Silempwale ni Matheyo 5:1-48
-
MWAHA YESU AAPANKAAWE VAMWAAKO (1-48)
5 Yesu awoonakaru atthu antxipale, aawela vamwaako, akilaathikiru, atthareli awe yaamwaattamela.
2 Owo aapatxera waaxuttiha eeraka:
3 “Oohakalala ti yaale esuwenle weera entthuneya omusuwela Muluku, mwaha wooweera Omwene wa Muluku ti wawaya.
4 “Oohakalala ti yaale aninla, mwaha wooweera eneemaalihiwe.
5 “Oohakalala ti yaale oowiiyeviha, mwaha wooweera eneehiyeriwe elapo.
6 “Oohakalala ti yaale enaasa vantxipale exariya,* mwaha wooweera eneevahiwe exariya yeekhaikhai.
7 “Oohakalala ti yaale oomoriwa ikharari, mwaha wooweera eneemoreliwe ikharari.
8 “Oohakalala ti yaale ooreera murima, mwaha wooweera enaamoone Muluku.
9 “Oohakalala ti yaale enkhaliha murettele, mwaha wooweera enimwiitthaniwa okhala anamwane a Muluku.
10 “Oohakalala ti yaale enhasuliwa mwaha wa exariya, mwaha wooweera Omwene wa wiirimu ti wawaya.
11 “Muhakalaleke vaavo atthu enooveehaayani, woottharattharani ewootherakani itthu sootheene soonanara mwaha wa miyo.
12 Muhakalaleke ni mutteeliweke murima vantxipale mwaha wooweera nlivo nanyu ntokotoko wiirimu; tthiri ti hiiho, yaasonttalaaya maprofeta akhalayi muhinaaye nyuwo.
13 “Nyuwo maakha a elapo, maakha yahiya osiva, munkela otthikihera hayi osiva waya? Awo khenvareleya tho muteko ohikhanle ovonyera osalani* weera enyikaliweke ni atthu.
14 “Nyuwo muthuko wa mulaponi. Ohiniipithiheya esidade etekinwe vasulu vamwaako.
15 Atthu yapattiha muthuko kheniiyaathiki vathi va muttanka, mene vasulu weera waamwaleeleke atthu ootheene eri mpaani.
16 Muhiye waara wanyu waamwaleelaka atthu, weera yoone miteko sanyu sooreera ni yaavuwiheke Atiithi anyu eri wiirimu.
17 “Muhuupuweleke weera kaawenle omaliha Nlamulo naari sooxuttiha sa Maprofeta. Hooye, mene kaaweenle okwanihera.
18 Mweekhaikhai, kinnooleelani weera nnaamweera erimu ni elapo ya vathi emalaka, eleetera emoha naari eleetera ekhaanini ya Nlamulo khemmala sihinaaye weereya itthu sootheene iya.
19 Ole onkela otupha* nlamulo nimoha a malamulo ala makhaanini ni anaaxuttiha atthu akina opaka etthu emoha-moharu, onookhalihiwa ooyeva Moomweneni wa wiirimu. Mene ole onkela wiiwelela malamulo ala ni waaxuttiha atthu akina, onookhalihiwa mutokweene Moomweneni wa wiirimu.
20 Tthiri miyo kinnooleelani weera, exariya anyu yaahipwaharu ya afarisi ni alipa oolepa, khamunvolowa Moomweneni wa wiirimu.
21 “Mohiiwa ele yaaleelinwaaya makholo anyu khalayi, weera: ‘Muhimwiive mutthu, ni ole onkela omwiiva mukhwaawe, onooroihiwa otripunaale.’
22 Mene miyo kinnooleelani, ole onavirelela omunyoonyeriwa mukhwaawe, onoothorihiwa otripunaale. Ni ole onaamuulumele munnawe masu oohireera, onaathorihiwe etripunaale etokweene ni ole onaamweerela mukhwaawe: ‘Mulolo, oohivareleya muteko!’ Anaavonyeriwe oGehena.*
23 “Vano, mwakuxera yoovahaanyu waltaareni ni mureene vaavale munuupuwela weera munna ohoonyoonyeriwani,
24 muhiye yoovahaanyu valtaareni vaavo ni murowe mwakhalihe murettele ni munninyu ni avinyaka mutthike mwavahe yoovahaanyu.
25 “Muulume milattu sanyu ni ole muhiniiwananaanyuno mphironi mwa otripunaale, weera ole muhiniiwananaanyuno, ahooveleeleni wa mphuki ni weera mphuki ahooveleeleni wa polisiya weera ootthukeeni.
