Silempwale ni Matheyo 22:1-46
22 Yesu aahuuluma tho naawo ni maphwanaphwaniho, eeraka:
2 “Omwene wa wiirimu pooti olikanxeriwa ni mwene yoowo ompakenle mwanawe efeesta ya ekasamentu.
3 Mwene aahaaruma akaporo awe owiitthana alipa oowompwa efeesta ele ya ekasamentu, menento awo, yaakhootta owa.
4 Menento owo aahaaruma tho veeli akaporo akina aweerelaka: ‘Mwaaleele alipa oowompwa weera: “Kooreherera efeesta; kohiiva imompe saka sooneneva ni kooreherera itthu sootheene. Nwe ofeestani ya ekasamentu.”’
5 Nto alipa oowompwa, khayaapwantthe eyo, mmoha aarowa omatta wawe mukina omweetta nakoso;
6 ni akina yaahaavara akaporo ale, yaahaamana enawiiva.
7 “Mwene aanyoonyiwa vantxipale ni aahaarumiha anakhotto awe orowa owiiva anamwiiva ale ni ohisa isidade saya.
8 Avinyaka, mwene aaweerela akaporo awe: “Efeesta ya ekasamentu yoolikana, menento alipa oowompwa ale khayaaphwanelenle.
9 Vanonto, murowe misewe sinkhuma osidade mwanwopeke mutthu ori poothe muneeraanyu mumphwanyeke weera awe ofeestani ya ekasamentu.’
10 Nto, akaporo ale yaarowa omuseweni ni yaahaathukumanya atthu ootheene yaaphwanyaaya mmuseweni, ooreera murima, oonanara murima, ni nipuro yaapakiwaaya efeesta, yaasareya atthu oowompwa.*
11 Emaara mwene aakenlaiye waaweha atthu yaawompwale, aamoona mulopwana mmoha ahaawanre ikuwo sa okasamentuni.
12 Ni aamweerela: “Nthamwene, nvolonwe moota heeni mu, muhikhanleno ikuwo sa ekasamentu? Owo khaakhunle etthu.
13 Mwene aaweerela arumeyi awe: “Mmutthuke matata ni metto mmurihele opiphini iwo, vaate vawo ni ti weiwo onrowaawe winla ni okhuuriha maino awe.’
14 “Atthu ewopinwe antxipale, mene vakhaaniini ethanlinwe.”
15 Nto, afarisi yaapwaha ni yaavaanela weera envare ni masu awe.
16 Avinyaka afarisi, yaahaaruma attharelaaya vamoha ni atthareli a Herodi weera yamweerele ha Yesu: “Muhusiha, hiyo noosuwela weera nyuwo munuuluma ekhaikhai ni munxuttiha ikhaikhai sa Muluku ni khamunaasaasa waasiveliha atthu mwaha wooweera khamwaanoono nthalu.*
17 Vano, wa moonelo anyu: “Onnareerela omuliva mpostu Sesare naari hooye?”
18 Yesu asuwelaka murima aya aaweerela: “Anamootha, mwaha wa heeni munkeereraanyu?
19 Mukoonihere musurukhu onliveliwa mpostu.” Yaamuruuhela etenariyu emoha.
20 Aahaakoha: “Ekhove ni yoolepa ela eri va, ti yawani?
21 Yaamwaakhula: “Ti ya Sesare.” Aaweerela: “Munvaheke Sesare eri ya Sesare ya Muluku eri ya Muluku.”
22 Yiiwakaru eyo, yaatikhiniheya ni yaamuhiya enapwaha.
23 Asaduki yaale enhima weera khawaavo ovinyerera, nihiku nene nenne yaamwaattamela enamukoha ha:
24 “Muhusiha, Mose aahimme weera: ‘Mulopwana akhwa vale ahimuyanre mwaana, munnawe aatheleke akunyaata awe* weera amuyarele mwaana munnawe.’
25 Nto, yaakhala variyari vahu alopwana seete yaawo yaari asinna. Oopatxera aamuthela muthiyana nto ahinaaye omuyara mwaana, aakhwa. Nto woona weera khaamuhiñye mwaana, munnawe aahaathela akunyaata awe.
26 Yaaheereya ni anaaveeli, anaararu ni ootheene ale seete.
27 Omamaliheroni, muthiyana ole aahookhwa.
28 Vanonto, woovinyererihiwani wa alipa ookhwa, muthiyana ola anaakhale mwaara awani, noonaka weera asinna ale seete ootheene yaamuthela?
29 Yesu owaakhula enre: “Nyuwosa munimwiisoototha mwaha wooweera kamusuwenle soolepa naari owera wa Muluku;
30 emaara enkelaaya ovinyererihiwaka alipa ookhwa, alopwana khethelaka ni athiyana khetheliwaka, woona weera enkela olikanaka ni malaika a wiirimu.
31 Woohima sa ovinyererihiwa wa alipa ookhwa, khamusomme ele Muluku aahimmaawe, eneera:
32 “Miyo ka Muluku Abrahamu, a Isakhi ni a Yakobe? Owo Muluku aatthu akumi khaiyene Muluku aatthu ookhwa.”
33 Muloko wa atthu, wiiwakaru masu ale, waatikhiniheya vantxipale ni moota aaxuttihaawe.
34 Afarisi yiiwakaru weera Yesu aahaamaaliha asaduki, awosa yaathukumana.
35 Mmoha a yaawo aari oosuwela malamulo atthunaka omweerera Yesu, aamukoha:
36 “Muhusiha, nlamulo heeni nri nootepa otthuneya a malamulo?
37 Owo omwaakhula enre: “‘Omusivele Yehova Muluku aa ni murimaa wootheene, ni ekumi aa yootheene ni muupuwelo aa wootheene.
38 Nna, nri nlamulo noopatxera ni nootepa otthuneya.
39 Nlamulo nanaaveeli noolikana ni nna, tinna, omusiveleke mukhwaa ntoko oniisivelaawe.
40 Malamulo ootheene ni soolepa sa Maprofeta ekumanyihinwe ni malamulo ala meeli.”
41 Afarisi ethukumanneene, Yesu aahaakoha:
42 “Munuupuwela eheeni woohima sa Kristu, owo mwaana awani? Omwaakhula yenre: “Owo Mwaana a Davidi.”
43 Nto owo, aahaakoha: “Vanonto, moota heeni Davidi uupuxeriwaka ni Muluku, ommwiitthanaawe Kristu Pwiya? Eeraka:
44 “Yehova ooweerela Apwiya aka, mukilaathi moono aka woolopwana mpaka miyo waavonyera vathi vamanaani aa, amwiittanaa?
45 Vanonto, Davidi aamuhimaka okhala Pwiyawe, moota heeni onkelaawe okhala mwanawe?”
46 Ni khaavo aawenre omwaakhula etthu, ovinyera nihiku nene nenne, khaavo tho eerera ompaka makoho.
Footnotes
^ Naari: “atthu yaatxa.”
^ Naari: “khamunweha mikhalelo sa atthu.”
^ Ni eKereku: “naamukhweli.”
