Silempwale ni Matheyo 25:1-46
25 “Omwene wa wiirimu pooti olikanxeriwa ni asimwali,* 10 yaawo yaakunxe ixamaniya saya enarowa okumana ni mulipa oottomera.*
2 Asimwali sinku a yaawo khayaari a miruku* ni sinku a yaawo yaari a miruku.
3 Asimwali ale oohikhalano miruku, yaakuxa ixamaniya saya mene khayaakunxe makhura,
4 nto asimwali ale sinku a miruku yaakuxa makhura* mukarafani vamoha ni ixamaniya saya.
5 Nto, woona weera mulipa oottomera annapisa, asimwali ale ootheene saahaaphwanya ikhove ni yaakona.
6 Ohiyu waahiiwanyeya okhuwela weera: ‘Mulipa oottomera ola, oophiya, mukhume weera mukumaneno.’
7 Nto asimwali ootheene yaavinya ni yaarehera ixamaniya saya.
8 Asimwali ale oohikhalano miruku yaahaavekela asimwali ale a miruku, yeeraka: ‘Munivahe vakhaaniini makhura anyu, mwaha wooweera ixamaniya sahu sihanle vakhaaniini otxipha”.
9 Asimwali a miruku owaakhula yenre: “Nnoona weera makhura nraahuno khenrowa okwanela okawana ni nyuwo. Opwaha mwa yeeyo, murowe wa atthu entumiha makhura ni mwathume awinyu.’
10 Eronweene othuma makhura, aahoowa mulipa oottomera. Asimwali ale yaakhanleno makhura oolikaneene, yaavolowa vamoha ni owo efeesta ya ekasamentu. Nto mulako, waawaliwa.
11 Vahoolo vaya, yaaphiya asimwali ale oohikhalano miruku, eneera: ‘Pwiya, pwiya, onihulele mulako!’
12 Owo owaakhula enre: ‘Vekhaikhai nkoosuwenleni.’
13 “Tivanto, mukhale oowehexexa mwaha wooweera khamusuwenle nihiku naari ewoora.
14 “Omwene wa Muluku onoolikana ni mulopwana yoowo ohinaaye weetta ekwahaawe aawiitthanne akaporo awe ni aahiyenre mihakhu sawe.
15 Kaporo oopatxera aamwinnyale italentu* sinku, mukina piili ni mukina emoha. Yoole ori kaporo, aakhela moovarihana ni owera wawe, ni mulopwana owo aaheetta ekwahaawe.
16 Kaporo ole, aakheenle italentu sinku, aavinya moowaakuveya anarowa omweetta nakoso ni italentu iye, ni aaphwanya* tho italentu sinku.
17 Vamoha-moharu, kaporo ole aakhenle italentu piili, aaphwanya* tho italentu piili.
18 Mene kaporo ole aavahinwe etalentu emoha, aathipa nlitti anattukunyera musurukhu* ole aavahinwaawe ni apwiya awe.
19 “Evirakaru etempu yintxipale, pwiya aakaporo ale aatthika ni aawiitthana weera aalikele ikontha naawo.
20 Nto kaporo ole aakhenle italentu 5, aahoonihera ni aawiiha tho italentu 5, eeraaka: ‘Pwiya, nyuwo mwaakiroromela ni italentu 5, nkawehani! Koophwanya* italentu 5 ikina.’
21 Pwiya awe aamweerela: ‘Moopaka nnene kaporo ooreera murima ni oororomeleya! Nyuwo moororomeleya ni itthu vakhaaniini. Nto, kinoorowa woororomelani ni itthu sintxipale. Muhakalale murima ni pwiya anyu.’
22 Voottharelana, kaporo ole aakhenle italentu piili, aahoowa aneera: ‘Pwiya, nyuwo mwaakiroromela ni italentu piili; nkawehani! koophwanya* italentu piili.’
23 Aamweerela: ‘Moopaka nnene kaporo ooreera murima ni oororomeleya! Nyuwo moororomeleya ni itthu vakhaaniini. Nto, kinoorowa woororomelani ni itthu sintxipale. Muhakalale murima ni pwiya anyu.’
24 Omamaliheroni, aaphiya kaporo ole aakhenle etalentu emoha ni aaheera: “Pwiya, miyo kaasuwela weera nyuwo mutthu ooxupa ni weera munhepha nipuro muhanlaanyu ni munthukumanya nipuro muhimwaramwanraanyu.
25 Tivanto, koovalaaka ni kinathipela nlitti. Etalentu anyu ela.’
26 Pwiya awe omwaakhula enre: ‘Kaporo oonanara murima ni nooresi! Ontthuna ohima weera weyo waasuwela weera miyo kinhepha nipuro kihaaliyaka ni kinthukumanya nipuro kihimwaramwanraaka?
