Silempwale ni Matheyo 23:1-39
23 Yesu aaheerela ha muloko wa atthu ni atthareli awe:
2 “Alipa oolepa ni afarisi, ahiithanlela ovara muteko wa Mose.
3 Nto, mpakeke ni mutthareke itthu sootheene enooleelaayani mene muhikhale ntoko awo. Mwaha wooweera, awo enimweera wuuluma paahi mene khenpaka ele enuulumaaya.
4 Awo ennatthuka miritti soolemela enaakapattiha atthu vanikhatani mene awo asineene khentthuna otannya naari ni ekatha emoha mano.
5 Miteko saya sootheene envaraaya, envara weera yooniwe ni atthu. Awo ennunnuwiha ikaaxa* ikhaanini sirino soolepa weera yiikosoopeno ni ennarakamiha soowara saya.
6 Waasivelasa okilaathi mapuro oottittimiheya a nfeestani, okilaathela ikatera soopatxera sa musinakooka,
7 wuulumihiwa mapuro oowaattiwa ni wiitthaniwa Rabi.*
8 Nyuwosa muhiitthaniweke Rabi,* woona weera muhusiha anyu ori mmoha, nto nyuwo ootheene muri* asinna.
9 Muhimwiitthane mutthu valaponi tiithi, woona weera Tiithi anyu ori mmoha a wiirimu.
10 Hata vakhaaniini mano muhiitthaniwe muhooleli, woona weera Muhooleli anyu ori mmoha, Kristu.
11 Mene, ole ori mutokweene variyari vanyu, ontthuneya weera akhaleke kaporo anyu.
12 Ole onkela wiisunnuwiha, onooyevihiwa ni ole onkela wiiyeviha, onimunnuwihiwa.
13 “Mootakhaliwa nyuwo alipa oolepa ni afarisi, anamootha! Mwaha wa heeni munwalaanyu mulako wa Omwene wa wiirimu weera atthu ehivolowe; noonaka weera nyuwosa mwaneenaanyu khamunvolowa naari khamunaahiya atthu akina eri mphironi evolowaka.
14 * ——
15 “Mootakhaliwa nyuwo alipa oolepa ni afarisi, anamootha! Nyuwo munneetta ikwaha soorakama valaponi, mmwaasaka mutthu weera mmukhalihe mutthareli anyu,* vano, mwamphwanya vale, munnamweeriha mutthu owo orowa oGehena* ni okhalano nthowa nintxipale woopwahani nyuwo.
16 “Oothakhaliwa ti nyuwo munweettiha akhwiinyu, nyuwo tho muhoonaka. Muneera: ‘Wakhala weera mutthu oolipela aromolaka etemplu, eyo khaiyene etthu mene mutthu alipela aromolaka ewooru ya mutemplu, mutthu owo ontthuneya okwanihera eyo olipenlaawe.
17 Nyuwo alolo ni alipa oohoona! Yootepa otthuneya ti heeni: ewooru naari etemplu entteeliha ewooru?
18 Nyuwo ohima muneera: “Mutthu alipela amuromolaka altaari olipela iwo khaiyene etthu.* Mene wakhala weera mutthu onnalipela oromolaka soovaha siri valtaari vawo, mutthu owo onnatthuneya okwanihera ele olipenlaawe.
19 Alipa oohoona! Eheeni eri yootepa otthuneya: yoovaha naari altaari ontteeliha yoovaha eyo?
20 Ole onlipela amuromolaka altaari, onlipela itthu sootheene siri vaavo;
21 ole onlipela aromolaka etemplu onlipela etemplu ni Ole onkhala mwemmo;
22 ni ole onlipela aromolaka erimu onlipela ehitxe ya Muluku ni Ole okilaathenle.
23 “Mootakhaliwa nyuwo alipa oolepa ni afarisi, anamootha! Mwaha wa heeni munvahaanyu eparte ya naamuloko ya ortelawu, endro ni kominyu mene muhintthara nyaha sootepa otthuneya sa Nlamulo, eyo tiiyo, exariya, omoriwa ikharari ni ororomeleya. Iya itthu muntthuneyaanyu weettela mene muhihiyaka ikina.