26 Mweekhaikhai, kinnooleelani weera: Khamunkhuma iwo muhinaaye oliva musurukhu wootheene.
27 “Mohiiwa ele yaahimmwale, weera: ‘Muhiraruwe.’
28 Mene miyo kinnooleelani weera: ole oninwehexexa muthiyana mpaka okhalano yootthuna ya okonano, ooraruwano vamurimani.
29 Wakhala weera niitho nanyu noolopwana ninnootthekihani mukumihe ni murihe. Phataari oyeleela eparte emoha ya erutthu anyu, ohikhanle oriheliwa erutthu anyu yootheene oGehena.*
30 Nave-tho, wakhala weera ntata nanyu noolopwana ninnootthekihani, muthikile murihe. Phataari oyeleela eparte emoha ya erutthu anyu, ohikhanle oriheliwa erutthu anyu yootheene oGehena.*
31 “Nave-tho yaahimmwa: ‘Mulopwana ommwalana ni amwaariye aavaheke etokomentu ya omwalana.’
32 Nto kinnooleelani weera; ootheene ole onaahiya amwaarawe ohikhanle mwaha wa okonihana woohireerela,* onnamweeriha muthiyana okhala namararuwa.* Ni ole ommuthela muthiyana oohiwa ohikhanle weera orooraruwa, onooraruwano.
33 “Nave-tho mohiiwa ele ehimmwale etempu yakhalayi weera: ‘Muhilipele muheerelaka okwanihera, mene mwaataphule anatiri mummanenlaanyu Yehova.’
34 Mene kinnooleelani: Muhilipele naari vakhaaniini muromolaka erimu, mwaha wooweera ehitxe ya Muluku;
35 naari muromolaka elapo ya vathi, mwaha wooweera onhiyavo manaani awe, naari mmuromolaka Yerusalemu mwaha wooweera esidade ya Mwene mutokweene.
36 Muhilipele muromolaka muru anyu, mwaha wooweera khamunwera okhaliha epwi naari okhaliha niihi nooriipa maihi anyu.
37 Nto masu anyu ekhaleke aani “aani”, hooye “hooye”, sootheene sihinhimmwa hiiha, sinweela wa Mutakhali.
38 “Mohiiwa ele yaahimmwale: ‘Niitho nniitho, niino nniino.’
39 Mene kinnooleelani: Muhimutthikihere isikula mutthu oowali,* oomanani vale nrama noolopwana, mmwinnyerere nrama noothiyana weera oomaneeni-tho.
40 Wakhala weera mutthu ontthuna wooroihani otripunaale ni yootthuna ya owaakhani maleya a mpuwa, mmuhiyere-tho maleya mphitaanyalaanyu;*
41 Mutthu orino owera oolamulani weetta ekilometru emoha, mweette ikilometru piili.
42 Mutthu oovekelani etthu, munvaheke. Muhimusepe ole ontthuna wookophelani.
43 “Mohiiwa ele yaahimmwale: ‘Mmusivele mukhwiinyu ni mmwiitte mwiittani anyu.’
44 Mene miyo kinnooleelani: Nvirelele waasivela amwiittani anyu ni mwaavekeleleke ale enootthara-ttharani,
45 weera moonihere weera mwa anamwane a Atiithi anyu eri wiirimu, woona weera Muluku onnaariha nsuwa ahimuthanlaka ari weera mutthu ooreera murima naari oonanara murima, ni onnaarupihela epula anaxariya ni oohixariya.
46 Mwaasivelaka paahi ale anoosivelaniru, ntthuvelo heeni muneeraanyu mwaakhele? Khaiyene etthu emoha-moharu yeeyo empakaya alipa ooliviha mpostu?
47 Mwaawuulumihaka asinnaru paahi, eheeni mumpakaanyu yoovirikana ni atthu akina? Khaiyene mumpaka etthu emoha-moharu atthu a maloko makina empakaaya?
48 Tivawonto, mukhale oomalela ntoko Atiithi anyu a wiirimu eraaya oomalela.
Footnotes
^ Ni eKereku: “ntthona ni etala ya exariya.”
^ Naari: “nipuro ninriheliwa ikokhola.”
^ Naari: “ohiiwelela, ohitthara.”
^ Nipuro saahisiwaayavo ikokhola. Nwehe masu oowiiwanyeihiwa.
^ Ni eKereku: porneía. Nwehe masu oowiiwanyeihiwa.
^ Onkela okhala namararuwa wakhala weera ootheliwa ni mulopwana mukina.
^ Naari: “mutakhali.”
^ Naari: “maleya a vasulu.”