27 Phataari tthiri mwaaroihale musurukhu aka* opanku, katthika, kaamwaakhela ni ixuuru.
28 “‘Mmwaakhe etalentu aka ni munvahe ole okhaanleno italentu 10.
29 Tivanto, yoole okhanleno, onoovahiwa tho ni onookhalano sintxipale, ni ole ohikhanleno onrowa waakhiwa mpaka yeele oraaweno.
30 Munvonyere kaporo owo oohiroromeleya vaate vawo, veepiphini. Ni ti weiwo onrowaawe okhuuriha maino awe.’
31 “Emaara Mwaana a Mutthu onkelaiye owa moovuwani mwawe vamoha ni malaika awe ootheene, onookilaathi veehitxeni vawe yoowaara.
32 Maloko ootheene atthu, enoothukumanyiwa ohoolo wawe ni owo onimwaamwalamwaxa weera ekhale ikrupu piili ntoko hiihaale mukukhuli ommwalamwaxaawe iputtiputthi ni ipuri.
33 Nto anaahiye iputtiputthi moono awe woolopwana mene ipuri moono awe woothiyana.
34 “Mwene onoorowa oweerela ale enrowa okhala moono awe woolopwana: ‘Nwe nyuwo ooreelihiwa ni Atiithi aka, mwaakhele Omwene yoowo nyuwo mureherelinwaanyu ovinyera ephattuwelo ya elapo.
35 Kaavoliwa etala, nyuwo mwaakivaha yootxa; naakivola ntthona, mene nyuwo, mwaakivaha maahi oowura. Nyuwo khamwaakisuwenle, ni nkaakhanleno nipuro nookhala, mene nyuwo, mwaakaakhela owannyinyu.
36 Kaahaawela ikuwo, mene nyuwo mwaakivaha ikuwo. Kaavoreiwa, mene nyuwo mwaakikosoopa. Kaawaleliwa okateya, ni nyuwo mwaahoowa okixekura.
37 Nto anaxariya, enrowa omwaakhula emukohaka ha: ‘Apwiya, nihiku heeni naawonnaahuni nvolinweene etala noovahaani yootxa, naari nihiku heeni naawonnaahuni nvolinweene ntthona noovahaani maahi oowura?
38 Salini naawonnaahuni muhikhanleno nipuro nookhala niwaakhelani owannyihu naari nihiku heeni naawonnaahuni muhaawelaka ikuwo, noovahaani?
39 Salini hiyo naawonnaahuni nvoreiwaka naari nwalelinweene okateya niwa wooxekurani?’
40 Mwene, onoowaakhula eeraka: ‘Kinnooleelani ekhaikhai: Etthu mumpakenlaanyu mmoha aasinnaka ala asikhaani, mookipakela miyo.’
41 “Nto, mwene onooweerela ale enrowa okhala moono awe woothiyana: ‘Mukivinyerevo va, nyuwo oowuulumeliwa; munrowa ovonyeriwa omooroni ohintxipha oreherelinwe Satana vamoha ni malaika awe.
42 Miyo kaavoliwa etala, ni nyuwo khamwaakivanhe etthu yootxa; naakivola ntthona mene nyuwo khamwaakivanhe maahi oowura.
43 Miyo nkaakhanleno nipuro nookhala, mene nyuwo mootxeenle okaakhela owannyinyu; nkaarino ikuwo mene nyuwo mootxenle okivaha ikuwo soowara; kaavoreiwa ni kaawaleliwa okateya mene nyuwo mootxenle okikosoopa miyo.’
44 Nave-tho awo, enoomwaakhula emukohaka ha: ‘Apwiya, salini hiyo naawonnaahuni nvolinweene etala naari noovonleeneni ntthona ni muhikhanleno nipuro nookhala naari muhikhanleno ikuwo naari nvoreiwaka naari nwalelinweene okateya, nihookhaviherani?’
45 Mwene onoowaakhula eeraka: ‘Kinnooleelani ekhaikhai weera: Etthu muhimpakenlaanyu mmoha aasinnaka ala asikhaani, khamukipakenle miyo.’
46 Nto ala enrowa onyaanyiwa* moomalela, mene anaxariya enrowa ophwanya ekumi yoohimala.
Footnotes
^ Asimwali enhimmwa va, athiyana ehintale okona ni mulopwana.
^ Mulopwana, omwanse muthiyana weera amuthele.
^ Naari: “oosuwela.”
^ Makhura yaapattiheriwa examaniya khalayi yaaphwanyiwa mwa aseitoona.
^ Etalentu ya eKereku, yaalemela ikiilu 20.4.
^ Naari: “aawina.”
^ Naari: “aawina.”
^ Ni eKereku: “eparatha.”
^ Naari: “koowina.”
^ Naari: “koowina.”
^ Ni eKereku: “eparatha.”
^ Ni eKereku: “okwasiwa.”