Silempwale ni Yohani 11:1-57
11 Vano, mulopwana mmoha iitthaniwa Lazaro anvoreiwa; owo aakhala oBetania, muttetthe yoowo aakhalaawe Maria ni munnawe Marta.
2 Maria ene ti yoola aayeehenre makhura oowinkhela Apwiya, ni anapuputtha manaani aya ni maihi awe; Lazaro ola aavoreiwa aari murokorawe.
3 Mwaha wa yeeyo, asirokorawe yaaruma oleeliwa Yesu: “Apwiya, ole mummusivelaanyu onoovoreiwa.”
4 Mene Yesu iiwakaru eyo, aaheera: “Okhwipi wa eretta eyo khonkela okhala okhwa, mene ovuwihiwa wa Muluku, weera Mwaana a Muluku avuwihiwe moorweela mwa eretta eyo.”
5 Yesu annamusivela Marta, Maria ni Lazaro.
6 Vanonto, Yesu iiwakaru weera Lazaro anvoreiwa, aavirelela okhala nipuro nne aaraawe mpuwa mwa mahiku meeli.
7 Avinyaka, Yesu aaweerela atthareli awe: “Nrowe ntthikele-tho oYudeya.”
8 Atthareli awe yaamweerela: “Rabi, nsuri-nsuri va ayuda yaatthuna woovonyani maluku, vano tho nyuwo muntthuna otthikela weiwo?”
9 Yesu aawaakhula: “Keera othana orinono iwoora 12? Vanonto mutthu eettaka othana khonkwattula etthu, mwaha wooweera onnoona muthuko ommwalela elapo ela.
10 Mene, mutthu weettaka ohiyu, onnakwattuwa, mwaha wooweera khawaavo muthuko wa yoowo.”
11 Amalihakaru ohima itthu iya, Yesu aahaatxeerera eeraka: “Nthamwene ahu Lazaro onookona, mene miyo kinrowa weiwo kanvinxe.”
12 Nto atthareli awe yaamweerela: “Apwiya, waari weera owo onookona, onookhala nnene.”
13 Menento, Yesu aahima okhwa wa Lazaro; vano, atthareli awe yuupuwela weera aahima okona wa ikhove.
14 Vanonto, Yesu aawiiwanyeiha eeraka: “Lazaro ohookhwa,
15 ni, mwaha wa nyuwo, miyo kinnahakalala mwaha wooweera nkaakhanle wuuwu weera nyuwosa muroromele. Vanonto nrowe nipuro owo oraawe.”
16 Nto, Tome, yoowo iitthaniwa maphapo, aaweerela atthareli akina: “Nrowe, nnaamukhwaaka vamoha ni yaala.”
17 Yesu aphiyakaru, aasuwela weera yaavira mahiku maxexe Lazaro avithinweene mmahiye.
18 Betania aarimwaattamelana ni Yerusalemu, waarakamelanne ikiloometru* 3,
19 ni ayuda antxipale yaarowa ommaaliha Marta ni Maria mwaha wookhweliwa murokoraya.
20 Marta iiwakaru weera Yesu annawa, aamutxitxeera,* mene Maria, aahanle owaani.
21 Marta aamweerela Yesu: “Apwiya, mwaari vaava, murokoraka khaakela okhwa.
22 Menento miyo koosuwela weera, viinaano vaava itthu sootheene muneeraanyu munvekele Muluku, Owo* onimoovahani.”
23 Yesu aamweerela: “Murokorinyu onoovinyerera.”
24 Marta waakhula enre: “Miyo koosuwela weera onoovinyererihiwa, woovinyererihiwani waatthu ookhwa nihiku noomalihera.”
25 Yesu aamweerela: “Miyo kiri evinyerero ni ekumi. Ole onkiroromela miyo nnaamweera akhwaaka onkela otthikela okhala mukumi;
26 ni ootheene ale eri akumi ni enkiroromela miyo, khenkela okhwa. Neereke nyuwo munnaroromela eyo?”
27 Owo aamwaakhula: “Aani, Apwiya, miyo kinnaroromela weera nyuwo mwa Kristu Mwaana a Muluku, yoowo aalaiherinwe weera anwa elapo ya vathi.”
28 Marta amalihakaru ohima itthu iya, aarowa omwiitthana weephiini Maria, munnawe, ni anamweerela: “Muhusiha ori va, onoowiitthanani.”
29 Iiwakaru eyo, Maria aavinya moowaakuveya, anarowa okumana ni Yesu.
30 Mene Yesu nlelo eera ahinaaye ovolowa mmuttettheni, aari nipuro nene nenne aaphwanyinwaawe ni Marta.
31 Vaavo ayuda yaari owannyawe Maria emmaalihaka, yonnaaya weera owo oovinya moowaakuveya, yaamutthara, yuupuwela weera aarowa winla omahiye.
