Silempwale ni Matheyo 2:1-23
2 Yesu ayariwakaru oBetelehemu wa oYudeya mahiku amwene Herodi,* alipa oosoma ithenyeeri yaakhuma ninkhuma nsuwa, yaaphiya oYerusalemu.
2 Ephiyakaru, awo yaakonhe ha: “Ori woowiini mwaana oyarinwe, weera akhale mwene aayuda? Nohoona ethenyeeri awe emaara naaraahu ninkhuma nsuwa ni naawenle omukokhorela.”*
3 Emaara Herodi ni atthu ootheene oYerusalemu yiiwalaaya ele alipa oosoma ithenyeeri yaahimmaaya, yaahoova vantxipale.
4 Herodi aahaawopa asitokweene ootheene aanamakeya ni alipa oolepa ni aahaakoha woowiini eeraiye ayariwewo Kristu.*
5 Ni yaamwaakhula yeeraka: “oBetelehemu wa oYudeya, ninhima hiiha mwaha wooweera profeta olempe ha:
6 ‘Nyuwo Betelehemu, elapo yoohisuwanyeya vamaithoni va makovernatore oYuda, mene wa nyuwo anaakhume mwene onkela waahoolela atthu aka, ana a Israeli.’”
7 Herodi aawiitthana moowiipitheya alipa oosoma ithenyeeri, atthunaka osuwela etempu heeni awosa yonnaaya ethenyeeri.
8 Nto, aahaarumasa orowa oBetelehemu, aweerelaka ha: “Murowe, mwamwaasaase nnene sene mwaana owo oyarinwe, mwamphwanya vale, mutthikele wenno mukileele weera miyo tho kirowe kamukokhorele.”*
9 Emwiiwakaru mwene, yaapwahasa ni ethenyeeri ele awo yonnaaya ereenesa ninkhuma nsuwa, yannaahoolela yaawo mpaka ophiya ni weemela vanipuroni nenne aaraawevo mwaana.
10 Yoonakaru ethenyeeri ele yaahoolela yeemelaka, yaahakalala vantxipale.
11 Evolowakaru mpaani yaamoona Maria amukunxeene mwaana, ni yaamukokhorela ni enamuttittimiha mwaana owo. Nave-tho, yaakumiha mihakhu saya ni yaanvaha: Ewooru, erupani* ni emiira.*
12 Okhala weera nlaika na Muluku naahaakhumelela moolohani* nihimaka weera ehitthikele wa Herodi, nto mwaha wa yeeyo, etthikelaka owannyaya yaavira mphiro mukina.
13 Epwahakaru alipa oosoma ithenyeeri, nlaika na Yehova naamukhumelela Yosefe moolohani, nnamweerela ha: “Ovinye, omukuxe mwaana ni ameyawe otthawele wExipitu ni ohitthike wExipitu kihinaaye wooleela weera otthike. Opake eyo mwaha wooweera Herodi, ohanle opatxera omwaasaasa mwaana weera amwiive.”
14 Noomala Yosefe wiiwa masu ala, aamukuxa mwaana ni ameyawe anarowano wExipitu noohiyu.
15 Yosefe aakhala wExipitu mpaka Herodi okhwa. Eyo yaakwanihera ele Yehova aahimmaawe moorweela mwa profeta awe, eeraka: “Miyo koomwiitthana mwanaka wExipitu.”
16 Herodi oonakaru weera aawokiwa ni alipa oosoma ithenyeeri, aanyoonyiwa vantxipale ni aalamula weera yiiviwe anamwane ootheene asilopwana a iyaakha piili orowa vathi a oBetelehemu ni mittetthe soowaattamela. Aapanke eyo moovarihana ni etempu aaleelinwaawe ni alipa oosoma ithenyeeri.
17 Eyo, yaakwanihera masu a profeta Yeremiya aahimmaawe, eneera:
18 “Nohiiwanyeya nsu noowinla ni noowiikhupanyera oRama. Aari Rakeli awinlelaka anamwane awe, owo khaatthuna omaalihiwa, mwaha wooweera ahookhwa.”
19 Akhwiiyeene Herodi, nlaika na Yehova naahiisooneiha wa Yosefe moolohani wExipitu,
20 ni naamweerela: “Ovinye, omukuxe mwaana ni ameyawe orowe elapo ya wIsraeli, mwaha wooweera atthu yaatthuna omwiiva mwaana ahookhwa.”
21 Yosefe aavinya anamukuxa mwaana vamoha ni ameyawe enarowa elapo ya wIsraeli.
22 Iiwalaawe weera mwaana a Herodi, Arikilawo aalamulela oYudeya aaranttelaka apapawe, Yosefe aahoova. Opwaha mwa yeeyo, owo aahaakhela miruku sa Muluku moolohani weera ahirowe iwo. Nto mwaha wa yeeyo, aavinya anarowa oGalileya.
23 Yosefe aarowa ni aamaka esidade emoha yiitthaniwa Nazareti. Weera ekwanele masu yaahimmwale ni maprofeta, yeera: “Owo oniitthaniwe muNazareti.”
Footnotes
^ Naari: “omuttittimiha.”
^ Naari: “Mesiya, oothanliwa.”
^ Naari: “kamuttittimihe.”
^ Naari: “mukhoveni.”
