleleke mpaka ikwaha 77.
23 “Omwene wa wiirimu, pooti olikanxeriwa ni mwene ontthuna weera anamuteko awe emulive itthu yaamukophenlaaya.
24 Apatxerakaru okoha, aawiiheriwa namuteko* aamukophenle italentu 10.000.*
25 Nto woona weera namuteko ole khaarino musurukhu woolivela yookophaawe, pwiya awe, aaruma weera atumihiwe owo, amwaariye, anamwane awe ni itthu sootheene aaraiyeno weera eliviwe yookopha awe.
26 Vano, namuteko ole aakokhora ohoolo wa mwene anamutxontela eeraka: ‘Mukipixere murima, kinimoolivani itthu sootheene kookophenlaakani.’
27 Mwene amoonaka omoriha ikharari namuteko awe, aamulevelela yookopha awe.
28 Mene akhumakaru wa mwene namuteko ole aalevelelinwe, amphwanya namuteko mukhwaawe aamukophenle itenaariyu 100, ni anvaraka vaxikoni annamunyoka amweerelaka: ‘Mukilive itthu sootheene mukikophenlaanyu.’
29 Namuteko mukhwaawe ole, aamukokhorela ni anamutxonttela eeraka: ‘Mukipixere murima, miyo kinimoolivani itthu sootheene.’
30 Mene khaamulevelenle. Opwaha mwa yeeyo, aamutthukiha mukateya, mpaka ophiyera etempu eeraiye amulive itthu sootheene.
31 Anamuteko akhwaawe akina yoonakaru etthu ele, yaariipiwa murima vantxipale ni yaarowa omuleela mwene itthu sootheene seereñye.
32 Vootharelana, mwene aamwiitthana namuteko ole aamulevelenlaiye, anamweerela: ‘Namuteko oonanara murima, okitxonttelakaru, miyo kaalevelela yookopha yootheene.
33 Khawaareerela weyo tho ommorela ikharari namuteko mukhwaa ntoko miyo koomorenlaaka ikharari?’
34 Nto mwene anyoonyinweene vantxipale, aawinnya makwaarta a mukateya weera emutthuke mpaka owo oliva musurukhu wootheene aamukophenlaawe.
35 Vamoha-moharu, Atiithi aka eri wiirimu, enkela oweerihani etthu emoharu wakhala weera khamunaalevelela asinninyu ni murima wootheene.
Footnotes
^ Naari: “otxentxa.”
^ Eversu ela ennaphwanyeya mwa a Biblya akina. Mene khemphwanyeya mwa soolempwa sa matata sintxipale sootthuneya sa eKereku.
^ Apaale: “Atiithi anyusa.”
^ Ni eKereku: “eyano.”
^ Naari: “mulopwana.”
^ Italentu 10.000 sa eparatha, musurukhu waakwana itenaariyu 60.000.000.
