Silempwale ni Matheyo 3:1-17
3 Mahiku ene yaale, Yohani Mpatisa aarowa olaleya onikareni* wa oYudeya,
2 Eeraka: “Murukunuxe murima, Omwene wa Muluku wohaattamela.”
3 Ola ti yoole profeta Yesaya aamuhimmaawe eeraka: “Nsu na mutthu ninnakhuwela onikareni neeraka: ‘Mureherere ephiro ya Yehova! Mookolole misewe sawe.’”
4 Yohani aawara ikuwo soopakiwa ni mapururu a ikamelu ni muyuununi mwaawe anniitthukela sintu a exapala. Yootxa awe saari misoope ni oravo wa mutuphini.
5 Atthu a oYerusalemu ni oYudeya wootheene ni mittetthe soowaattamela mooloko Yordani, yannarowa okumana ni Yohani,
6 Yohani annaapatisa* awo mmoolokoni Yordani nave-tho yannahima soottheka saya sootheene.
7 Voowoona weera afarisi ni asaduki yannaattamela nipuro aapatisaawe atthu, owo aaweerela: “Nloko na evili, taani oolenleni weera munoowera otthawa isara sa Muluku sikhuvenle?
8 Tivawonto, miteko sanyu soonihereke weera moorukunuxa murima.
9 Muhiiwokeke muhimaka weera: ‘Nookhalano tiithi ahu Abrahamu.’ Mweekhaikhai, Muluku pooti otatuxa maluku ala okhala anamwane Abrahamu.
10 Maxato ori oolikaneene weera athikile mikakaari sa miri, miri sootheene sihiniima soowiima sooreera, inoothikiliwa ni ovonyeriwa vamooroni.
11 Miyo, kinoopatisani ni maahi mwaha wa orukunuxa wanyu murima, mene ole onwa ottuli waka tooweraxa okipwaha miyo, ni miyo nkiphwanenle omurula isantaaliya sawe. Owo onimoopatisani ni munepa wootteela ni mooro.
12 Owo oomukuxa apa mmatatani weera ammwalamwaxe tiriku ni iphepu, anaakwese nipuro ommukhupelaiyevo tiriku ni omwiiyaathi vantathani tiriku ooreera, mene iphepu onoorowa ohisa vamooroni ohintxipha.”
13 Yesu aakhuma oGalileya arowaka omoolokoni Yordani, okumana ni Yohani weera apatisiwe.
14 Yohani aaheerera okhootta ompatisa eeraka: “Miyo kintthuneya opatisiwa ni nyuwo, ohiya miyo woopatisani nyuwo.”
15 Yesu amwaakhulaka Yohani enre: “Wa viinaano va, muhiye itthu weera seereye hiiha, weera nikwanihere exariya eri yootheene.” Nto mwaha wa yeeyo, Yohani aamwaakhulela ompatisa.
16 Yesu apatisiwakaru aakhuma mmaahini moowaakuveya, etempu ene yeele erimu yaahuleya ni aahoona munepa wa Muluku omukhuruwelaka ntoko epompa.*
17 Nave-tho, naahiiwanyeya nsu naakhuma wiirimu neeraka: “Ola mwanaka oosiveleyaxa, mwa yoowo kinnahakalala.”