Silempwale ni Matheyo 4:1-25
4 Yesu aakuxiwa ni munepa wootteela aroihiwaka onikareni weera eereriwe ni Diabo.
2 Emalakaru mahiku 40 othana ni ohiyu ahitxiiye etthu, Yesu aavoliwa etala.
3 Vano, Diabo aamwaattamela ni onamweerela: “Waari weera nyuwo mwaana a Muluku, mulamule maluku ala weera ethatuwe ipaawu.”
4 Yesu aamwaakhula: “Soolepa sinhima ha: ‘Mutthu khankhala ni ekumi mwaha wa epaawu* paahi, mene onnakhala mukumi mwaha wa masu enkhuma mmwaanoni mwa Yehova.’”
5 Diabo aamukuxa Yesu amuroihaka esidade yootteela* ni aamwiiyaathi nipuro nootepaxa orakama na etemplu.
6 Ni aamweerela: “Waari weera nyuwo mwaana a Muluku, mwiivonyere vathi, woona wi yoolempwa weera: ‘Muluku onoorumiha malaika awe weera yookosoopeni. Awo enimookaphulani ni matataaya weera manaani anyu ehimane nluku.’”
7 Yesu omwaakhula enre: “Yoolempwa tho: ‘Ohimweerere Yehova Muluku aa.’”
8 Voottharelana, Diabo aamukuxera Yesu vamwaako woorakama ni aamoonihera imwene sootheene sa mulaponi ni ovuwa wa imwene iyo.
9 Ni aamweerela: “Kinimoovaha itthu sootheene iya wakikokhorelaru onaamukhala vakhaaniini paahi.”
10 Yesu omwaakhula enre: “Okhume va Satana! Yoolempwa: ‘Omukokhorele Yehova Muluku aa, ni onvareleke muteko yooworu paahi.’”
11 Vano, Diabo aamuhiya Yesu ni yaahoowa malaika enamukhavihera.
12 Asuwelakaru weera Yohani aatthukiwa okateya, owo aavinya anarowa oGalileya.
13 Akhumakaru oNazareti, aarowa okhala oKafarnawu, muxerexere mwa ephareya ya mittetthe sa oZabuloni ni oNeftali.
14 Weera ekwanele masu a profeta Yesaya, yeera:
15 “Nyuwo atthu a elapo ya oZabuloni ni ya oNeftali, munkhala waattamela musewe onrowa ophareya, ekhopela ekina ya mooloko Yordani, oGalileya enkhala atthu a ilapo ikina!
16 Atthu yaakilanthi vapiphini yaahoona waara, ale yaari vamuuttuuxini wa okhwa, waahaakhumelela waara.”
17 Ovinyera etempu ene yeele, Yesu aapatxera olaleya eeraka: “Murukunuxe mirima sanyu, Omwene wa wiirimu wohaattamela.”
18 Eettaka muxerexere mwa ephareya ya oGalileya, aamoona Simoni oniitthaniwa tho Pedru ni munnawe Andreya. Awosa yaavonyera ntthavi mphareya woona weera yaari anamatotha a ihopa.
19 Ni aaweerela: “Mukitthare miyo, weera kookhaliheni anamatotha aatthu.”
20 Moowaakuveya, awosa yaahiya matthavi aya ni yaamutthara Yesu.
21 Eheettale seetthu, Yesu aamoona Yakobe mwaana a Zebedeyo ni munnawe Yohani erehererakasa ntthavi vamoha ni apapaya mpaarkuni ni aawiitthana.
22 Moowaakuveya, awosa yaamuhiya paarku vamoha ni apapaya, enamutthara Yesu.
23 Aaheetteetta muttetthe wootheene wa oGalileya, axuttihaka musinakooka, alaleyaka mitthenka sooreera sa Omwene ni alamihaka iretta sootheene sa atthu.
24 Itthu iye Yesu aapakaawe, saahiiwanyeya mpaka elapo yootheene ya wa aSiria. Tivanto, aawiiheriwaawe atthu yaavoreiwa iretta soovirikana, anamatxiini, alipa eetxiletxile, oorakala ni annaalamiha yaawo.
25 Atthu ootheene ekhumaka oGalileya, oDekapoli, oYerusalemu, oYudeya ni okhopela wa mooloko Yordani, yannamutthara.
Footnotes
^ Naari: “yootxa.”
^ “Esidade yootteela” onhimmwa Yerusalemu, ikwaha sintxipale onniitthaniwa “esidade yootteela” mwaha wooweera etemplu ya Yehova yaari oYerusalemu.