24 Nyuwo alipa oohoolela oohoona, munxaaxa itxetxema mene mummira ekamelu!
25 “Mootakhaliwa nyuwo alipa oolepa ni afarisi, anamootha! Mwaha wa heeni mummurapihaanyu koopho ni eparatho, vaateru mene mmirimanimwanyu muntthuna wiisiveliharu mwaneenaanyuru* ni ohikwaneya.
26 Nyuwo afarisi oohoona, mpatxere omurapiha koopho ni eparatho mpuwa weera vaate vaya ekhale yooreera.
27 “Mootakhaliwa nyuwo alipa oolepa ni afarisi, anamootha! Nyuwo munlikana ni mahiye ootteelihiwa, yaawo vaate enooneya okhala ooreera mene mpuwa aasareya makhuva aatthu ookhwa ni itthu sootheene soonanara.
28 Vamoha-moharu, vamaithoni va atthu, nyuwo munkhala ntoko atthu a exariya mene vamurimani vanyu moosareya wootha ni itthu soonanara.
29 “Mootakhaliwa nyuwo alipa oolepa ni afarisi, anamootha! Nyuwo munaatekela mahiye maprofeta ni munreeriha mahiye aatthu oororomeleya.*
30 Nyuwo ohima muneera ha: “Waari weera hiyo naakhala mahiku aamuhavinre ahu, khanaarowa weerela eparte oyeehiwa wa ephome ya maprofeta.’
31 Nto, nyuwo muniihima mwaneene anyu weera mwa anamwane aatthu ale ewiivale maprofeta.
32 Vano, munkwanihera miteko* sa amuhavinraanyu.*
33 Inowa nyu, osuulu wa evili, munkela otthawa moota heeni othorihiwa ni ovonyeriwa oGehena?
34 Tivanto, kinoorumihelaakani maprofeta, asuweli ni anamaxuttiha. Akina a yaawo nyuwo munoowiiva ni waakhomela vamwirini ni akina munimwaawaxula musinakookani mwanyu ni waatthara-tthara esidade ni esidade.
35 Nto yoomoreleni ephome yootheene ya anaxariya yiivinwe elapo ya vathi, okhuma ephome ya Abeli naxariya mpaka ephome ya Zakariya mwaana a Barakhiya mmwiivalaanyu variyari va empa ya Muluku ni altaari.
36 Kinnooleelani ekhaikhai weera: Itthu sootheene iya inimwaakhumelela atthu a mahiku ala.
37 “Yerusalemu, Yerusalemu, nyuwo munwiiva maprofeta ni munaavonya maluku yaale munrumiheliwaanyu . . . Ikwaha ikavi miyo kitthunnaaka waakhupaarela anamwane anyu ntoko hiihaale mwalakhu naamukuttu onaakhupaarelaawe axaana awe vathi va mapupha awe! Mene nyuwo khamutthunne.
38 Vano, Muluku oohiya empa anyu.*
39 Kinnooleelani ekhaikhai, weera ovinyera viinaano va, khamunrowa okoona miyo mpaka etempu muneeraanyu mweere: ‘Ooreeriwa ti yoole onwa mwa nsina na Yehova!’”
Footnotes
^ Ikaaxa sene ti seiye afarisi yaawaraaya vayuutxi.
^ Naari: “Muhusiha.”
^ Naari: “Muhusiha.”
^ Naari: “mwa.”
^ Eversu ela ennaphwanyeya mwa a Biblya akina. Mene khemphwanyeya mwa soolempwa sa matata sintxipale sootthuneya sa eKereku.
^ Naari: “avolowe ettiini anyu.” Eyo tiiyo, ettiini ya ayuda.
^ Naari: “pooti ohikwanihera.”
^ Naari: “owiiyera itthu atthu akina.”
^ Naari: “anaxariya.”
^ Ni eKereku: “murinko.”
^ Naari: “asitiithi anyu.”
^ Naari: “empa anyu enookhala mathala.”