32 Maria aphiyakaru nipuro aaraiyevo Yesu, aamoona ni aakokhora mmanaanini mwawe anamweerela: “Apwiya, mwaari vaava, murokoraka khaakela okhwa.”
33 Amoonaka Maria vamoha ni ayuda yaamuhoola yinlaka, Yesu aaxupeya ni waamuriipa murima vantxipale.
34 Vano Yesu aakoha: “Munvinthe woowi?” Awo yaamwaakhula yeeraka: “Apwiya, nwe moone.”
35 Ni Yesu aapatxera winla.
36 Nto mwaha wa yeeyo, ayuda yaaheera: “Nkoonani moota aamusivelaawe!”
37 Mene akina a yaawo yanneera: “Mulopwana ola ohunle maitho amutthu oohoona, khaakela opakavo etthu weera Lazaro ahikhwe?”
38 Yesu waamuriipa-tho murima ni aarowa omahiye. Mweekhaikhai, mahiye awo naari nikhuku naattiyelinwe ni nluku.
39 Yesu aaheera: “Nvinxe nluku.” Marta murokorawe Lazaro aamweerela: “Apwiya, pooti weera murutthu awe onnunkha, mwaha wooweera aavira mahiku maxexe akhwiiyeene.”*
40 Yesu aamwaakhula: “Miyo nkoolenleni weera mwaroromela munimoona ovuwa wa Muluku?”
41 Vano, naavinxiwa nluku. Ni Yesu aaweha wiirimu aneera: “Tiithi, miyo kinnooxukurelani mwaha wooweera mookiiwa.
42 Mweekhaikhai, miyo koosuwela weera ikhwaha sootheene munnakiiwa, mene kinuuluma hiiho mwaha wa muloko mutokotoko waatthu okirukurenre, weera osuwele weera nyuwo mukirumme.”
43 Ahimakaru itthu iya, aakhuwela moowiiwanyeya eeraka: “Lazaro, mukhumele vaate!”
44 Mulopwana ole aakhwiiye, aakhumela vaate atthukinweene manaani ni matata ni ikuwo, ni avitikelelinweene ekuwo owiitho. Yesu aaheera: “Mmutaphule ni mmuhiye arooke.”
45 Tivawonto, ayuda antxipale yaaronwe omuxekura Maria ni yonne itthu iye Yesu aapankaawe, yaamuroromela,
46 mene akina a yaawo yaarowa waaleela afarisi etthu Yesu aapankaawe.
47 Nto, asitokweene aanamakeya ni afarisi yaathukumanya Esineedriyu, ni yaaheerela: “Eheeni ninkelaahu opaka, noonaka weera mulopwana owo onnapaka miiriira sintxipale?
48 Namuhiya avirelelaka, atthu ootheene eneereke omuroromela ni aroma enimoowa onaakha etemplu ahu ni nloko nahu.”
49 Nto mmoha a yaawo iitthaniwa Kaifa, aari mutokweene aanamakeya a eyaakha ene yeele, aaweerelasa: “Nyuwosa khamusuwenle etthu,
50 naari khamunoona weera ti wooreera wa nyuwo weera mutthu mmoha aakhwele atthu ootheene, ohikhanle onyaanyiwa nloko nootheene.”
51 Menento, Kaifa khaiyene uuluma ariki mwiipakela, mene woona weera aari namakeya mutokweene a eyaakha ele, aamweera oprofetisari weera Yesu aakela okhwela maloko ootheene,
52 khohiyono paahi wa malokoru, mene weera aathukumanye ekhurupu emoha anamwane a Muluku yaawo yaamwaramwareñye.
53 Nto ovinya nihiku nene nenne mpaka muhoolo, yampaka palano weera emwiive.
54 Nto mwaha wa yeeyo, Yesu kheetta ooniwaka ni ayuda. Mene aakhuma nipuro nne anarowa muttetthe waattamela onikareni esidade yeeyo yiitthaniwa Efraim, ni aakhala weiwo ni atthareli awe.
55 Eera aattamelaka Mpaasika aayuda, ni atthu antxipale ammawaani yannarowa oYerusalemu ahinaaye Mpaasika, weera yiitteelihe ettharaka nlamulo.
56 Ayuda yeera emwaasaasaka Yesu, ni mutemplu yannakohana mukina ni mukhwaawe: “Munoonela hayi? Neereke owo khanwa ofeestani nno wa Mpaasika?”
57 Mene asitokweene aanamakeya ni afarisi, yaavaha nlamulo weera akhala mutthu eera amoone Yesu oraawevo, aaleele weera awo envare.*
Footnotes
^ Ni eKereku: “Istatiyu 15.”
^ Naari: “onveela, omuthikirera.”
^ Naari: “Muluku.”
^ Naari: “avithinweene.”
^ Naari: “emutthuke.”
