Silempwale ni Yohani 10:1-42
10 “Kinnooleelani ekhaikhai weera: Mutthu ohinvolowa vamulako wa nikhola na iputtiputthi, mene anavolowa nipuro nikina, namwiiya.
2 Mutthu onvira vamulako, ori mukukhuli a iputtiputthi.
3 Owo onnahulela mulako ni iputtiputthi iyo, sinniiwa nsu nawe. Owo onniitthana iputtiputthi iyo ni nsina naya ni onnakumihera vaate.
4 Akumiha vale iputtiputthi sawe sootheene, owo onnahoolela ni iyo sinnamutthara mwaha wooweera soosuwela nsu nawe.
5 Iyo khasinkhalakhala simuttharaka mutthu sihimusuwenlaaya, mene sinoomutthawa, mwaha wooweera khasisuwenle nsu na mutthu nihimusuwenlaaya.”
6 Yesu aapaka niphwanaphwaniho nna, mene awosa khayiiwexenxe etthu aaleelaawe.
7 Tivawonto Yesu aalenlaawe eeraka: “Kinnooleelani ekhaikhai weera: Miyo kiri mulako wa iputtiputthi.
8 Ootheene yaawiiye yiihimaka weera ti miyo,* anamootha; ni iputtiputthi khasiwiiwelenle awosa.
9 Miyo mulako. Ole oneera avolowe wa miyo, onoovuluwa, onoovolowa ni onookhuma ni onoophwanya yootxa.
10 Namwiiya onweelaka wiiya, wiiva ni onanariha. Miyo kaawenle weera atthu ekhaleno ekumi yoomalela.
11 Miyo mukukhuli ooreera murima; mukukhuli ooreera murima onnavaha ekumi awe weera avuluxe iputtiputthi.
12 Namuteko ohikhanle mukukhuli ni mwaneene iputtiputthi, vaavo onoonaawe mwiitxi owaaka, onnahiya iputtiputthi anatthawa, ni mwiitxi onnavara iputtiputthi ni onnamwara-mwara;
13 owo onnatthawa mwaha wooweera namuteko ni khampwattha iputtiputthi.
14 Miyo mukukhuli ooreera murima. Koosuwela iputtiputthi saka ni iputtiputthi saka sookisuwela miyo,
15 ntoko hiihaale Atiithi ekisuwenlaaya miyo ni miyo-tho kohaasuwela awo; ni kinnavaha ekumi aka weera kivuluxe iputtiputthi.
16 “Ni kookhalano iputtiputthi ikina sihikhanle sa nikhola nna; ni iyo tho, kintthuneya owiiha ni sinrowa wiiwelela nsu naka, ni inookhala nikhola nimoha ni mukukhuli mmoha.
17 Tivawonto Atiithi aka enkisivelaaya, mwaha wooweera kooveleela ekumi aka weera kaakhele wanaaveeli.
18 Khaavo onkaakha, ni miyo kinvaha ni otthuna waka. Kookhalano owera* woovaha ni waakhela wanaaveeli. Nlamulo nna kaakhenle wa Atiithi aka.”
19 Waakhumelela-tho okawanyeya variyari va ayuda, mwaha wa masu ene yaala.
20 Antxipale a yaawo yeera: “Owo ookhalano munepa woonanara ni onkhwa anepa. Mwaha wa heeni mummwiiwelelaanyu?”
21 Akina yeera: “Ala khaiyene masu a mutthu orinono munepa woonanara. Neereke mutthu orino munepa woonanara pooti ohula* maitho a mutthu oohoona?”
22 Yaaheereya Efeesta Yoovahereriwa empa ya Muluku oYerusalemu. Yaari eyiita,
23 ni Yesu eera eetteettaka mutemplu,* nipuro na Nipithela na Salomoni.
24 Vano ayuda yaamurukurera enamukoha: “Mpaka liini muneeraanyu munihiye nihovelaka? Mwaareene Kristu, muhinleelaka heeni?”
25 Yesu aawaakhula: “Miyo kohooleelani, mene nnaamweera vareene hiiho khamunroromela. Itthu miyo kimpakaaka mwa nsina na Atiithi aka, sinnakihelela onamoona.
26 Mene nyuwosa khamunkiroromela mwaha wooweera khamuhiyono iputtiputthi saka.
27 Iputtiputthi saka sinniiwa nsu naka; miyo koosuwela ni iyo sinnakitthara.
28 Miyo kinnavaha iyo ekumi yoohimala, ni iyo khasiwa sinyaanyiwa, ni khaavo oneera akaakhe mmatatani mwaka.
29 Etthu ekivanhaaya Atiithi aka ti yootthuneya, opwaha itthu sootheene iya ni khaavo onwera owaakha Atiithi aka mmatatani mwaya.
30 Miyo ni Atiithi nri oowiiraana.”*
31 Mwa ekwaha ekina-tho, ayuda yaattotta maluku weera envonye Yesu.
32 Nto, Yesu aaweerela: “Koowooniherani itthu* sintxipale sooreera sinkhuma wa Atiithi aka. Mwa miteko* sene seiya, toovi muntthunaanyu okivonyerano maluku?”
33 Ayuda yaamwaakhula emweerelaka: “Hiyo khaninkela woovonyani maluku mwaha wa miteko sooreera, mene mwaha wonveeha Muluku; nnaamweera nyuwo mureene mutthu; nyuwo munniipaka muluku.”
34 Yesu aawaakhula eeraka: “Munlamuloni mwanyu, khelempwale weera: ‘Miyo kaaheera: “Nyuwosa amiluku”’?
35 Muluku enre: Nyuwosa ‘amiluku’ seiye nsu nthorinhaaya ni atthu khenwera otxenxa ele Soolepa sinhimaaya,
36 mene miyo ti yoole Muluku omutteelinhaawe, ni omuruminhaawe elapo ya vathi. Mene nyuwo ohima muneera: ‘Munnanveeha Muluku,’ mwaha wooweera miyo koohima weera ka ‘Mwaana a Muluku’?
37 Miyo kaahivaraka miteko sa Atiithi aka, muhikiroromeleke.
38 Vanonto miyo kaavaraka, nnaamweera muhikiroromelaka miyo, muroromeleke miteko, weera musuwele ni muroromele weera Atiithi eri vamoha ni miyo, ni miyo kiri vamoha ni Atiithi.”
39 Nto, yaaheerera tho onvara, mene owo aahaatthawa.
40 Owo aakhuma-tho anarowa ekhopela ekina ya mooloko Yordani, nipuro nenno Yohani aapatisaawevo atthu woopatxerani, ni aakhala weiwo.
41 Atthu antxipale yannarowa okumana nuuwo, ni yanneera: “Yohani, khapanke naari mwiiriira mmoha, mene itthu sootheene Yohani ohimmmaawe woohima sa mulopwana ola, ti seekhaikhai.”
42 Ni atthu antxipale yaamuroromela.
Footnotes
^ Apaale: “Kristu.”
^ Naari: “edireitu.”
^ Naari: “olamiha.”
^ Naari: “empa ya Muluku.”
^ Naari: “miyo ni Atiithi nri amoha.”
^ Naari: “miteko.”
^ Naari: “itthu.”
